|
Artıq ali və orta ixtisas təhsili
müəssisələrində tədris ilinin ən məsul dövrü
başa çatmaqdadır. Qış imtahan sessiyasının
həyəcan dolu anlarını yaşayan tələbələr bu
günlərdə bilik və bacarıqlarını nümayiş
etdirirlər. Keçilən dərslərə daim hazırlıqlı
gələn, hər zaman yüksək bilik səviyyələri ilə
seçilən tələbələr, təbii ki, imtahanlardan da
alnıaçıq, üzüağ çıxırlar.
Bəs ötənilki qəbul imtahanlarında ən yüksək
nəticə göstərərək 700 bal toplayan tələbələr ilk
imtahan sessiyasını necə başa vururlar?
Bu suala aydınlıq gətirmək məqsədilə onların bir
neçəsi ilə görüşüb söhbət etsək də, digərləri -
Qafqaz Universitetinin tələbələri ilə görüşmək
istəyimiz baş tutmadı. Məlum oldu ki, onlar
universitetin təhsildə fərqlənən bir qrup
tələbəsi ilə birlikdə Türkiyə Respublikasına
istirahətə göndəriliblər. Elə bu faktın özü
qəbul imtahanlarında qazanılan böyük uğurun
təsadüfi olmadığını bir daha sübut edir. Bu
səbəbdən həmin tələbələrin təhsil aldığı Dil
hazırlığı fakültəsinin müdiri İsa Dağla əlaqə
saxlamalı olduq.
Qafqaz Universitetinin Dil hazırlığı
fakültəsinin müdiri İsa Dağın verdiyi məlumata
görə, 700 bal toplayan tələbələrin dördü də
Mühəndislik fakültəsinə qəbul olunub. Həmin
fakültədə tədris tamamilə ingilis dilində
aparıldığından onlar bu tədris ilində yalnız dil
hazırlığı ilə məşğul olur, dili mükəmməl öyrənir
və incəliklərinə dərindən yiyələnirlər. Qeyd
etmək lazımdır ki, fakültədə bir neçə istiqamət
- ingilis dilinin qrammatikası, danışıq dili və
yazı üzrə bilik və bacarıqların dərindən
mənimsənilməsi tələb olunur.
 Esmira
BAXŞƏLİYEVA
Azərbaycan Tibb Universitetinin
müalicə-profilaktika fakültəsində təhsil alıram.
Semestr ərzində dərsə cavab, davamiyyət və
sərbəst işlər üçün nəzərdə tutulan maksimum 50
balı toplamışam.
Mən artıq 6 fəndən imtahan verərək ən yüksək "A"
- balı almışam. 7-ci - sonuncu imtahanım isə
tibb tarixi fənnindən olacaq. İnanıram ki, bu
fəndən də yüksək bal alacam.
İstəyirəm ki, qəbul imtahanlarında topladığım
yüksək bala görə layiq görüldüyüm Prezident
təqaüdçüsü adını doğruldum. Bunun üçün
universitetimizdə hər cür şərait var. Burada
yüksək bilikli müəllimlər dərs deyir, bütün
mühazirələr maraqlı keçir. Mən də bu şəraitdən
maksimum istifadə edərək semestr imtahanlarına
çox ciddi hazırlaşmışam. İstəyimə nail olacağıma
əminəm.
 Aydan
HƏSƏNOVA
Azərbaycan Tibb Universitetinin
müalicə-profilaktika-2 fakültəsinin tələbəsiyəm.
Prezident təqaüdçüsüyəm. İndi artıq qış imtahan
sessiyamız sona yaxınlaşır. Mən dərsə cavab,
davamiyyət və müstəqil iş üzrə maksimum balı
toplamışam. Eyni zamanda 7 imtahandan 6-nı
uğurla verərək hər birindən 50 bal toplamış,
"A" qiyməti almışam. Yeddinci imtahanım isə
latın dili fənnindəndir. İnanıram ki, bu fəndən
də "A" qiyməti alacağam. Bütün bunları ona
görə inamla deyirəm ki, universitetdə bizə çox
təcrübəli müəllimlər dərs deyir. Keçdiyimiz hər
hansı mövzunu elə sinifdəcə öyrənirik. Praktik
dərslər də bizi qane edir. İmtahanlar zamanı ilk
vaxtlar həyəcanlansaq da cavablarımız
müəllimlərimizi qane edir. İnanıram ki, orta
məktəbdə aldığım yüksək qiymətləri ali məktəbdə
də doğruldacağam. Prezident təqaüdçüsü adımı
sonuncu kursa kimi özümün yüksək biliyim və
bacarığımla yaşatmağa nail olacağam.
