|
Xəbər
verdiyimiz kimi, yanvarın 27-də Təhsil
Nazirliyində geniş kollegiya iclası keçirilib.
 Kollegiya
üzvləri ilə yanaşı, Prezident
Administrasiyasından, Nazirlər Kabinetindən,
digər dövlət qurumlarından, YAP-dan
nümayəndələrin, millət vəkillərinin, Təhsil
Nazirliyi Aparatının məsul işçilərinin,
nazirliyin struktur bölmə rəhbərlərinin, ali
məktəb rektorlarının, orta ixtisas, ilk
peşə-ixtisas, bilavasitə nazirliyə tabe olan
ümumtəhsil müəssisələrinin direktorlarının,
rayon, şəhər təhsil şöbə müdirlərinin, tanınmış
ziyalıların və bəzi qeyri-hökumət təşkilatları
təmsilçilərinin iştirak etdikləri iclasda
"2010-cu ilin yekunları və 2011-ci ildə qarşıda
duran vəzifələr" mövzusunda məsələ müzakirə
edilib.
Azərbaycan
Respublikasının təhsil naziri, kollegiyanın
sədri Misir Mərdanov iclası açıb iştirakçıları
salamladıqdan sonra "2010-cu ilin yekunları və
2011-ci ildə qarşıda duran vəzifələr" mövzusunda
geniş məruzə-təqdimatla çıxış etdi.
Əvvəlki
illərdə olduğu kimi, 2010-cu ildə də ölkədə
təhsilin Azərbaycan Respublikasının Prezidenti
cənab İlham Əliyevin birbaşa diqqət və qayğısı
altında olduğunu qeyd edən nazir geniş faktik
materiallar, dərin təhlillər və müqayisələr
əsasında hazırlanmış təqdimatında öncə Nazirlər
Kabinetinin bu il yanvarın 14-də keçirilmiş
iclasında söylənilmiş bəzi fikirləri, ölkəmizin
sosial-iqtisadi inkişafı sahəsində ötən il
qazanılmış uğurları əks etdirən fakt və
rəqəmləri diqqətə çatdırdı. Bildirdi ki, ümumi
daxili məhsul 5 faiz, əhalinin pul gəlirləri
12,3 faiz artmış, yoxsulluğun səviyyəsi daha da
aşağı düşərək 9,1 faiz təşkil etmişdir. Ölkə
iqtisadiyyatına 15,5 milyard dollar vəsait
qoyulmuş, 51 milyon ton neft, 27 milyard kubmetr
qaz hasil edilmişdir.
 BMT-nin
2010-cu il üzrə İnsan İnkişafı Hesabatından bəzi
rəqəmləri də misal gətirən nazir qeyd etdi ki,
2005-ci illə müqayisədə Azərbaycan 34 pillə
irəliləyərək 169 ölkə arasında 101-ci yerdən
67-ci yerə yüksəlmiş, ölkəmiz "orta insan
inkişafı" qrupundan "yüksək insan inkişafı"
qrupuna daxil olmuşdur. Nazir bu irəliləyişdə
təhsilin də xüsusi çəkisi olduğunu söylədi və
bildirdi ki, hesabata əsasən hazırda
Azərbaycanda əhalinin savadlılıq səviyyəsi 99,5
faiz təşkil edir.
Sonra
təqdimatda ölkə Prezidentinin təhsilə qayğısını
əks etdirən faktlar və rəqəmlərə dair slaydlar
nümayiş olundu. Nazir qeyd etdi ki, Azərbaycan
Prezidenti və onun xanımı Mehriban Əliyeva
2010-cu il ərzində 16 yeni inşa olunmuş, əsaslı
təmir edilmiş təhsil müəssisəsində olmuş,
müəllim və təhsilalanlarla görüşmüşdür. Səfər
edilmiş müəssisələrin siyahısını iclas
iştirakçılarının diqqətinə çatdıran nazir bunu
Azərbaycan tarixində misli olmayan hadisə kimi
dəyərləndirdi.
Nazir bildirdi
ki, Azərbaycan Prezidenti cənab İlham Əliyev
tərəfindən ötən il ərzində təhsillə bağlı 37
sərəncam və 2 fərman imzalanmışdır.
"Ən yaxşı
müəllim" və "Ən yaxşı ümumtəhsil məktəbi"
müsabiqələrinin qaliblərinin mükafatlandırılması
haqqındakı Prezident sərəncamları üzərində bir
qədər geniş dayanan nazir həmin sərəncamlara
əsasən 50 məktəbə və 100 müəllimə pul
mükafatlarının verildiyini qeyd etdi,
müsabiqənin bəzi yekunlarından söz açaraq
qaliblərin bölgələr üzrə paylanmasını göstərən
cədvəlləri nümayiş etdirdi. Təhsil ocaqları və
müəllimləri bu yüksək yarışmada fəallıq
göstərən, heç iştirak etməyən və iştirak edib
qaliblər sırasına düşməyən şəhər və rayonların
adları çəkildi, bəzi müqayisələr aparıldı.
