|
 BDU-nun
rektoru, akademik Abel Məhərrəmov Ankara
Universitetinin rektoru, professor, doktor Cemal
Taluğun rəhbərlik etdiyi nümayəndə heyətini
qəbul edib. Akademik Abel Məhərrəmov Bakı Dövlət
Universitetinin Türkiyənin ali təhsil ocaqları
ilə əməkdaşlığa xüsusi əhəmiyyət verməsindən,
universitetlərin daha sıx və səmərəli fəaliyyət
göstərmələri üçün birgə proqram və layihələrdən
bəhs edib. Rektor Bakı Dövlət və Ankara
universitetləri arasında ikili diplomlar,
tələbə-müəllim mübadiləsi və s. haqqında da
danışıb. Məlum olub ki, adıçəkilən universitetin
prorektoru Arqun Karacabəy, hüquq fakültəsinin
dekanı Mustafa Ağqaya bir müddət öncə BDU-da
olmuş və hüquq fakültəsinin diplomlarının qardaş
ölkədə tanınması istiqamətində müzakirələr
aparmışlar.
Professor,
doktor Cemal Taluğ hər zaman BDU rektoru
tərəfindən səmimi münasibət gördüyünü deyib.
Bildirib ki, Ankara Universiteti hüquq, türk
dili və ədəbiyyatı ixtisasları üzrə ikili
diplomların verilməsinə tərəfdardır. Rektorlar
ikili diplomların verilməsi üçün Ankara
Universitetinin tələbələrinin BDU-da, BDU
tələbələrinin isə Ankara Universitetində yay
məktəblərində iştiraklarının detallarını da
müzakirə ediblər.
Daha sonra
Bakı Dövlət Universiteti ilə Ankara Universiteti
arasında beynəlxalq əlaqələri inkişaf etdirmək
məqsədi ilə elm və təhsil sahəsində ümumi
maraqlara əsaslanan əməkdaşlıq müqaviləsinin
imzalanma mərasimi keçirilib. Əməkdaşlıq
müqaviləsində tədqiqatçı, doktorant və
magistrantların mübadiləsi, müəllimlərin
ixtisaslarının artırılmasına qarşılıqlı yardım,
qabaqcıl inkişaf metodları sahəsində təcrübə
mübadiləsi, ikitərəfli birgə elmi simpozium,
seminar və konfransların təşkili, qarşılıqlı
maraq doğuran layihə və proqramlarda tərəflərin
birgə iştirakı, tamamlanmış bakalavr dərəcəsi,
ikili diplom proqramları öz əksini tapıb.
İmzalanma
mərasimindən sonra rektorlar bildiriblər ki,
müqavilədən yararlanan tələbələr həm BDU, həm də
Ankara Universitetinin məzunu olacaqlar, bu da
onlara hər iki qardaş dövlətdə işləmək şansı
yaradacaq.
BDU-nun Mətbuat və informasiya şöbəsi |
|
