|
Məlum
olduğu kimi, Azərbaycan Respublikasının təhsil
naziri Misir Mərdanov ali və orta ixtisas
təhsili müəssisələrində 2010-2011-ci tədris
ilinin qış imtahan sessiyası dövründə
tələbələrin biliyinin qiymətləndirilməsində
şəffaflığı və obyektivliyi təmin etmək, yarana
biləcək neqativ halları aradan qaldırmaq və
digər mühüm tədbirləri həyata keçirmək məqsədilə
müvafiq əmr imzalamışdır.
Təhsil
nazirinin əmrinə əsasən, ölkəmizin digər ali
məktəblərində olduğu kimi, Naxçıvan Dövlət
Universitetində də 2010-2011-ci tədris ilinin
qış imtahan sessiyasının mövcud normativ
sənədlər əsasında təşkili təmin olunmuşdur.
Təhsil Nazirliyinin müvafiq tapşırığına əsasən
burada yaradılan imtahan qərargahı operativ
fəaliyyət göstərməkdədir. İmtahan sessiyasında
şəffaflığı gözləmək, ictimai nəzarəti
gücləndirmək məqsədilə tədris şöbəsi mütəmadi
monitorinqlər keçirir, imtahanların gedişinə
birbaşa nəzarət edir. Universitetin rektoru,
akademik İsa Həbibbəyli imtahan keçirilən
auditoriyalarda olur, imtahan prosesi ilə bağlı
tələbələrlə söhbətlər aparır.
Qeyd edək
ki, test üsulu ilə keçiriləcək imtahanların
nəticələri informasiya-kommunikasiya
texnologiyaları vasitəsilə müəyyənləşdiriləcək.
Əyani şöbənin bütün birinci və ikinci
kurslarında imtahanlar Boloniya təhsil sisteminə
əsasən kredit üsulu ilə götürüləcək və 100
ballıq sistemlə qiymətləndiriləcək.
Yanvar
ayının əvvəlindan başlayan, bir ay davam edəcək
sessiyada bütövlükdə 600 imtahan olacaq. 700
nəfərdən artıq birinci kurs tələbəsi ilk dəfə
olaraq bu məsuliyyətli sınaqdan keçəcək.
Universitetin 500-dən artıq bal toplamış
yüzlərlə tələbəsi buradakı təhsilin səviyyəsini
əyani şəkildə nümayiş etdirəcək. Semestr ərzində
tədris olunan fənlərin mənimsənilməsi,
tələbələrin nəzəri bilik səviyyələri aşkar
olunacaq.
İlk
imtahanların nəticələri tələbələrin intellektual
səviyyəsinin, tədrisin keyfiyyətinin
artmasından, imtahanların obyektiv
keçirilməsindən soraq verir. Tələbələrin
davamiyyəti və imtahanlarda iştirakı barədə
kəmiyyət göstəriciləri də qənaətbəxş hesab oluna
bilər.
Mehriban SULTAN |
