|
Çaylar geri
dönmədən öz məcrasında axaraq uzun bir məsafəni
qət edib mənsəbinə qovuşduğu kimi, insanlar da
Allah dərgahından onlara pay verilmiş ömür
yolunda yorulmadan addımlayırlar. Və hər bir
insan sevib-seçdiyi peşəsində fəaliyyət
göstərməklə yaşayıb arxada qoyduğu ötən illərdə
qazandığı nailiyyətləri, xalqına və vətəninə
verdiyi töhfələri ilə seçilib sayılır,
ictimaiyyət tərəfindən qəbul edilərək
sevilirlər.
 Belə
insanlardan biri, 40 ildən artıq respublikanın
müxtəlif mətbu orqanlarında aktuallığı ilə geniş
oxucu auditoriyası tərəfindən maraqla oxunan
publisist yazıları, oçerkləri, məqalə və
zarisovkaları dərc edilən, gənc jurnalistlərin
yetişməsində böyük əməyi olan, ömrünün 37 ilini
"Azərbaycan müəllimi" qəzetində çalışmış, 7
publisist kitabın müəllifi, Azərbaycan
Jurnalistlər Birliyinin üzvü, "Təhsil"
jurnalının baş redaktoru Malik Novruzov haqqında
söz açmaq niyyətindəyik.
Malik
Novruzovla 10 ilə yaxın "Azərbaycan müəllimi"
qəzeti redaksiyasında birgə işləmişik. Mən bölgə
müxbiri idim, o isə məsul katib. Uzun illər bir
sıra mətbu orqanlarında müxtəlif səpgili
yazılarla çıxış etsəm də, "Azərbaycan müəllimi"
qəzetinə bölgə müxbiri təyin olunandan sonra
sahə qəzeti olduğu üçün təhsil haqqında yazılar
yazmaqda çətinlik çəkirdim. Məsul katib kimi
bəzi məqalələrimdə nöqsanlar tapar, iradlarını
bildirər və bununla yanaşı tövsiyələrini də
əsirgəməzdi. Bir müddət işlədikdən sonra bu
qəzetin ab-havasını götürdüm. Məktəb, şagird,
müəllim, bir sözlə, tədrislə bağlı yazılar
yazmağa çətinlik çəkmədim. Və Malik müəllim
məqalələrimi tərifləməyə, məni ruhla işləməyə
sövq etdi.
Tale elə
gətirdi ki, onunla iki il bir kabinetdə oturmalı
olduq. Həmin iki il ərzində hər gün yaxından
ünsiyyətdə olduğumuz üçün onun zəngin daxili
aləminin, insana və insanlığa bəslədiyi
münasibətinin, sadəliyi və səmimiliyinin, bir
sözlə, yüksək insani keyfiyyətlərinin şahidi
oldum. Paxıllıq və tamah hissindən uzaq olan bu
insanın arzusu həmişə xeyirxahlıq olub. Ən böyük
amalı isə dostluğa sədaqəti, başqalarına kömək
əlini uzatmasıdır. Elə bu səbəblərdən onunla
aramızda olan yoldaşlıq münasibəti səmimi və
təmənnasız dostluğa çevrilmişdir.
Təsadüfi deyil
ki, Malik Novruzov "Təhsil" jurnalına baş
redaktor təyin ediləndən sonra bu mətbu
orqanında da onunla birgə işləməli olduq. Burada
da hər hansı istənilən işi mənə etibar etməsi
onun səmimiliyinin bariz nümunəsidir.
2011-ci il
yanvarın 5-də, beşgünlük bayram istirahətindən
sonra, elə bayram ovqatı ilə işə gəlirdim.
