|
Yanvarın
19-da Azərbaycan Dillər Universitetində (ADU)
qanlı 20 Yanvar hadisələrinin 21 illiyi
münasibətilə keçirilən mərasim Azərbaycanın
Dövlət himni ilə başladı. Sonra 20 Yanvar
şəhidlərinin xatirəsi 1 dəqiqəlik sükutla yad
edildi. ADU-nun tədris işləri üzrə prorektoru,
professor Natiq Yusifov 20 Yanvar hadisələrinin
xalqımızın qəhrəmanlıq tarixinə çevrildiyini
qeyd edərək dedi: - "O hadisələr hələ də
gözümüzün önündədir. Günahsız insanlar qətlə
yetirildi, yüzlərlə vətəndaş itkin düşdü. Buna
baxmayaraq, heç kəs ruhdan düşmədi. Azərbaycan
xalqının qətiyyəti, səbri azğınlaşmış sovet
qoşunlarının Bakıda çox duruş gətirə bilməməsinə
səbəb oldu".
Sonra qanlı
20 Yanvar hadisələrini özündə əks etdirən
videoslayd nümayiş etdirildi.
Mərasimin
sonunda Üzeyir Hacıbəylinin "Koroğlu"
operasından uvertüra səsləndi.
***
Azərbaycan
Müəllimlər İnstitutunda anım mərasimi
keçirilmişdir. Şəhidlərin xatirəsi bir dəqiqəlik
sükutla yad edildikdən sonra mərasimi açan
rektor, siyasi elmlər doktoru, professor, millət
vəkili A.Naxçıvanlı 1990-cı il hadisələrini
sovet imperiyasının törətdiyi cinayət aksiyası,
xalqın milli-azadlıq hərəkatını boğmağa, məkrli
siyasətin acı nəticəsi olduğunu qeyd etdi.
Millət vəkili ümummilli lider Heydər Əliyevin bu
müsibətin dünya ictimaiyyətinə çatdırılması üçün
gördüyü işlərdən danışmış, məhz onun təşəbbüsü
ilə ilk dəfə bu hadisəyə hüquqi-siyasi qiymət
verildiyini vurğulamış, şəhidlərin xatirəsinin
əbədiləşdirilməsini ulu öndərin böyük ehtiram və
qayğısı kimi qiymətləndirmişdir.
Çıxış
edənlər 20 Yanvar faciəsinin səbəb və nəticələri
haqqında ətraflı məlumat vermişlər.
Toplantıda
şəhidlərin xatirəsinə həsr olunmuş ədəbi
kompozisiya və film göstərilmişdir.
***
Azərbaycan
Texniki Universitetində qanlı 20 Yanvar
faciəsinin 21-ci ildönümünə həsr olunmuş
tədbirin iştirakçıları əvvəlcə AzTU-nun
həyətində şəhidlərin xatirəsinə ucaldılmış
abidənin və universitetin foyesində ümummilli
lider Heydər Əliyevin büstünün önünə təzə-tər
gül-çiçək dəstələri qoymuşlar.
Tədbiri
giriş sözü ilə universitetin rektoru, texnika
elmləri doktoru, professor Havar Məmmədov açmış,
şəhidlərin xatirəsi bir dəqiqəlik sükutla yad
edilmişdir.
Professor
Havar Məmmədov Azərbaycan xalqının tarixinə
nəzər salıb, xalqımızın ən dəhşətli faciəsi olan
20 Yanvar gecəsinin dəhşətlərindən ürək ağrısı
ilə danışmış, bu qanlı faciəyə öz münasibətini
bildirmişdir.
1990-cı il
yanvarın 21-də Moskvada xüsusi nəzarətdə olan
ümummilli lider Heydər Əliyev özünü və ailəsini
təhlükə altında qoyaraq, oradakı Azərbaycan
nümayəndəliyinə gəlmiş, geniş bəyanatla çıxış
etmiş və qatillərin, günahkarların
cəzalandırılmasını tələb etmişdi.
Sonra
AzTU-nun Tarix kafedrasının müdiri, tarix
elmləri doktoru Şikar Qasımov, İstilik və
soyuqluq kafedrasının müdiri, millət vəkili,
professor Astan Şahverdiyev və gənclər adından
IV kurs tələbəsi Azər Abdullayev 20 Yanvar
faciəsinin 21-ci ildönümü ilə əlaqədar geniş
məruzə ilə çıxış etdilər.
