|
Landmark
Biznes Mərkəzində BMT İctimai İnformasiya
Departamentinin (UN DPI) ölkəmizdəki
nümayəndəliyi Azərbaycan Beynəlxalq Məktəbi
(TISA) və Bakı Oksford Məktəbi (BOS) ilə
birlikdə şagirdlər üçün növbəti Bakı BMT
Modelini təşkil etmişdir.
TISA-nın
direktoru Con Gillespay bildirmişdir ki,
Birləşmiş Millətlər Təşkilatı Modeli BMT-nin Baş
Assambleyasının və digər çoxtərəfli orqanlarının
canlı simulyasiyasıdır. Beynəlxalq təşkilatları
simulyasiya etmək ənənəsi hələ BMT-nin
yaranmasından əvvəl-1920-ci illərdə tələbələr
tərəfindən keçirilən Millətlər Liqası Modeli
vaxtından mövcuddur. BMT Modeli Proqramı
tələbələr tərəfindən aparılan həmin
simulyasiyanın davamıdır.
BMT Modelinin
ilk dəfə keçirilməsi haqqında dəqiq məlumatın
olmadığını qeyd edən C.Gillespay hüquq, hökumət,
biznes və incəsənət sahələrində fəaliyyət
göstərən müasir liderlərin bir çoxunun vaxtilə
BMT Modelinin iştirakçıları olduğunu vurğulamış,
tədbirin iştirakçılarına uğurlar arzulamışdır.
UN DPI-nın
ictimai informasiya üzrə mütəxəssisi Araz
Yusubov vurğulamışdır ki, bu il Bakı BMT
Modelində iştirak edən məktəblərin sayı üç dəfə
artmış, şagirdlərin sayı isə 100-ü keçmişdir.
Bugünkü tədbirdə Bakıdakı 16 məktəbin şagirdləri
müxtəlif ölkələri təmsil edəcək, digər
nümayəndələrlə danışıqlar apararaq "İfrat
yoxsulluğun aradan qaldırılması və həyat
standartlarının yüksəldilməsi üçün İnternetin
idarə və istifadə olunması" mövzusunda ümumi
qətnamə hazırlamağa çalışacaqlar. A.Yusubov
demişdir ki, ingilis dilində keçirilən tədbir
BMT-nin müxtəlif üzv dövlətlərini təmsil edərkən
şagirdlərin ünsiyyət qurmasına, müzakirələr
aparmasına, onların siyasi və sosial məsələlər
üzrə biliklərinin artırılmasına kömək məqsədi
daşıyır. Eyni zamanda məktəblilər problem üzrə
təmsil etdikləri 96 ölkənin mövqeyi və
danışıqlar aparma strategiyaları ilə tanış olur,
ingilis dili bacarıqlarını inkişaf etdirirlər.
Tədbirdə ABŞ
səfirliyinin ictimaiyyətlə əlaqələr şöbəsinin
müdiri Terri Devidson "İfrat yoxsulluğun aradan
qaldırılması və həyat standartlarının
yüksəldilməsi üçün İnternetin idarə və istifadə
olunması" mövzusunda məruzə ilə çıxış etmişdir.
Mövzu
ətrafında müzakirələr aparılmış, suallar
cavablandırılmışdır.
Şagirdlər öz
ölkələrinin mövqeyindən çıxış edərək, mövzuya
dair ümumi qətnamə hazırlamağa çalışmışlar.
Qətnamə səsvermə yolu ilə qəbul olunmuşdur.
Sonda tədbirdə
iştirak edən bütün şagirdlərə və məktəblərə
YUNİSEF-in sertifikatı verilmişdir.
AzərTAc |