2010-cu ilin payızı anomal keçdiyi üçün hələ də
havalar soyumamışdı, hər tərəfdə yaz hərarəti
duyulurdu. Üç gün qabaq fasiləsiz yağan yağış
düzü-dünyanı yuyub təmizləmiş, körpə təbəssümü
qədər saf bir mənzərə yaratmışdı. Redaksiyaya
çatanda Malik müəllimin kresloda oturub dərin
xəyala daldığını gördüm. İki ay bundan qabaq
İrandan müalicədən qayıtmışdı. Rəngi, rufu hələ
indi-indi özünə gəlirdi. Əvvəlkinə nisbətən
gümrah görkəmi ətrafındakılara rahatlıq
gətirməklə bir arxayınçılıq yaradır. Saçı
çallaşmış, gümüşü rəng almış, sifətində insan
çöhrəsini nura qərq edən cizgilər görünürdü. Bu
hal isə həyatının barlı-bəhrəli, qızılı payız
fəslini yaşadığını, ömrünün müdrik çağına
qovuşduğunu büruzə verirdi. Fikirlər aləminə
qərq olduğu üçün gəlişimdən xəbər tutmamışdı.
Gözlərini məchul bir nöqtəyə dikib sanki nəyisə
götür-qoy edir, nəyinsə haqqında düşünürdü.
Bəlkə, uzun illərin arxasından boylanıb,
uşaqlığını, yeniyetməliyini, gənclik illərini
xatırlayır və ya bu gün tarixə dönmüş keçdiyi
ömür yolunu xəyal süzgəcindən keçirirdi. Bəlkə
də yaşayaraq arxada qoyduğu illərdə
qazandıqlarını və arzusunda olub əldə edə
bilmədiklərini götür-qoy edir. Və bəlkə də
mizan-tərəzi qurub bu dünyanın haqq-hesabını
çəkirdi. Dünyanın da ömrü uzun, yükü isə
ağırdır. Və bu yükü çəkib hesablamağa nə
mizan-tərəzinin gücü çatır, nə də düşünən,
fikirləşən insan beyni yönünə-yöndəminə qoya
bilir. Onu xəyal dünyasından ayırmaq istəməsəm
də, birdən gözləri mənə sataşdı. Qapı ağzında
sakitcə dayanıb ona baxdığımı gördü. Ayağa
qalxıb mehribanlıqla mənimlə görüşdü.
- Qapı ağzında
niyə dayanmısan? - deyə soruşdu.
- Romantik
görkəm alıb dərin xəyala dalmışdın, səni bu
şirin xəyalından ayırmaq istəmirdim.
- Hə, ömür quş
kimi ötür, bir də gözünü açıb görürsən ki, 60-ı
haqlamısan, 70 də qapını döyüb gəlməyə
hazırlaşır. Fevralın 1-i ad günümdür. 60 illik
yubileyim! - deyib əlini divardan asılmış
təqvimə uzatdı.
Gülə-gülə bəri
başdan onu təbrik etdim:
- Onsuz da
haqqında yubileyinlə bağlı məqalə
hazırlamalıyam, dəfələrlə demişəm, etiraz
etmisən. Oturaq, ötən günlərinə, yola saldığın
60 illik ömür yoluna bir işıq salaq, - dedim.
...Masa
arxasında üz-üzə oturub ona verdiyim suallara
rəğmən Malik müəllim bu gün nağıla dönmüş keçən
günlərini xəyalən yenidən yaşayır, ömründən ötən
illərin tarixə dönmüş həyat kitabının saralmış
səhifələrini vərəqləyir, bəzən sifətində qara
kölgələr görünür və bəzən də çöhrəsi nura qərq
olur, gözlərindən sevinc yağırdı. Bu isə keçdiyi
ömür yolunun şirinli, acılı günlərindən xəbər
verirdi. Beləliklə, Malik müəllimin iki saata
qədər vərəqlədiyi həyat salnaməsinin müəyyən
məqamlarını oxuculara təqdim edirik.