***
Lənkəran
Dövlət Universitetində Azərbaycanın müstəqilliyi
və azadlığı uğrunda həlak olmuş 20 Yanvar
şəhidlərinin xatirəsi dərin ehtiramla yad
edilmişdir.
20 Yanvar
ümumxalq hüzn günü ilə əlaqədar keçirilmiş
tədbiri universitetin rektoru, fizika-riyaziyyat
elmləri doktoru, əməkdar elm xadimi, professor
Asəf İsgəndərov açmış, şəhidlərin xatirəsinin
həmişə əziz tutulduğunu bildirmiş və 20 Yanvar
faciəsinin 21-ci ildönümü ilə əlaqədar
universitetdə həyata keçirilən tədbirlərdən
danışmışdır.
Universitetin Tarix və fəlsəfə kafedrasının
dosenti, tarix elmləri namizədi Əliağa Baxşıyev
"20 Yanvar günü Azərbaycanın suverenliyi,
istiqlaliyyəti və ərazi bütövlüyü uğrunda
mübarizənin rəmzidir" mövzusunda məruzə
etmişdir.
YAP
universitet ərazi təşkilatının sədri, iqtisad
elmləri namizədi Tofiq Paşayev, Kimya-biologiya
kafedrasının dosenti Məlahət Ağayeva, Tarix və
fəlsəfə kafedrasının baş müəllimi Qabil
Əmənullayev, Heydər Əliyev muzeyinin rəhbəri
Vaqif Abdullayev, tələbələrdən Seymur
Murtuzayev, Əşrəf İzzətov və başqaları çıxış
edərək 20 Yanvar hadisələrinə münasibətlərini
bildirmişlər.
Filologiya
elmləri namizədi, dosent, Prezident təqaüdçüsü
Hacı Mirhaşım Talışlı Yanvar şəhidlərinə həsr
etdiyi şeirini oxumuşdur.
Tədbirdə 20
Yanvar faciəsini əks etdirən kitab sərgisi,
fotostendlər nümayiş etdirilmişdir.
***
Bakıdakı 9
nömrəli orta məktəbdə 20 Yanvar faciəsi ilə
bağlı keçirilən tədbirdə şəhidlərin xatirəsi
bir dəqiqəlik sükutla yad edildi. Sonra tədbiri
giriş sözü ilə açan məktəbin direktoru Zinyət
Əhmədova bildirdi ki, 1990-cı il yanvarın
19-dan 20-nə keçən gecə Bakıda rus imperiyasının
törətdiyi qanlı faciədən 21 il keçir. M.
Qorbaçov başda olmaqla sovet ittifaqının o
vaxtkı rəhbərləri Azərbaycan xalqına
xəbərdarlıq etmədən Bakıya qoşun yeritdilər,
böyük bir faciə baş verdi. Həmin gecə günahsız,
əliyalın insanlar küçədə, yaşadığı evlərində
gülləbaran edildilər. Bu hadisənin səhəri gün
ilk etiraz səsini qaldıran məhz Azərbaycan
xalqının böyük oğlu ulu öndər Heydər Əliyev
oldu.
Ümummilli
liderin Azərbaycan xalqının tələbi ilə ikinci
dəfə hakimiyyətə gəlişindən sonra 20 Yanvar
hadisəsinə siyasi qiymət verildi və əsl
həqiqət bütün dünyaya bəyan edildi.
Məktəbin
müəllimlərindən Pəri Paşayeva, Şəfəq Nəsirova,
Səkinə Şirinzadə, Rəna Dadaşova, İslam Abbasov
və Milli Qəhrəman Şövqiyar Abdullayevin atası
Cəmil Abdullayev qeyd etdilər ki, 20 Yanvar
faciəsi öz azadlığına, müstəqilliyinə can atan
xalqımızın mübarizliyini, məğrurluğunu nümayiş
etdirdi. Azərbaycan xalqı böyük itkiyə məruz
qalsa da, öz müstəqilliyinə qovuşdu.
Məktəbin
fəal şagirdləri çıxış edərək şəhidlərin
xatirəsinə həsr olunmuş şeir söylədilər, mahnı
oxudular və kompozisiya nümayiş etdirdilər.
***
Respublika
İncəsənət Gimnaziyasında xalqımızın qan
yaddaşına əbədi həkk olan 20 Yanvar faciəsi ilə
əlaqədar V "A" sinfində "açıq dərs" keçirildi.
Öncə Azərbaycan dili və ədəbiyyat müəllimi
Turanə Zeynalova şagirdlərə tarix boyu
xalqımızın başına gələn müsibətlərdən danışdı.
