|
 Bakıdakı
5 nömrəli orta məktəbdə metodiki işin təşkili
və həyata keçirilməsi ilə əlaqədar məktəb
metodik Şurasının yığıncağı keçirilib.
Yığıncaqda BPKİYİ-nin Təhsilin inkişafı və
idarəedilməsi kafedrasının, Bakı Şəhəri üzrə
Təhsil İdarəsinin nümayəndələri, paytaxtın
ayrı-ayrı orta məktəblərində işləyən 24 direktor
müavini və müəllimlər iştirak ediblər. Məqsəd
təhsil ocaqlarında təlimin keyfiyyətini
yüksəltmək, müəllimlər və məktəb rəhbərləri
arasında təcrübə mübadiləsi aparmaq olub.
Öncə məktəbin
ibtidai siniflər üzrə fənn metodbirləşməsinin
sədri Günel Musəvi fənn metodbirləşməsinin üzvü,
ibtidai sinif müəllimi Almaz Bayramova ilə birgə
"Fəal dərs necə qurulmalıdır" mövzusunda
təqdimat ediblər. G.Musəvi və A.Bayramova
bildiriblər ki, ölkədə uğurla həyata keçirilən
təhsil islahatı milli təhsil sisteminin
inkişafına yönəlib. Bu sistemin əsasını
demokratikləşdirmə, humanistləşdirmə,
humanitarlaşdırma, inteqrasiya və digər
prinsiplər təşkil edir. Bu prinsiplərə söykənən
təhsil sistemində uğurlu nəticələr əldə etməyin
yollarından biri də dərslərdə fəal təlim
metodlarından səmərəli və yaradıcı istifadə
etməkdir. Məlumdur ki, yeni metod və priyomlar
biliklərin müstəqil mənimsənilməsinə və
şagirdlərin yaradıcı fəaliyyətinə zəmin yaradır.
Bu prosesdə şagirdlər əməkdaşlıq etmək,
dialoqda fəallıq göstərmək və özünü realizə
etmək yollarını axtarıb tapmaq kimi
keyfiyyətlərə yiyələnirlər. Fəal təlimin
mahiyyəti ondan ibarətdir ki, biliklərin
verilməsi prosesində şagirdlər yaradıcı
təfəkkürlərini işə salır.
Sonra tarix
fənni üzrə metodbirləşmənin üzvü Rüxsarə
Rüstəmova "Ekskursiya təlim metodu kimi",
riyaziyyat - informatika fənn metodbirləşməsinin
sədri Jalə Abdulbəyova "Dərsdə şagirdlərin idrak
fəallığının yüksəldilməsi" mövzularında çıxışlar
ediblər.
Məktəbin
direktoru Nərminə Gündüzlü çıxışında qeyd edib
ki, istedadlı şagirdlərin potensial imkanları
üçün optimal şərait, ilk növbədə, müəllim
tərəfindən pedaqoji prosesdə yaradılmalıdır.
Müəllimlərlə şagirdlər arasında ünsiyyət həmişə
gözəl arzu və ümid qığılcımları oyatmalıdır...
Metodşuranın
işində iştirak edən BPKİYİ-nin Təhsilin təşkili
və idarəedilməsi kafedrasının müdiri Nisə
Cəlilzadə, Bakı Şəhəri üzrə Təhsil İdarəsi
Metodik Mərkəzinin direktor müavini Sitarə
Məmmədova, həmin mərkəzin Binəqədi - Nəsimi
bölməsinin müdiri Həvva Əsgərova və digər çıxış
edənlər də keçirilən metodşura haqqında öz
fikir və tövsiyələrini bildiriblər.
Şakir CƏFƏROV |