Malik Novruzov
1951-ci il fevralın 1-də Masallı rayonunun
Qəriblər kəndində dünyaya göz açıb. 1967-ci ildə
Masallı şəhər 2 nömrəli orta məktəbi bitirdikdən
sonra sənədlərini Azərbaycan Dövlət
Universitetinin jurnalistika fakültəsinə verib,
qəbul imtahanlarından lazım olan balı
toplamadığına görə müsabiqədən keçməyib. Ruhdan
düşməyən Malik arzusuna çatmaq, jurnalistikanın
sirlərinə yiyələnmək üçün o zaman Masallıda nəşr
edilən "Çağırış" qəzeti redaksiyasının
mətbəəsində mürəttib işləməyə başlayıb. Nəhayət,
1969-cu ildə qəbul imtahanlarını müvəffəqiyyətlə
verərək ADU-nun jurnalistika fakültəsinin əyani
şöbəsinə daxil olub. Universitetdə təhsil aldığı
illərdə respublikanın mətbu orqanlarında
müxtəlif mövzularda məqalələrlə çıxış edib.
1974-cü ildə bu ali təhsil ocağını başa
vurduqdan sonra "Azərbaycan müəllimi" qəzetinə
işə götürülüb. İşgüzarlığı, peşəkarlığı ilə
başqalarından seçilən Malik qısa müddət ərzində
irəli çəkilərək xüsusi müxbir, şöbə redaktoru və
məsul katib vəzifələrinə qədər yüksəlib. Qəzetin
bel sütunu olan məsul katib vəzifəsində 18 il
fasiləsiz işləyib. Bu mətbu orqanında işlədiyi
37 il müddətində pedaqoji iş təcrübəsini, təhsil
sistemində aparılan islahatları və yenilikləri
dəqiqliyi ilə ictimai mühitə çatdıraraq
Azərbaycan jurnalistikasının inkişafında xüsusi
rol oynamış, gənc jurnalistlərin yetişməsi üçün
əlindən gələni əsirgəməmişdir.
"Ürəkdə yanan
işıq", "Müəllim əməyinin izi", "Maarif
fədailəri", "Təhsilimizin uca insanları", "Günəş
məktəbdən doğur", "Müəllim ziyası - gələcəyin
aynası", "Məktəbə bağlı ömür" adlı publisist
kitabların müəllifidir.
Yaxşı işinə
görə müxtəlif illərdə
"Qızıl qələm"
media mükafatı, "Qabaqcıl təhsil işçisi" döş
nişanı, "Kamil sənətkar" ali jurnalist mükafatı,
Təhsil Nazirliyinin və Azərbaycan Jurnalistlər
Birliyinin bir sıra fəxri fərmanları və
diplomları ilə təltif olunub. 2010-cu ilin mart
ayında irəli çəkilərək Azərbaycan Respublikası
Təhsil Nazirliyinin orqanı olan "Təhsil"
jurnalına baş redaktor təyin edilib.
Ölkədə təhsil
sahəsində islahatların getdiyi, təhsilimizin
dünya təhsili sisteminə inteqrasiya olduğu bir
vaxtda jurnalın üzərinə düşən məsuliyyəti
dərindən dərk edən Malik Novruzov bütün
bacarığını Azərbaycan təhsilində görülən işlərin
təbliğinə sərf edir, aktuallığı ilə seçilən,
zamanın tələbinə uyğun, maraqlı yazıları
jurnalın səhifələrində dərc etdirir. Elə bunun
nəticəsidir ki, qısa müddət keçməsinə
baxmayaraq, jurnal geniş oxucu auditoriyasının
rəğbətini qazanmışdır.
Dünyanın ömrü
uzun, yükü isə ağırdır. Və bu ağırlığı
çiyinlərində mərdliklə daşıyanlar ömürlərini
xeyirxah işlərə sərf edir, vətəninin
çiçəklənməsi, xalqının tərəqqisi üçün
çalışırlar. Bu uzun və çətin, lakin mənalı yolun
yolçusu olan Malik müəllimi 60 yaşının tamam
olması münasibətilə təbrik edir, ona möhkəm
cansağlığı, sevinc və fərəh dolu illər
arzulayırıq.
Nizami MİRZƏ,
"Təhsil" jurnalının baş redaktor müavini,
yazıçı-publisist |
|