Nazir
təqdimatında 2010-cu ildə Prezidentin
sərəncamları ilə 411 təhsil işçisinin müxtəlif
orden və medallara, fəxri adlara layiq
görüldüyünü qeyd edib, bunu da ölkə başçısının
təhsilimizə qayğısının nəticəsi kimi
dəyərləndirdi. Qeyd olundu ki, Azərbaycan
Respublikası Nazirlər Kabinetinin fəaliyyətində
də təhsilin inkişafı əsas prioritetlərdən olmuş
və 2010-cu ildə hökumət tərəfindən təhsillə
bağlı 32 qərar imzalanmışdır. Həmin qərarlardan
28-i "Təhsil haqqında" Qanunun icrası ilə
bağlıdır. Nazir bu sənədlərin yüzlərlə
mütəxəssis və təhsil ekspertinin zəhməti
hesabına başa gəldiyini qeyd etdi.
Daha sonra
nazir dövlət büdcəsindən təhsilə ayırmaları,
təhsil büdcəsinin son üç ildəki inkişaf
dinamikasını əks etdirən slaydlara diqqəti
yönəldərək hər il dövlət büdcəsindən təhsilə
ayrılan xərclərin, investisiyaların artdığını
bildirdi. Qeyd etdi ki, 2010-cu ildə təhsilə
ayrılan xərclər 1,276 milyard manat təşkil
etmiş, 2011-ci ildə isə təhsilə 1,338 milyard
manat vəsait ayrılması nəzərdə tutulmuşdur ki,
bu da 2010-cu ildəkindən 61,3 milyon manat
çoxdur. İnvestisiyaların həcmi və Prezidentin
Ehtiyat Fondundan ayrılan xərclər 2010-cu ildə
80,4 milyon manat təşkil etmişdir. 2011-ci ildə
investisiyaların həcmi 86,3 milyon manat nəzərdə
tutulmuşdur.
Məruzə-təqdimatında təhsil naziri 2010-cu ildə
həyata keçirilən dövlət proqramları və layihələr
üzərində ətraflı dayanaraq qeyd etdi ki, son
illər Azərbaycan elmi surətdə əsaslandırılmış və
cənab Prezident tərəfindən təsdiq olunmuş
proqramlarla idarə olunur. Beynəlxalq qurumların
da qeyd etdiyi kimi, bu, ölkəmizin inkişafını
təmin edir. Təhsillə bağlı bu gün 16 dövlət
proqramının olduğunu deyən nazir, həmin
proqramların adlarını iclas iştirakçılarına
təqdim etdi.
Sonra təhsil
naziri hər bir təhsil pilləsi üzrə görülmüş
işlər barədə məlumat verdi. Öncə məktəbəqədər
təhsilə dair son 3 ilin statistikası diqqətə
çatdırıldı. Qeyd olundu ki, 2009-2010-cu tədris
ilində dövlət məktəbəqədər təhsil
müəssisələrinin sayı 1607, burada tərbiyə
olunanların sayı isə 103342 nəfər olmuşdur. Bu
müəssisələrdə 13408 pedaqoji işçi çalışmışdır.
2010-2011-ci tədris ilində isə məktəbəqədər
müəssisələrin sayı bir qədər artaraq 1624 olmuş,
uşaqların sayı isə müəssisələrdə olduğundan daha
çox artaraq 107954 təşkil etmişdir. Ölkə üzrə
məktəbəqədər təhsillə əhatə səviyyəsi 16,5
faizdir. Bununla belə, nazir özəl bağçalarda
artımın da çox olduğunu söylədi. Nümayiş olunan
cədvəldən göründü ki, bu müəssisələrin sayı bu
il ötən ildəkindən üç dəfədən çox artaraq 5-ə
qarşı 21 olmuş, uşaqların da sayında müvafiq
artım (275-ə qarşı 1005) qeydə alınmışdır. Bu
sahədə dövlət başçısı tərəfindən təsdiq olunmuş
proqram çərçivəsində 2010-cu ildə görülmüş işlər
haqqında məlumat verən nazir bildirdi ki, ötən
il ərzində 3 yeni uşaq bağçası tikilib
istifadəyə verilmiş, 7 müəssisə əsaslı təmir
olunmuş, 31 müəssisədə cari təmir işləri
aparılmış, 151 müəssisə avadanlıqlarla təmin
edilmişdir. Ötən il tikilmiş və əsaslı təmir
olunmuş uşaq bağçalarından fotogörüntülər
kollegiya iştirakçılarına təqdim olundu.