 Aygül
TANRIVERDİYEVA
Azərbaycan Tibb Universitetində müalicə işi
ixtisası üzrə təhsil alıram.
İndi həyəcan dolu semestr imtahanlarımız davam
edir. Mən 30 bal dərsə cavab, 10 bal davamiyyət
və 10 bal sərbəst işlər üçün olmaqla nəzərdə
tutulan maksimum 50 balı toplamışam.
7 imtahandan isə hələlik 6-nı vermişəm və
hamısından da maksimum bal toplamışam. Sonuncu
imtahanımız isə latın dili fənnindən olacaq. Bu
imtahanlardan da maksimum bal toplayacağıma
əminəm. Ona görə ki, həmin imtahanlara da çox
ciddi hazırlaşmışam.
Onu da deyim ki, hazırda mən Prezident
təqaüdçüsüyəm. Bu adı və qəbul imtahanlarında
topladığım ən yüksək - 700 balı doğruldacağıma
əminəm. Bütün bu məsuliyyəti dərindən dərk
edərək var qüvvəmlə çalışıram.
 Nəriman
MƏMMƏDLİ
Mühəndislik
fakültəsinin informasiya texnologiyaları və
sistemləri mühəndisliyi ixtisasını seçib. O,
burada təhsil aldığı bir neçə ay ərzində həm
dərslərə yüksək səviyyədə hazırlığı, həm də
səmimiyyəti ilə dostlarının və müəllimlərinin
böyük rəğbətini qazanıb.
Nəriman bu
semestri böyük uğurla başa vurub. Dil
hazırlığının ayrı-ayrı istiqamətləri üzrə yüksək
bilik səviyyəsi nümayiş etdirərək imtahanda 90
bal toplayıb. Təqdirəlayiq haldır ki, o, təhsil
aldığı 4 ay ərzində böyük əzmlə TOEFL
imtahanlarına da hazırlaşıb və bu sınağa girərək
92 bal toplayıb.
 İsmayıl
KAZIMOV
Universitetin
istehsalat və xidmət sahələrinin iqtisadiyyatı
və idarə edilməsi ixtisası üzrə təhsil alır.
İsmayıl ingilis dilini mükəmməl öyrənməyin
zəruri olduğunu yaxşı dərk etdiyindən dərslərinə
böyük məsuliyyətlə hazırlaşır. İsmayıl daim qrup
yoldaşları ilə sıx ünsiyyətdə olur,
diskussiyalarda fəal iştirak edir, hər zaman
öyrənməyə can atır. O, asudə vaxtlarının əksər
hissəsini kitabxanada keçirir, boş vaxtlarından
səmərəli istifadə etməyə çalışır. Bunun
nəticəsidir ki, ilk semestr İ.Kazımov üçün də
uğurla sona çatıb. İsmayılın biliyi ayrı-ayrı
göstəricilər üzrə 73 balla qiymətləndirilib.
 İlkin
MƏSİMOV
Mühəndislik
fakültəsinin istehsalat və xidmət sahələrinin
iqtisadiyyatı və idarə edilməsi ixtisasını
seçib. İlkin səmimi və çalışqan tələbədir. Keçən
aylar ərzində İlkinin aldığı "əla" qiymətlər
onun öz məqsədinə çatmaq üçün bütün qüvvəsini
səfərbər etdiyini göstərir. Təsadüfi deyil ki,
dil hazırlığı üzrə yüksək bilik və bacarıq
nümayiş etdirən İ.Məsimov imtahanda 85 bal
toplayıb.
 Günel
ABDULLAYEVA
Həmin
fakültənin kimya mühəndisliyi ixtisası üzrə
təhsil alır. Günel də seçdiyi ixtisasın layiqli
sahibi olmaq üçün ingilis dilini mükəmməl
öyrənməyin vacib olduğunu dərk edir. Buna görə
də çox oxuyur, öyrənir, daim tələbə yoldaşları
və müəllimlərindən faydalanmağa çalışır.
G.Abdullayeva elm sahəsində yenilik axtarışını
zəruri hesab edir, Azərbaycanda kimya sahəsində
tanınan alimlərin davamçısı olmağı arzulayır.
Günel
universitetdə təhsil aldığı aylar ərzində
öyrədilən bütün materialları dərindən mənimsəyib
və verilən tapşırıqların öhdəsindən bacarıqla
gəlib. Buna görə də nəticə onun üçün uğurlu
olub. Günel Abdullayevanın biliyi 86 balla
qiymətləndirilib.
Hicran ƏKBƏROVA,
Ədalət DAŞDƏMİRLİ |
