|
Fevralın 4-də
Gürcüstan Prezidenti Mixeil Saakaşvilinin anası,
Gürcüstandakı Beynəlxalq Qara dəniz
Universitetinin prorektoru, professor Giuli
Alasaniyanın rəhbərlik etdiyi nümayəndə heyəti
Azərbaycan Dillər Universitetində (ADU) bu ali
təhsil ocağının rektoru, Milli Məclisin
beynəlxalq münasibətlər və parlamentlərarası
əlaqələr komitəsinin sədri, professor Səməd
Seyidovla görüşmüşdür.
 AzərTAc
xəbər verir ki, görüşdə ölkələrimiz arasında
təhsil sahəsində əlaqələrin mövcud vəziyyəti və
bu sahədə əməkdaşlığın inkişafı yolları müzakirə
olunmuşdur.
S.Seyidov
rəhbərlik etdiyi ali təhsil müəssisəsinin
qazandığı uğurlar, burada son dövrlərdə açılmış
fakültə və şöbələr, dil mərkəzləri haqqında
qonaqlara məlumat vermişdir. ADU-da bir çox
xarici dillərin tədris olunduğunu, tələbələrin
bu dilləri mənimsəməklə yanaşı, həmin dilin
daşıyıcısı olan xalqların tarixini,
mədəniyyətini öyrəndiklərini qeyd edən S.Seyidov
universitetdə Qafqaz dilləri şöbəsinin fəaliyyət
göstərdiyini və burada gürcü dilinin
öyrənildiyini vurğulamışdır.
Rektor
bildirmişdir ki, şöbənin açılmasında əsas məqsəd
yalnız dillərin öyrədilməsi deyil, həm də həmin
dillərin mənsub olduğu xalqların mədəniyyətini,
adət-ənənələrini, tarixini dərindən bilən
mütəxəssislər yetişdirməkdir. Hazırda Prezident
İlham Əliyevin apardığı məqsədyönlü siyasət
nəticəsində Azərbaycan ilə Gürcüstan arasında
uğurlu siyasi və iqtisadi əməkdaşlığın bərqərar
olduğunu diqqətə çatdıran S.Seyidov bu
münasibətlərin təhsil sahəsində də inkişaf
etdirilməsinin vacibliyini vurğulamış, ADU-da
keçirilən görüşün bu sahədə mühüm rol
oynayacağına əminliyini ifadə etmişdir.
Professor
G.Alasaniya ölkəsinin Azərbaycanla bir çox
sahələrdə əməkdaşlıq etdiyini, təhsil sahəsində
də qarşılıqlı münasibətlərin
dərinləşdirilməsinin vacibliyini vurğulamışdır.
ADU-da gürcü dilinin tədrisinin təhsil və
əməkdaşlıq sahəsində böyük nailiyyət olduğunu
söyləyən G.Alasaniya universitetin təşəbbüsünü
müsbət qiymətləndirmiş, kollektivə uğurlar
arzulamışdır.
Sonra qonaqlar
ADU-nun informasiya resurs kompleksi, müxtəlif
dil mərkəzləri ilə tanış olmuşlar. |