2010-cu ildə
məktəbəqədər müəssisələrin təlim vəsaitləri ilə
təminatı sahəsində də addımlar atıldığı və 53
adda təlim vəsaiti hazırlanaraq müəssisələrə
çatdırıldığı, YUNİSEF-in dəstəyi ilə beynəlxalq
məsləhətçi cəlb olunmaqla məktəbəqədər təhsilin
müasir tələblərə cavab verən yeni
kurikulumlarının hazırlanmasına başlandığını,
respublika üzrə 5 yaşlı uşaqların məktəbəqədər
təhsilə cəlb olunması üzrə məlumat bankının
yaradıldığı qeyd olundu.
Bakı şəhərində
5 yaşlıların məktəbəqədər təhsilə cəlbinin
2006-2011-ci illər üzrə artımını əks etdirən
cədvəl, məktəbəqədər təhsil müəssisələri, ölkə
üzrə yaşayış məntəqələri, məktəbəqədər yaşlı
uşaqlar və məktəbəqədər təhsilə cəlb olunanlarla
bağlı aparılmış təhlilin nəticələri, bu sahədə
mövcud problemlər və 2011-ci ildə görüləcək
işlər iclas iştirakçılarına təqdim olundu.
Bildirildi ki, hazırda ölkə üzrə bu sahədə 477
yeni təhsil müəssisəsinin inşasına, 863
müəssisənin əsaslı təmiri, bərpası və
gücləndirilməsinə ehtiyac var.
Sonra ümumi
təhsil pilləsi üzrə görülmüş və görüləsi işlər,
mövcud problemlər haqqında slaydlar vasitəsi ilə
kollegiya iştirakçılarına məlumat verildi. Nazir
öncə bu pilə üzrə təhsil müəssisələri haqqında
məlumatı əks etdirən cədvəli təqdim etdi.
Bildirdi ki, hazırda ölkədəki 4522 dövlət
ümumtəhsil müəssisəsində 1321091 şagird oxuyur,
həmin müəssisələrdə pedaqoji heyət üzvlərinin
sayı 159461 nəfərdir. Müəllimlərin sayının
əvvəlki illərlə müqayisəsinə diqqəti çəkən nazir
son 3 ildə (2008-2009-cu dərs ilində - 163.226;
2009-2010-da - 160161; 2010-2011 - 159461)
pedaqoji heyətin sayının azalmasına nail
olunduğunu söylədi. Eyni zamanda nazir son 1
ildə birinci siniflərə gedən şagirdlərin sayının
təxminən 1500 nəfər artdığını dedi.
Kollegiyada
gətirilən faktlardan göründü ki, ötən il
məktəblərin infrastrukturu da inkişaf edib.
2010-cu ildə 21996 yerlik 61 məktəb binası, 11
məktəb üçün 1578 yerlik əlavə korpuslar tikilib,
15 məktəb əsaslı təmir olunub. 356 məktəbdə cari
təmir işləri aparılıb, 6980 yerlik 25 məktəb
binasının tikintisinə başlanıb.
Məktəblərin
infrastrukturunun yeniləşdirilməsi sahəsində
Heydər Əliyev Fondunun xidmətlərini xüsusi qeyd
edən nazir Fond tərəfindən 2010-cu ildə 1100
yerlik 2 yeni məktəbin tikildiyini, Gürcüstanda
azərbaycanlılar yaşayan bölgələrdə 3 məktəb
binasının əsaslı təmir və bərpa edildiyini
söylədi. Yeni tikilmiş məktəblərin siyahıları və
onlardan fotogörüntülər nümayiş etdirildi.
Ümumtəhsil
məktəblərinin avadanlıqla təminatına toxunan
nazir 66 rayon üzrə 266 məktəbə 27414 parta,
2315 yazı lövhəsi, 4313 müəllim masası, 7662
müəllim stolu verildiyini, 115 məktəbin kimya,
114 məktəbin isə fizika laboratoriyaları ilə
təmin edildiyini söylədi. Eyni zamanda diqqəti
bu sahədə mövcud olan problemlərə də yönəldərək
bildirdi ki, aparılan araşdırmalara əsasən ölkə
üzrə qəzalı vəziyyətdə olan 262 məktəb üçün bina
tikilməsinə, 872 məktəbin əsaslı təmirə ehtiyacı
var. Ümumi təhsil sahəsində 2011-ci ildə
görüləcək işlər diqqətə çatdırıldı.
