|
Fevralın 11-də
Bakıdakı 132-134 nömrəli Təhsil Kompleksində
"Təhsilin əsasları" fənni üzrə təlim kursu
keçmiş mütəxəssislərə sertifikatlar təqdim
edildi. Bu münasibətlə keçirilən mərasimdə
təhsil naziri Misir Mərdanov iştirak edirdi.
 Tədbirdə
öncə kursun rəhbəri, Təhsil Nazirliyinin aparıcı
məsləhətçisi Afət Süleymanova "Təhsilin
əsasları" fənnini tədris edən bir qrup müəllimin
cəlb olunduğu növbəti treninqin məqsədi, 3
həftəlik praktik təlim kursu dövründə
müdavimlərin apardıqları tədqiqat yönümlü işlər
barədə məlumat verdi. Qeyd olundu ki, uzun illər
ölkəmizdə pedaqoji kadr hazırlığında nəzəri
biliklərin öyrədilməsi ilə kifayətlənilmiş,
nəticədə gənc müəllim öyrətməyin sirlərinə bələd
olmadan pedaqoji fəaliyyətə başlamışdır. Lakin
bu gün, təhsilə yeni tələblər verildiyi bir
zamanda, "işləyə-işləyə öyrənər" yanaşması özünü
doğrultmur. İndi sinfə daxil olduğu ilk gündən
pedaqoji fəaliyyətini müvəffəqiyyətlə qura
bilməsi üçün müəllimin mühüm nəzəri biliklərlə
yanaşı, praktik bacarıqlara yiyələnməsi və
təcrübəyə malik olması vacibdir. Bu səbəbdən də
"Təhsilin əsasları" fənninin tədrisinə ehtiyac
yaranmış və Təhsil Nazirliyinin 19 avqust
2009-cu il tarixli əmri ilə 3 ali təhsil
müəssisəsinin (Azərbaycan Dövlət Pedaqoji
Universiteti, Azərbaycan Müəllimlər İnstitutu,
Gəncə Dövlət Universiteti) bakalavr pilləsində
bu iş pilot layihə olaraq tətbiq edilməyə
başlanmışdır. Tətbiq ərəfəsində "Təhsilin
əsasları" fənnini tədris edəcək müəllimlər
treninqlərdən keçirilmişdir.
A.Süleymanova
bildirdi ki, artıq iki ildir hər semestr
başlamazdan əvvəl ADPU, AMİ, onun filiallarının
və GDU-nun pedaqogika kafedrasının müəllimləri
müvafiq kurslara cəlb olunurlar. Hazırkı kursda
isə əvvəlki 3 semestrdə auditoriya şəraitində
öyrənilmiş məsələlər məktəbdə təcrübədən
keçirilmişdir. Təlim kursu 132-134 nömrəli
Təhsil Kompleksində təşkil olunmuş, təcrübə
zamanı məktəbdəki mövcud şərait, məktəb
rəhbərliyinin aparılan islahatlarla bağlı
məlumatlılıq səviyyəsi və ona münasibət,
məktəbin idarə edilməsində rəhbərliyin əldə əsas
tutduğu prinsiplər, məktəbdə kollektiv
üzvlərinin qarşılıqlı münasibətləri və
əməkdaşlığın səviyyəsi tədqiq edilmişdir.
Təcrübə zamanı habelə, məktəb şurasının,
direktorun, onun müavinlərinin, metodbirləşmə
sədrinin və sinif müəllimlərinin iş planları,
onların icrası yolları, icra müddətləri
araşdırma obyekti olmuşdur.
Təcrübə
müddətində həm də siniflərdə mövcud vəziyyət
araşdırılmış, bununla əlaqədar şagirdlərin
fiziki və fizioloji sağlamlığı, idrak səviyyəsi,
mənəvi-psixoloji, sosial vəziyyəti, hazırlıq
səviyyəsi, maraq və ehtiyacları və s.
öyrənilməsi istiqamətində də iş aparılmış,
məktəb rəhbərliyinə, müəllimlərə müvafiq
tövsiyələr verilmişdir.
Diqqətə
çatdırıldı ki, təcrübə zamanı müdavimlər 48 saat
dərs demiş, aparılan dərslərin məktəbin
müəllimləri ilə birlikdə müzakirəsi
keçirilmişdir.
