|
Azərbaycan
Respublikasının Prezidenti yanında Dövlət
İdarəçilik Akademiyasında ixtisasartırma
kursunun növbəti buraxılışı başa çatıb.
"Təbiətdən
istifadə və ətraf mühitin mühafizəsinin dövlət
tənzimlənməsi" istiqaməti üzrə keçirilən kursda
icra hakimiyyəti orqanlarının, müvafiq nazirlik,
komitə və idarələrin rəhbər işçiləri iştirak
ediblər.
Kursun əsas
məqsədi "Azərbaycan Respublikasında ekoloji
cəhətdən dayanıqlı sosial-iqtisadi inkişafa dair
Milli Proqram"ının şərh edilməsi, ekologiya
sahəsində dövlət siyasəti: prioritetləri, həyata
keçirilmə mexanizmləri, dövlət ekoloji
nəzarətinin təşkili və onun həyata
keçirilməsinin normativ bazası, ətraf mühitin
mühafizəsinə dair beynəlxalq konvensiyalar,
onlara qoşulmağın Azərbaycan üçün əhəmiyyəti və
sair problemlərlə bağlı biliklərin
sistemləşdirilməsi, dinləyicilərə yeni
biliklərin verilməsidir.
Kursda Heydər
Əliyevin dövlət idarəçilik təcrübəsi, Azərbaycan
Respublikasının təbii sərvətləri, onun səmərəli
istifadəsi, qlobal iqlim dəyişmələri və onun
insan orqanizminə təsiri, torpaq, yerin təki,
meşə və flora problemləri və digər məsələlər
əhatə edilib.
Tədris müddəti
ərzində kursda Azərbaycan Respublikası ekologiya
və təbii sərvətlər nazirinin müavini Firdovsi
Əliyev, Dövlət Neft Şirkətinin I
vitse-prezidentinin müşaviri, professor Eldar
Şahbazov, Dövlət Torpaq və Xəritəçəkmə
Komitəsinin Torpaqların Uçotu və Monitorinqi
sektorunun müdiri Lətif Qasımov, Səhiyyə
Nazirliyinin əməkdaşları Ziyəddin Kazımov, İslam
Məhərrəmov və digər tanınmış alim-mütəxəssislər
dinləyicilər qarşısında ekologiyanın və
təbiətdən istifadənin müasir problemlərinə dair
müxtəlif mövzularda mühazirələrlə çıxış ediblər.
Kursun iştirakçıları Ekologiya və Təbii
Sərvətlər Nazirliyinin təhlükəli tullantıların
zərərsizləşdirilməsi üzrə Milli Mərkəzində
Abşeron çirkablı suların təmizlənməsi və dənizə
axıdılması stansiyasında təcrübədə olublar.
DİA-nın I
prorektoru professor Əlikram Abdullayev kursun
sonunda dinləyicilər qarşısında çıxış edib,
onlara gələcək işlərində uğurlar arzulamış və
kursu müvəffəqiyyətlə bitirdiklərinə görə
sertifikatlar təqdim edib.
Şakir CƏFƏROV |