Təhsil naziri
təqdimatında kurikulum islahatı ilə bağlı
məlumat verərək bildirdi ki, artıq 2010-2011-ci
dərs ilində I-III siniflərdə tədris yeni fənn
kurikulumları üzrə aparılır, digər siniflərdə
isə bu işə növbəti illərdən başlanacaq. Bu
sahədə müvafiq işlər aparılır. Ötən il
monitorinq və qiymətləndirmə sahəsində xeyli iş
görülüb. Nazirlər Kabineti müvafiq konsepsiyanı,
təsdiq edib, kurikulum tətbiq olunan aşağı
siniflərdə ciddi iş aparılır. Nazir keçən il XI
siniflərlə yanaşı, IX siniflərdə də buraxılış
imtahanlarının mərkəzləşdirilmiş qaydada
keçirildiyini, əvvəllər ictimaiyyət tərəfindən
yaxşı qəbul edilməyən bu işin hazırda müsbət
qarşılandığını söylədi və ötənilki buraxılış
imtahanlarının nəticələri, fənlər üzrə imtahan
suallarının sayında edilmiş yeniliklərlə iclas
iştirakçılarını tanış etdi. Beynəlxalq
qiymətləndirmə üzrə aparılmış işləri diqqətə
çatdıraraq hələlik ölkəmizin 3 beynəlxalq
qiymətləndirmə proqramında iştirak etdiyini
söylədi.
Kollegiyada
2010-cu ildə ali məktəblərə qəbulun nəticələri
barədə söz açıldı. Qəbul imtahanlarında 0-100,
100-200, 200-300, 300-500, 500-700 bal toplayan
abituriyentlərin 2003-2010-cu illər üzrə faiz
şəklində ifadə olunmuş nəticələrini əks edirən
diaqramlar nümayiş olundu, onların illər üzrə
müqayisəsi aparıldı, aşağı bal toplayanların
sayının getdikcə azaldığı, əlaçıların
göstəricilərinin isə əksinə, artdığı, 600-dən
yuxarı bal toplayanların əvvəlki ilə nisbətən,
təxminən, 2 dəfə çox olduğu vurğulandı.
İstedadlı
şagirdlərlə işlə bağlı həyata keçirilən
tədbirlərə toxunan nazir bildirdi ki,
2010-2011-ci dərs ilində Gəncə, Mingəçevir,
Sumqayıt, Şirvan şəhərləri və Quba, Ağdaş, Şəki,
Lənkəran rayonlarının seçilmiş məktəblərinin
bazasında istedadlı şagirdlər üçün lisey sinfi
təşkil edilmişdir. Kollegiya iştirakçılarına
"Xüsusi istedada malik olan uşaqların
(gənclərin) yaradıcılıq potensialının inkişafı
üzrə Dövlət Proqramı (2006-2010-cu illər)" üzrə
görülmüş digər işləri, o cümlədən istedadların
seçimi, müsabiqələrin təşkili ilə bağlı həyata
keçirilmiş tədbirləri, onların nəticələrini,
istedadlı məktəblilərin dünya olimpiadalarında
qazandığı uğurları əks etdirən slaydlar da
nümayiş olundu və təhlil edildi.
Nazir Təhsil
Nazirliyi sistemində həyata keçirilməkdə olan
De-institutlaşdırma proqramının 2010-cu ildə
icra vəziyyəti və proqram üzrə 2011-ci ildə
görüləcək işlər barədə məlumat verərək bildirdi
ki, Nazirlər Kabinetinin 13 yanvar 2010-cu il
tarixli 5 nömrəli qərarı ilə Təhsil Nazirliyi
nəzdində De-institutlaşma və Uşaqların Müdafiəsi
İdarəsi yaradılmış, internat-məktəblərdə təhsil
alan, tərbiyə olunan uşaqların bioloji
ailələrinə qaytarılması istiqamətində ciddi
nəticələr əldə olunmuş, bir sıra digər dövlət
qurumları və beynəlxalq təşkilatlarla birgə
layihələrin həyata keçirilməsinə başlanmışdır.
Nazir proqram
çərçivəsində dövlət uşaq müəssisələrində
təlim-tərbiyə alan uşaqlar haqqında dəqiq
məlumatların toplanmasını, uşaq "qaynar xətt"
xidmətini bu sahədə atılan ən uğurlu addımlardan
saydı, proqram və layihələr üzrə işlərin 2011-ci
ildə də davam etdiriləcəyini söylədi.
Misir Mərdanov
dərslik siyasətini nazirliyin fəaliyyətində ən
mühüm istiqamətlərdən biri olduğunu söyləyərək,
ölkədə 1,5 milyona yaxın şagirdin pulsuz
dərsliklərlə təmin edilməsini Azərbaycan
Prezidentinin təhsilalanlara göstərdiyi qayğının
ən bariz ifadəsi kimi dəyərləndirdi.
