|
 Nəsirov
Yalçın Canhəsən oğlu
1976-cı il
yanvarın 23-də Astara rayonunun Sərək kəndində
anadan olub. 1992-ci ildə orta təhsilini başa
çatdıraraq rayonda sürücü peşəsinə yiyələnib.
1994-cü ildə Astara Rayon Hərbi Komissarlığı
tərəfindən Milli Ordu sıralarına çağırılıb. O, 2
ay daxili qoşunların tərkibində təlim keçdikdən
sonra hərbi xidmətini Şamaxı və Tərtər
rayonlarında davam etdirib.
1995-ci il
martın 13-dən 17-ə kimi dövlət çevrilişinə
cəhdin qarşısının alınmasında iştirak edib. Bu
ərəfədə bir dəstə hakimiyyət hərisi dövlət
çevrilişinə can atırdı. Bunun qarşısı vaxtında
alınmasaydı, ölkə ağır fəlakətlərə düşə bilərdi.
Həmin vaxt çağırışa tabe olmayan bu dəstə öz
çirkin əməllərini həyata keçirmək üçün silaha əl
atıb. Yalçının xidmət etdiyi alayın əsgərləri bu
qarşıdurmanı yatırmaq üçün hadisə yerinə
göndərilib.
Y.Nəsirov
martın 17-dən 18-ə keçən gecə ağır yaralanır.
Onu Sabunçu rayon xəstəxanasına çatdırsalar da,
çoxlu qan itirdiyindən həyatını xilas etmək
mümkün olmur. Martın 24-də dünyasını dəyişir.
Azərbaycan
Respublikası Prezidentinin 4 aprel 1995-ci il
tarixli 307 nömrəli Fərmanı ilə Nəsirov Yalçın
Canhəsən oğlu ölümündən sonra Azərbaycanın Milli
Qəhrəmanı adına layiq görülüb.
Anadan
olduğu Sərək kəndində dəfn olunub. Sərək kənd
orta məktəbi onun adını daşıyır. Astara
rayonundakı "Qəhrəmanlar bağı"nda büstü
qoyulub.
 Nəsrəddinov
Rafiq Hüseyn oğlu
1961-ci il
martın 18-də Bakı şəhərində dənizçi ailəsində
anadan olub. 1978-ci ildə Nərimanov rayonundakı
39 nömrəli orta məktəbi bitirib, 1979-cu ildə
hərbi xidmətə çağırılıb. 1981-ci ildə tank
qoşunlarında hərbi xidmətini başa çatdırdıqdan
sonra Azərbaycan Dövlət Universitetinə daxil
olub. 1987-ci ildə universiteti "əla"
qiymətlərlə bitirdikdən sonra Su Təsərrüfatı
İnstitutunda mühəndis vəzifəsinə təyin
edilib.1992-ci ildə Milli Ordu sıralarına
çağırılıb və cəbhəyə yollanıb. O, Ağdərə
rayonunun erməni işğalçılarından təmizlənməsində
yaxından iştirak edib. Baş leytenant rütbəsinə
yüksələn Rafiq aparılan bütün döyüş
əməliyyatlarında xüsusi fədakarlıq göstərib.
R.Nəsrəddinov 1992-ci il sentyabrın 6-da Ağdərə
rayonunun Qızılqaya kəndində gedən qeyri-bərabər
döyüşdə son nəfəsinədək vuruşub və
qəhrəmancasına həlak olub.
Ailəli idi.
İki övladı var.
Azərbaycan
Respublikası Prezidentinin 16 sentyabr 1994-cü
il tarixli 203 nömrəli Fərmanı ilə baş leytenant
Nəsrəddinov Rafiq Hüseyn oğlu ölümündən sonra
Azərbaycanın Milli Qəhrəmanı adına layiq
görülüb.
Bakı
şəhərində Şəhidlər xiyabanında dəfn olunub.
Təhsil aldığı 39 nömrəli orta məktəb onun adını
daşıyır. Məktəbdə büstü qoyulub. Yaşadığı
binanın önünə xatirə lövhəsi vurulub.
 Nəcəfov
Yunis İsa oğlu
1967-ci il
avqustun 31-də Kəlbəcər rayonunda anadan
olub.1985-ci ildə Goranboy rayonunun Qarqucaq
kənd orta məktəbini bitirib. Bakı Hərbi
Komandirlər Məktəbinə daxil olub. İkinci kursdan
sonra təhsilini Çelyabinsk Tank Məktəbində davam
etdirib. 1989-cu ildə leytenant rütbəsi aldıqdan
sonra oradakı hərbi hissələrdən birində qulluq
etməyə başlayıb. 1990-cı ildə Bakıya gələrək
Biləcəri Dəmiryol İdarəsində çalışıb. Yunis
1991-ci ildə könüllü olaraq cəbhəyə yollanıb.
701 nömrəli hərbi hissədə bölük komandiri kimi
xidmətə başlayıb. Kərkicahan, Malıbəyli
kəndlərinin, Şuşa şəhərinin erməni
işğalçılarından müdafiəsində iştirak edib. O,
bir leytenant kimi bütün döyüşlərdə üzərinə
düşən vəzifələri məsuliyyətlə yerinə yetirib.