Sonra bu faciəni törədənlər barədə bəzi faktları
sadaladı. O müdhiş gecədə Azərbaycanın
müstəqilliyi uğrunda canını qurban verən vətən
oğullarının qəhrəmanlıqlarından söz açdı.
Şagirdlərdən Aytən Bağırova, Əmrah Ələkbərli,
Zeynəb Məmmədova, Taleh Əbdülrəhimli, Nərmin
Əliyeva 20 Yanvar faciəsi haqqında bildiklərini
söylədilər və şəhidlərin xatirəsini bir
dəqiqəlik sükutla yad etdilər.
Dərsdə
şagirdlər 20 Yanvar faciəsi ilə bağlı divar
qəzeti tərtib etdilər. Faciəni əks etdirən
səhnəciklər də şagirdlərin ifasında maraqlı
idi.
"Açıq
dərs"də 20 yanvar faciəsinə həsr olunmuş film
göstərildi.
***
Paytaxtdakı fizika-riyaziyyat və informatika
təmayüllü liseydə 20 Yanvar faciəsinin iyirmi
birinci ildönümünə həsr olunmuş mərasimdə
respublikamızın suverenliyi, azadlığı,
müstəqilliyi, ərazi bütövlüyü uğrunda
canlarından keçərək qəhrəmanlıq nümunəsi
göstərmiş Vətən oğullarının əziz xatirəsi bir
dəqiqəlik sükutla yad edildi. Direktor müavini
Valeh Bəyalıyev o zaman Bakıda baş verən
hadisələr, yanvarın 19-dan 20-nə keçən gecə
rus imperiyasının törətdiyi qanlı cinayətlər
nəticəsində xalqımızın başına gətirilmiş
müsibətlər barədə məlumat verdi.
Şagirdlərin
ifasında şəhidlərə həsr olunan şeirlər,
bayatılar səsləndi, ədəbi-bədii kompozisiya
göstərildi. Müəllimlər Allahverdi Məmmədov,
Sərvinaz Əkbərova, Mülayim Hüseynova, Aybəniz
Mehdiyeva, Kəmalə Əliyeva, Şəfiqə Xankişiyeva
çıxış edərək xalqımızın qəhrəmanlıq tarixindən,
20 Yanvar faciəsinin acı nəticələrindən, şəhid
olub əbədiyyətə qovuşan Vətən övladlarının
şücaətindən söz açdılar.
Sonra
qanlı Yanvarla bağlı videogörüntülər nümayiş
olundu.
***
Zəif
eşidən və sonradan karlaşmış uşaqlar üçün xüsusi
respublika internat-məktəbdə 20 Yanvar
faciəsinin iyirmi birinci ildönümünün anım
mərasimində öncə qanlı Yanvar hadisələrinə həsr
olunmuş şagirdlərin əl işlərindən ibarət sərgiyə
baxış keçirildi. Məktəbin direktoru Kamil
Məmmədov o mühdiş gecənin dəhşətlərindən, bütöv
bir xalqa qarşı törədilən terror aktından,
haqsız axan qanlardan, sinələrinə övlad dağı
çəkilən anaların ərşə qalxan fəryadlarından
ürəkağrısı ilə söz açdı. Tərifə Şirinova
müqəddəs şəhidlərin xatirəsinə həsr etdiyi şeiri
söylədi. Tədbirin təşkilatçısı Nailə
Allahverdiyeva, müəllimlər Nədafə Yaqubova,
tərbiyəçilər Validə Bayramova, İlahə Məmmədova,
Mehriban İsmayılova o qanlı gecəyə həsr olunan
bayatılar, ağılar söylədilər.
***
20 Yanvar
faciəsinin qurbanları Qax rayonunun ümumtəhsil
məktəblərində keçirilən tədbirlərdə yad edilib.
Şəhər 1 nömrəli orta məktəbdə "Şəhidlik
ucalıqdır", 2 nömrəli məktəbdə "Qanla yazılmış
qəhrəmanlıq salnaməsi", 5 nömrəli orta məktəbdə
"Ağla, qərənfil ağla", İlisu kənd orta
məktəbində "20 Yanvar qəhrəmanlıq salnaməsidir"
adlı "dəyirmi masa"lar keçirilib. Məktəblərdə
20 Yanvar faciəsinə həsr edilmiş inşa, rəsm
müsabiqələri, ədəbi-bədii gecələr təşkil edilib.
Radio qovşaqlarında 20 Yanvar faciəsi ilə bağlı
şeirlər səsləndirilib. |