Dərsliklərin hazırlanması və nəşrinə dair
statistik rəqəmlər diqqətə çatdırılaraq bu
sahədə ardıcıl iş getdiyi, dərsliklərin hər il
təkmilləşdirildiyi bildirildi.
Təqdimatda
ümumtəhsil məktəblərinin kadr təminatı
məsələsinə də toxunuldu, ucqar yerlərdə
kadrların çatışmaması, paytaxtda və bir sıra
şəhərlərdə isə əksinə, onların sıxlığı qeyd
edildi, ötən il Bakı şəhəri məktəblərində vakant
yerlərə müəllimlərin işə qəbulunun yeni
qaydasının tətbiq olunduğu, nəticədə 288
müəllimin işə qəbul edildiyi diqqətə çatdırıldı,
məktəb direktorlarının işə qəbul üçün də
müsabiqələrin təşkilinə başlandığı qeyd edildi.
Nazir məlumat verdi ki, 2010-cu ildə ucqar kənd
məktəblərinə həvəsləndirmə tədbirləri tətbiq
olunmaqla 800 nəfər pedaqoji kadr
göndərilmişdir.
Sonra
məktəbdənkənar təhsil sahəsi ilə bağlı statistik
rəqəmlər, həyata keçirilən tədbirlər haqqında
məlumatlar və yeni tikilmiş və təmir olunmuş
müəssisələrdən fotogörüntülər kollegiya
iştirakçılarının diqqətinə təqdim olundu. Nazir
bir qürur doğuran faktı xüsusi qeyd edərək
bildirdi ki, 1 yanvar 2011-ci il tarixinə orta
reytinq göstəricilərinə görə Azərbaycan dünyanın
ən güclü 10 şahmat ölkəsi siyahısına daxil
olmuş və 5-ci yerdədir. O, bu çox böyük uğurda
təhsil işçilərinin də əməyi olduğunu vurğuladı.
Ölkədə şahmat məktəbləri tikintisinin
statistikası, yeni şahmat məktəblərinin
şəkilləri nümayiş olundu.
Təhsil
sisteminin informasiyalaşdırılmasından da
təqdimatında söz açan nazir 2010-cu ildə bu
sahədə görülən işləri diqqətə çatdıraraq
bildirdi ki, "Elektron məktəb" layihəsinə ötən
il daha 4 təhsil müəssisəsi qoşulmuş, layihədə
iştirak edən 20 məktəbə 300 yeni kompüter, 336
ədəd netbuk verilmişdir. Müvafiq proqramın
icrası nəticəsində 64680 nəfər müəllim təlim
kurslarından keçmişdir. Sonra nazir
kompüter-şagird nisbəti, müəssisələrin İnternet
bağlantısı, kadrların İKT hazırlığı sahələrində
2005-ci ilədək və 2005-2007, 2008-2009,
2009-2010-cu illərdəki vəziyyəti əks etdirən
diaqrama dair slayda diqqəti yönəldib, 2005-ci
ildə kompüter-şagird nisbətinin 1:1000 olduğu
halda, 2010-cu ildə bu nisbətin 1:20-yə
çatdırıldığını söylədi.
Kollegiya
iclasında təhsilin idarə olunmasının məlumat
sistemləri haqqında da məlumat verən nazir
hazırda nazirliyin TİMS bazasında 1,4 milyon
şagird və 200 mindən artıq məktəb heyəti barədə
məlumat toplandığını, onların ilbəil
yeniləşdiyini, dəqiqləşdirildiyini dedi.
Sonra ilk
peşə-ixtisas, orta ixtisas təhsili müəssisələri
haqqında statistik məlumat, hər iki sahədə ötən
il görülən və bu il üçün planlaşdırılan işlər
kollegiya iştirakçılarının diqqətinə çatdırıldı.
