|
 Novruzov
Ələsgər Xanlar oğlu
1949-cu il
avqustun 1-də Laçın rayonunun Kürdhacı kəndində
anadan olub. 1966-cı ildə kəndlərindəki orta
məktəbi bitirib və 1968-1970-ci illərdə əsgəri
xidmətdə olub. Hərbi xidmətini başa çatdırdıqdan
sonra 1971-ci ildə Şuşa Pedaqoji Texnikumuna
daxil olub. 1973-cü ildə texnikumu bitirərək
bədən tərbiyəsi (indiki fiziki tərbiyə) müəllimi
ixtisasına yiyələnib. 1979-cu ildə Xocalı
şəhərinə köçərək öz ixtisası üzrə müəllim
işləyib. 1988-ci ildə yaranan Xocalının Müdafiyə
Şurasının ilk beş üzvündən biri də Ələsgər olub.
Azğınlaşmış erməni işğalçılarına qarşı keçirilən
əməliyyatlarda o, həmışə fərqlənib. Eyni zamanda
Ələsgər 1992-ci il fevralın 25-dən 26-na keçən
gecə ermənilərin Xocalıya hücumu zamanı
soydaşlarımızın təhlükəsizliyini təmin etmək
üçün bütün bacarığı ilə vuruşub.
Ə.Novruzovu
düşmən həmin döyüşlər zamanı çox çətinliklə də
olsa əsir götürüb və işgəncə ilə qətlə
yetiriblər.
Ailəli idi. Üç
övladı var.
Azərbaycan
Respublikası Prezidentinin 25 fevral 1997-ci il
tarixli 553 nömrəlı Fərmanı ilə Novruzov Ələsgər
Xanlar oğlu ölümündən sonra Azərbaycanın Milli
Qəhrəmanı adına layiq görülüb.
Laçın
rayonunun Kürdhacı kəndində dəfn olunub.
 Nuriyev
Elnur Eyvaz oğlu
1975-ci il
avqustun 22-də Zəngilan rayonunun Cahangirbəyli
kəndində anadan olub. 1992-ci ildə kəndlərindəki
orta məktəbi bitirib. 1993-cü ildə Zəngilan
Rayon Hərbi Komissarlığı tərəfindən Milli Ordu
sıralarına hərbi xidmətə çağırılıb. Qısa müddət
sınaq-məşq toplantısı keçdikdən sonra döyüşlərdə
iştirak etmək üçün Füzuli bölgəsinə göndərilib.
Elnur sonra xidmət etdiyi hərbi hissədən Tərtər
bölgəsinə yollanıb. Qapanlı, Seysulan
kəndlərinin erməni işğalçılarından azad
edilməsində xüsusi döyüş əzmkarlığını nümayiş
etdirib. O, qəlbində Vətən sevgisi, torpaq
istəyi olan cəsur bir döyüşçü kimi komandirləri
tərəfindən verilən bütün döyüş tapşırıqlarını
ləyaqətlə yerinə yetirib. Döyüşçü yoldaşlarının,
dostlarının hörmətini, məhəbbətini
qazanıb.1994-cü ildə Gəncə şəhərinə göndərilib.
E.Nuriyev
1994-cü il Gəncə hadisələri zamanı döyüş
tapşırığını yerinə yetirərkən həlak olub.
Azərbaycan
Respublikası Prezidentinin 5 oktyabr 1994-cü il
tarixli 215 nömrəli Fərmanı ilə Nuriyev Elnur
Eyvaz oğlu ölümündən sonra Azərbaycanın Milli
Qəhrəmanı adına layiq görülüb.
Kürdəmir
şəhərində Şəhidlər xiyabanında dəfn olunub.
 Ocaqverdiyev
Sərxan Surxay oğlu
1967-ci il
iyulun 16-da Goranboy rayonunun Səfikürd
kəndində anadan olub. 1985-ci ildə Tatarlı kənd
orta məktəbini bitirdikdən sonra Xabarovsk
şəhərində hərbi xidmətdə olub. 1988-ci ildə
hərbi xidmətini başa çatdıraraq Vətənə qayıdıb
və Gəncə Maşınqayırma Texnikumuna daxil olub.
1991-ci ildə təhsilini müvəffəqiyyətlə başa
çatdıraraq Gəncə Maşınqayırma Zavodunda əmək
fəaliyyətinə başlayıb. Vətənini, xalqını,
torpağını sonsuz məhəbbətlə sevən Sərxan 1992-ci
ildə Goranboy özünümüdafiə batalyonuna üzv
yazılıb. Şəfəq, Zeyvə, Tap-Qaraqoyunlu
kəndlərinin müdafiəsi zamanı erməni
işğalçılarına qarşı gedən qanlı döyüşlərdə
bacarıqlı bir əsgər kimi igidliklər göstərib. O,
eyni zamanda düşmənə qarşı aparılan döyüş
əməliyyatları vaxtı komandirlərinin verdiyi
bütün tapşırıqları nümunəvi bir şəkildə yerinə
yetirib.