Y.Nəcəfovun
son döyüşü Kəlbəcərin kəndlərinin müdafiəsi
zamanı olub. 1992-ci il avqustun 24-də həmin
kəndlərdə erməni işğalçılarına qarşı gedən
gərgin döyüşlərdə qəhrəmancasına həlak olub.
Azərbaycan
Respublikası Prezidentinin 7 dekabr 1992-ci il
tarixli 350 nömrəli Fərmanı ilə baş leytenant
Nəcəfov Yunis İsa oğlu ölümündən sonra
Azərbaycanın Milli Qəhrəmanı adına layiq
görülüb.
Goranboy
rayonunun Qarqucaq kəndində dəfn olunub.
Goranboy rayonunda və Biləcəri qəsəbəsində büstü
qoyulub.
 Nəcəfov
Fəxrəddin Vəliyəddin oğlu
1967-ci il
martın 31-də Bakı şəhərində anadan olub. 1984-cü
ildə paytaxtın Nəsimi rayonundakı 19 nömrəli
orta məktəbi bitirib və Bakı Çini Qablar
Zavodunda əmək fəaliyyətinə başlayıb. Bir il
sonra hərbi xidmətə çağırılıb. Arxangelsk
vilayətində xidmətini yerinə yetirdikdən sonra
Vətənə qayıdıb. DİN-in Yanğından Mühafizə
İdarəsində işə qəbul olunaraq, 1988-ci ildə
nazirliyin təqdimatı ilə Xarkov Yanğından
Mühafizə Ali Hərbi Məktəbinə göndərilib.
Fəxrəddin təhsilini başa çatdırdıqdan sonra
1990-cı ildə 14 nömrəli Yanğından Mühafizə
İdarəsində qarovul rəisi vəzifəsinə təyin
olunub. 1991-ci ildə Vətənin müdafiəsi üçün
könüllü olaraq Qarabağ cəbhəsinə yollanıb. İlk
döyüşə Goranboy rayonundan başlayan Fəxrəddin
1992-ci ildə Ağdam cəbhəsində hərbi hissələrdən
birinə bölük komandiri təyin edilib. Ağdamın
Canyataq və Gülyataq kəndlərində gedən
döyüşlərin birində öz dəstəsi ilə mühasirəyə
düşsə də, yüksək taktika nəticəsində mühasirədən
çıxıb.
F.Nəcəfov
1992-ci il sentyabrın 4-də Ağdərənın Çıldıran
kəndi istiqamətində gedən döyüsdə qəhrəmancasına
həlak olub.
Azərbaycan
Respublikası Prezidentinin 6 noyabr 1992-ci il
tarixli 290 nömrəli Fərmanı ilə Nəcəfov
Fəxrəddin Vəliyəddin oğlu ölümündən sonra
Azərbaycanın Milli Qəhrəmanı adına layiq
görülüb.
Bakı
şəhərində Şəhidlər xiyabanında dəfn olunub.
Nəsimi rayonundakı 266 nömrəli orta məktəb onun
adını daşıyır. Məktəbin həyətində büstü
qoyulub.
 Niftəliyev
Cəmil Səmədxan oğlu
1968-ci il
oktyabrın 5-də Yardımlı rayonunun Şəfəqli
kəndində anadan olub. Orta təhsilini paytaxtın
Qaradağ rayonundakı 233 nömrəli məktəbində başa
çatdıraraq, 1986-cı ildə hərbi xidmətə
çağırılıb. Dörd ay Özbəkistanda snayperlik kursu
keçdikdən sonra Əfqanıstana göndərilərək, atıcı
batalyonunda xidmət edib. Döyüşlərdə göstərdiyi
şücaətə görə medal və fəxri fərmanlarla təltif
edilib. 1989-cu ildə ordudan tərxis olunub
Vətənə döndükdən sonra DİN-in Səbail Rayon
Yanğından Muhafizə İdarəsində çalışmağa
başlayıb. Ermənilər torpaqlarımıza basqın
etdikləri zaman C.Niftəliyev də silaha
sarılaraq Vətənin müdafiəsinə qalxıb. 1992-ci il
martın 10-da Ağdam bölgəsində gedən döyüşlərdə
erməni işğalçılarına qarşı rəşadətlə vuruşub.
C.Niftəliyev 1992-ci il martın 29-da Ağdamın
Şelli kəndində gedən ağır döyüşlərdə
qəhrəmancasına həlak olub.
Azərbaycan
Respublikası Prezidentinin 8 oktyabr 1992-ci il
tarixli 264 nömrəli Fərmanı ilə Niftəliyev Cəmil
Səmədxan oğlu ölümündən sonra Azərbaycanın Milli
Qəhrəmanı adına layiq görülüb.
Bakı
şəhərində Şəhidlər xiyabanında dəfn olunub.
Vaxtilə təhsil aldığı 233 nömrəli orta məktəb və
Yanğından Mühafizə İdarəsinin yanğınsöndürən
gəmisi Milli Qəhrəmanın adını daşıyır.
Milli Qəhrəmanlar Beynəlxalq İnformasiya
Mərkəzinin materialları əsasında
hazırladı: Ədalət DAŞDƏMİRLİ |