Təqdimatın ali
təhsildən bəhs edən hissəsində nazir öncə bu
sistemdəki müəssisələr haqqında məlumat verdi,
sonra iki istiqamətdə - "Təhsil haqqında"
Azərbaycan Respublikasının Qanunundan irəli
gələn vəzifələr və "2009-2013-cü illərdə
Azərbaycan Respublikasının ali təhsil sistemində
islahatlar üzrə Dövlət Proqramı"nın icrası ilə
bağlı görülmüş və görüləcək işlərə diqqəti cəlb
etdi. Azərbaycan Respublikası Prezidentinin "Ali
təhsil müəssisələrində yeni maliyyələşmə
mexanizminin tətbiq edilməsi barədə" 10 fevral
2010-cu il tarixli fərmanının icrası
istiqamətində görülən işləri xüsusilə qeyd edən
nazir bu məqsədlə bir neçə sənədin hazırlanaraq
hökumət tərəfindən təsdiq olunduğunu,
2010-2011-ci tədris ilindən başlayaraq
Azərbaycan Respublikası ərazisində fəaliyyət
göstərən dövlət və özəl ali təhsil
müəssisələrində dövlət büdcəsinin vəsaiti
hesabına maliyyələşdirmənin dövlət sifarişi
əsasında həyata keçirildiyini, 51 ali təhsil
müəssisəsindən 35-nin dövlət sifarişinin yerinə
yetirilməsində iştirak etdiyini, bu məsələnin
müxtəlif dövlət qurumlarının və ali məktəblərin
iştirakı ilə bir neçə dəfə müzakirə olunduğunu,
ali məktəblərə bakalavr pilləsi üzrə qəbul
olunan 27612 tələbədən 9788 nəfərinin (35,4%)
hazırda dövlət sifarişi ilə, 17824 nəfərinin isə
(66,6%) ödənişli əsaslarla təhsil aldığını
diqqətə çatdırdı, dövlət sifarişi əsasında
tələbə qəbulunun ali məktəblər üzrə paylanmasını
göstərən cədvəllər nümayiş etdirildi, ali təhsil
sahəsində görülmüş işlər, mövcud problemlər qeyd
olundu, problemlərin aradan qaldırılması üçün
təkliflər səsləndirildi, görüləcək digər işlər
diqqətə çatdırıldı.
Məruzə-təqdimatının beynəlxalq əlaqələr, xaricdə
təhsil bölümlərində kollegiya sədri ölkəmizin 16
beynəlxalq təşkilatla sıx əməkdaşlıq əlaqələri
saxladığını, 2010-cu ildə bir sıra ölkələrlə
təhsil sahəsində əməkdaşlıq haqqında saziş
layihələrin hazırlandığını, bir sıra xarici
ölkələrə səfərlər edildiyini qeyd etdi,
Azərbaycanın ali məktəblərində təhsil alan
əcnəbi tələbələrin 1971, 1979-cu illər və son 12
ildə say dinamikasını, onların ölkələr üzrə
bölgüsünü, 2010-2011-ci tədris ilində xaricdə
dövlət xətti ilə təhsil alan azərbaycanlı
gənclərin ölkələr üzrə sayını, ixtisas sahələri
üzrə statistikasını və s. əks etdirən diaqramlar
nümayiş olundu. Diaqramlardan aydın oldu ki,
hazırda ölkəmizdə 6173 əcnəbi tələbə oxuyur,
dövlət xətti ilə xaricdə 789, o cümlədən proqram
çərçivəsində 583 nəfər gənc təhsil alır, onların
114 nəfəri artıq məzundur.
Təhsil naziri
kollegiyada 2010-cu ildə əlavə təhsil, ali
məktəb elmi sahələrində görülmüş işlər və
2011-ci ildə qarşıda duran vəzifələr barədə də
ətraflı məlumat verdi, müvafiq statistik
rəqəmlər gətirərək qeyd etdi ki, son illər
alimlərimizin nüfuzlu xarici jurnallarda dərc
olunan məqalələrinin sayı artıb.
Təqdimatın
sonunda 2010-cu ildə nazirliyə daxil olan
sənədlər haqqında da söz açıldı, onların daxil
olduğu təşkilat və rayonlar üzrə bölgüsünü əks
etdirən cədvəllər nümayiş olundu. Bildirildi ki,
il ərzində nazirliyə 51552 sənəd daxil olmuş,
7251 nəfər vətəndaş qəbul edilmişdir.
Təhsil
nazirinin diqqətlə dinlənilən təqdimatından
sonra mövzu ilə bağlı müzakirə aparıldı.