S.Ocaqverdiyev
1992-ci il mayın 5-də ermənilər Talış kəndinə
hücuma keçərkən həmin qanlı döyüşdə
qəhrəmancasına həlak olub.
Azərbaycan
Respublikası Prezidentinin 7 iyun 1992-ci il
tarixli 833 nömrəli Fərmanı ilə Ocaqverdiyev
Sərxan Surxay oğlu ölümündən sonra Azərbaycanın
Milli Qəhrəmanı adına layiq görülüb.
Goranboy
rayonunun Səfikürd kəndində dəfn olunub. Təhsil
aldığı Tatarlı kənd orta məktəbi onun adını
daşıyır. Goranboy rayonunda büstü qoyulub.
 Orucov
Vəzir Surxay oğlu
1956-cı il
dekabrın 26-da Tərtər rayonunun Xoruzlu kəndində
anadan olub. Orta təhsilini doğma kəndlərindəki
orta məktəbdə alıb. 1974-cü ildə Bakı Yüngül
Sənaye Texnikumuna daxil olub.1975-ci ildə hərbi
xidmətə çağırılıb. Vəzir 1977-ci ildə ordudan
tərxis olunduqdan sonra yarımçıq qalmış
təhsilini davam etdirib. O, 1984-cü ildə
Rusiyanın Arxangelsk vilayətinə köçüb. 1992-ci
ildə Vətənə dönərək mayın 4-də Tərtər
özünümüdafiə batalyonuna daxil olub. Sıravi
döyüşçü kimi mübarizəyə başlayan Vəzir batalyon
komandirinin müavini vəzifəsinə kimi yüksəlib.
V.Orucov torpaqlarımız uğrunda gedən döyüşdə
şücaət göstərib. Düşmənin bir çox "mühüm"
planlarını pozub. O, 1992-ci il sentyabrın 1-də
Çıldıran kəndi uğrunda gedən döyüşdə yaralanıb.
Müalicə olunaraq yenidən cəbhə bölgəsinə
qayıdıb.
V.Orucov
1993-cü il martın 22-də Ağdərənin Qlobus
yüksəkliyi uğrunda gedən ağır döyüşdə
qəhrəmancasına həlak olub.
Ailəli idi.
Bir övladı var.
Azərbaycan
Respublikası Prezidentinin 27 mart 1993-cü il
tarixli 495 nömrəli Fərmanı ilə Orucov Vəzir
Surxay oğlu ölümündən sonra Azərbaycanın Milli
Qəhrəmanı adına layiq görülüb.
Bakı şəhərində
Şəhidlər xiyabanında dəfn olunub.
 Paşayev
Baxşeyiş Xanəhməd oğlu
1936-cı il
mayın 1-də Ağdam rayonunun Əhmədavar kəndində
anadan olub. Yeddinci sinfi bitirdikdən sonra
Ağdam Kənd Təsərrüfatı Texnikumuna daxil olub.
1954-cü ildə texnikumu bitirərək Ağdam Atçılıq
Sovxozunda mexanizator işləməyə başlayıb.
1965-ci ildən sürücü kimi fəaliyyətə başlayan B.
Paşayev sonralar xalq hərəkatına qoşulub və tez
bir zamanda "Qarabağ Müdafiə Şahinləri"
dəstəsinin ən fəal döyüşçülərindən olub. Xramort
kəndinin erməni işğalçılarından təmizlənməsində
igidlik göstərib. Baxşeyiş mahir atıcı olmaqla
yanaşı, həm də gözəl kəşfiyyatçı kimi dəfələrlə
Fərrux, Aranzəmin, Naxçıvanik, Xanabad
kəndlərində kəşfiyyatda olub.
1992-ci il
iyulun 12-də Xanabad kəndinə hücuma keçən zaman
Baxşeyişin dəstəsi düşmənin 7 postunu ələ
keçirib. Gərgin keçən həmin döyüşdə B.Paşayev
qəhrəmancasına həlak olub.
Ailəli idi.
Doqquz övladı var.
Azərbaycan
Respublikası Prezidentinin 7 dekabr 1992-ci il
tarixli 350 nömrəli Fərmanı ilə Paşayev Baxşeyiş
Xanəhməd oğlu ölümündən sonra Azərbaycanın Milli
Qəhrəmanı adına layiq görülüb.
Ağdam
rayonundakı Şəhidlər xiyabanında dəfn olunub. |