İclasda ilk
söz alan YAP sədrinin müavini-icra katibi Əli
Əhmədov təhsil naziri Misir Mərdanovun
təqdimatını yüksək qiymətləndirib, hesabatda
ötən il ölkəmizdə təhsil sahəsində əldə olunan
nailiyyətlər haqqında geniş informasiya
verildiyini bildirdi. Təhsilin Azərbaycanın
davamlı inkişafının kökündə dayanan çox
əhəmiyyətli amillərdən olduğunu söyləyən icra
katibi onun Azərbaycan Prezidenti cənab İlham
Əliyevin diqqət və qayğısı sayəsində ölkəmizin
strateji inkişafının vacib istiqamətlərindən
birinə çevrildiyini, son illər təhsilin
infrastrukturunun yeniləşdirilməsindən tutmuş
səviyyəsinin yüksəlməsinədək bütün sahələrdə
doğrudan da diqqətəlayiq nəticələr əldə
edildiyini vurğuladı. Ə.Əhmədov Təhsil
Nazirliyinin fəaliyyəti sayəsində Azərbaycan
cəmiyyətində təhsilə müasir yanaşma meyillərinin
özünü daha ciddi göstərməkdə olduğunu xüsusi
qeyd etdi. Bildirdi ki, təhsilin səviyyəsinin
yüksəlməsi, şagirdlərin yaxşı təhsil alması
məktəbin, digər təhsil qurumlarının
fəaliyyətinin keyfiyyətindən nə dərəcədə
asılıdırsa, bir o dərəcədə də bütövlükdə
cəmiyyətin təhsilə sağlam, düzgün və müasir
münasibəti ilə əlaqədardır. Yalnız müəllimlərlə
valideynlərin birgə fəaliyyət göstərməsi
nəticəsində təhsil sahəsində lazımi səviyyəni
əldə etmək mümkündür. Millət vəkili dövlətin
ayırdığı vəsaitlər hesabına və böyük zəhmət
nəticəsində xarici ölkələrdə təhsil almış
gənclərin ölkəmizdə işlə təmin olunması, onların
biliyindən, savadından, ümumi mədəni
səviyyəsindən Azərbaycanın inkişafı üçün
istifadə edilməsinə diqqətin artırılmasına böyük
ehtiyac duyulduğunu qeyd edərək, bu istiqamətdə
atılan addımları, xüsusilə də xaricdə təhsil
alan gənclərin işlə təmin olunması üçün dövlət
proqramının və ayrıca qurumun yaradılması
ideyasını dəstəklədiyini söylədi.
Çıxışının
sonunda ölkədə təhsil islahatlarının geniş
proqram əsasında uğurla həyata keçirildiyini
deyən Ə.Əhmədov bir neçə ildən sonra təhsilin
keyfiyyətinin daha da yüksələcəyinə, Azərbaycan
məktəblərində təhsil alan gənclərin ölkəmizin
inkişafını təmin edən vətəndaşlar kimi
yetişəcəyinə əmin olduğunu bildirdi.
Azərbaycan
Respublikası Milli Məclisinin sədr müavini Bahar
Muradova iclasda çıxış edərək artıq bir neçə
dəfədir ki, təhsil nazirinin təqdimatı ilə
keçirilən kollegiya iclaslarında iştirak
etdiyini, həmin iclasların hər birində də təhsil
sahəsində Azərbaycan Respublikasının Prezidenti,
Azərbaycan dövləti tərəfindən yeridilən siyasət,
bu siyasətin icrası və icra prosesində əldə
olunan uğur və nailiyyətlər, eləcə də problemlər
barədə çox dərin, faktlara söykənən, aydın və
şəffaf məlumatlar aldığını söylədi. Dedi ki,
Azərbaycan təhsilində bu gün sürətlə inkişaf
getdiyini bu kollegiya iclasında da əyani
şəkildə gördük. Azərbaycan Prezidentinin,
dövlətin bu sahəyə diqqət və qayğısı özünün
səmərəli və faydalı nəticələrini verir. Təhsil
sahəsində görülən işlərin gənc nəslin savadlı,
bilikli, yüksək səviyyədə təhsil almaqla
Azərbaycanın inkişafına xidmət göstərən
vətəndaşlar kimi formalaşmasına gətirib
çıxardığını, bütün bunların bir millət vəkili
kimi onu sevindirdiyini deyən vitse-spiker, ötən
il keçirilmiş parlament seçkiləri ərəfəsində
yerlərdə seçicilərlə keçirdiyi çoxsaylı
görüşlərində onların təhsilimizin mövcud durumu
haqqında çox gözəl fikirlər söyləmələrini
xatırlatdı və bunları təhsilimizdəki uğurlara
verilən yüksək qiymət kimi dəyərləndirdi.
B.Muradova diqqətə çatdırdı ki, Azərbaycan
parlamenti həyatın bütün istiqamətlərində, o
cümlədən təhsil sahəsində problemlərin həllinə
rəvac verən qanunvericilik bazasının
möhkəmləndirilməsi yönündə məqsədyönlü fəaliyyət
göstərir. O, kollegiya iştirakçılarını əmin etdi
ki, təhsilin problemləri, gündəlik fəaliyyəti
hər bir millət vəkilinin diqqət mərkəzindədir.
Onlar həmin
problemlərin həllini vətəndaşlardan heç də az
istəmirlər və əgər Milli Məclisin iclasında, bu
və ya digər tədbirlərdə təhsillə bağlı müəyyən
nöqsanlar, iradlar səslənirsə, bütün bunları
obyektiv tənqid, nöqsanların aradan
qaldırılmasına istək kimi qəbul etmək lazımdır.
O, iclas
iştirakçılarının nəzərinə çatdırdı ki, Milli
Məclisin builki planına elm siyasəti və ali
təhsil haqqında qanunların qəbul olunması daxil
edilib.
Çıxışının
sonunda B.Muradova təhsilimizdə böyük inkişaf
getdiyini bir daha vurğulayaraq görülən bütün
işlərin, habelə kollegiyada səsləndirilən
faktların ictimaiyyətə doğru, düzgün
çatdırılmasını zəruri saydığını bildirdi və
əhatəli məruzə-təqdimatına görə təhsil naziri
Misir Mərdanova təşəkkür etdi.
Azərbaycan
Həmkarlar İttifaqları Konfederasiyasının sədri,
millət vəkili Səttar Mehbalıyev də çıxışında
ölkə Prezidenti İlham Əliyevin qayğısı
nəticəsində təhsilimizdə böyük uğurlar əldə
edildiyini söylədi. Bildirdi ki, təhsilin bütün
sahələrində qazanılan uğurlar onun düzgün
istiqamətdə inkişaf etdiyini göstərir.
Təhsilin
hüquqi bazasının, məzmununun, proqram-metodik
təminatının yeniləşdirilməsi istiqamətində
aparılan işləri xüsusilə yüksək dəyərləndirən
Konfederasiya sədri Sovetlər Birliyi tərkibində
olduğu dövrlərdə Azərbaycanın özünün
qanunvericilik sənədlərinin olmadığı,
dərsliklərin, proqramların rus dilindən tərcümə
olunduğuna diqqəti yönəldərək bütün bünların
müstəqilliyimizin ilk illərində Təhsil Nazirliyi
qarşısında böyük problemlər yaratdığını, lakin
nazirliyin çox ağır və vaxt aparan bu işin
öhdəsindən layiqincə gəldiyini, son illər
müstəqil respublikamızda təhsil
qanunvericiliyinin formalaşdırılması sahəsində
çox böyük işlər görüldüyünü bildirdi.
S.Mehbalıyev
başçılıq etdiyi qurumun təhsilin inkişafı
yönündə atılan addımlarda, təhsil işçilərinin
əməyinin stimullaşdırılmasında, onları, habelə
şagirdləri, tələbələri həvəsləndirmək, daha
yaxşı oxumağa sövq etmək üçün keçirilən
tədbirlərdə, müsabiqə və olimpiadalarda yaxından
iştirak etdiyini diqqətə çatdırdı və bundan
sonra da belə işlərə fəal dəstək verəcəklərinə
iclas iştirakçılarını əmin etdi.
Kollegiya
iclasında çıxış edən Tələbə Qəbulu üzrə Dövlət
Komissiyasının sədri Məleykə Abbaszadə diqqəti
istedadlı gənclərə, xarici ölkələrdə təhsil
almış məzunlara dövlət səviyyəsində xüsusi qayğı
göstərilməsinin vacibliyinə yönəldərək bu
məqsədlə xüsusi proqramın hazırlanmasını zəruri
saydı.
M.Abbaszadə
yüksək oxumaq həvəsi ilə məktəbə gələn uşaqların
bu həvəslərinin bütün təhsil illəri boyu
saxlanması üçün orta məktəblərdə qiymətləndirmə
prosedurlarını təkmilləşdirməyin zəruriliyini
qeyd etdi. Bu baxımdan o, beynəlxalq
qiymətləndirmə prosedurlarında ölkəmizin
iştirakını çox vacib saydı və Təhsil
Nazirliyinin bu istiqamətdə atdığı addımları
təqdir etdi. Komissiya sədri eyni zamanda
ölkəmizdə ümumi qiymətləndirmə prosedurlarında
əsas götürülən kriteriyaların beynəlxalq
qiymətləndirmə üzrə kriteriyalara
uyğunlaşdırılmasını zəruri hesab etdi və
bildirdi ki, biz proqramlarımızı və təhsilin
məzmununu milli saxlamaqla müasirləşdirməliyik.
***
Kollegiya
iclasını yekunlaşdıran təhsil naziri Misir
Mərdanov iştirakçılara təşəkkür edərək əldə
olunan uğurlarda təkcə Təhsil Nazirliyinin
deyil, başda cənab Prezident İlham Əliyev
olmaqla hamının, bütün ölkə ictimaiyyətinin
böyük əməyi olduğunu bildirdi.
Yusif ƏLİYEV |
|