Sonra kursda
iştirak etmiş və təcrübə müddətində aparılmış
tədqiqatlarda fəallıq göstərmiş müdavimlərdən
AMİ-nin müəllimi Alimə Həşimova məktəbin
şəraitinin öyrənilməsi, həmin institutun dosenti
Rəşid Cabbarov məktəb sənədlərinin
araşdırılması, AMİ-nin doktorantı Vüsalə
Quliyeva siniflərdəki vəziyyət, AMİ-nin Quba
filialının müəllimi Pərvanə Dadaşova şagirdlərin
əqli və psixoloji inkişaflarının vəziyyəti,
AMİ-nin Mingəçevir filialının müəllimi Səbinə
Quliyeva uşaqların vəziyyəti, inkişaf
dinamikası, Azərbaycan Dövlət Pedaqoji
Universitetinin dosenti Gülşən Novruzova
şagirdlərin maraqlarının müəyyənləşdirilməsi,
AMİ-nin Cəlilabad filialının müəllimi Eyvaz
Məmmədov müəllimlər tərəfindən fəaliyyətin
perspektiv və cari planlaşdırılması yönündə
görülmüş işlərin tədqiqatlarına həsr olunmuş
təqdimatlar etdilər.
AMİ-nin
Təhsilin idarəolunması və əlavə təhsil
kafedrasının müdiri, professor Ramiz Məmmədzadə
çıxışında Təhsil Nazirliyinin rəhbərliyi ilə
"Təhsilin əsasları" fənninin tədrisi
istiqamətində görülmüş işləri yüksək
qiymətləndirdi, bu kursun gələcək müəllimlərin
pedaqoji fəaliyyətə hazırlanmasında mühüm rol
oynadığını bildirdi. Təklif etdi ki, həmin
kursun təkcə ibtidai sinif müəllimlərinin deyil,
fənn müəllimlərinin hazırlığında da tətbiq
olunması, məktəb rəhbərlərinin bu fənn üzrə
kurslara cəlb edilməsi, kursun tədrisi ilə bağlı
fəaliyyətləri tənzimləmək və istiqamətləndirmək
məqsədi ilə Təhsil Nazirliyində müvafiq
bölmənin, bu mümkün deyilsə, AMİ-də
laboratoriyanın yaradılması məqsədəmüvafiq
olardı. R.Məmmədzadə çıxışının sonunda kursun
təşkilində və keçirilməsində zəhməti olanlara
minnətdarlıq etdi.
Təhsil naziri
Misir Mərdanov mərasimdə çıxış edərək "Təhsilin
əsasları" kursunun tətbiqi istiqamətində
görülmüş işlərdən söz açdı, irəli sürülən
təkliflərə münasibət bildirdi. Nazir qeyd etdi
ki, müəllimin praktik hazırlığına yönəlmiş
kursun tətbiqini müasir dövrün müəllimlərə
verdiyi yüksək tələblər şərtləndirmiş, bu işə
hazırlıq prosesində xarici ölkələrin təcrübəsi
öyrənilmiş, ölkənin tanınmış təhsil
mütəxəssisləri və ekspertləri cəlb olunmuşdur.
Kursun pilot
layihə olaraq 3 ali məktəbdə tətbiqinə
başlandığı vaxtdan keçən il yarım ərzində xeyli
iş görüldüyünü vurğulayan nazir həmin işlərin
bundan sonra da davam etdirilməsini və sistemli
şəkildə aparılmasını, ona məsuliyyətlə
yanaşılmasının vacibliyini diqqətə çatdırdı.
Nazir "Təhsilin əsasları" fənnindən dərs deyən
müəllimlər üçün təşkil olunmuş praktikyönümlü
kursu təqdir edərək gələcəkdə belə kursların ən
yaxşı təchiz olunmuş məktəblərlə yanaşı digər
tədris ocaqlarında da təşkil olunmasını, bu
istiqamətdə maarifləndirmə işlərini
genişləndirməyi, kursun mövcud proqramının bir
daha nəzərdən keçirilərək müvafiq təkmilləşdirmə
işləri aparılmasını, kursda deyilmiş dərslərin
yazılaraq metodik vəsait kimi çap olunması və
müəllimlərin istifadəsinə verilməsini tövsiyə
etdi, bəzi məsləhət və tapşırıqlar verdi.
Sonra nazir
"Təhsilin əsasları" fənni üzrə kursu başa vurmuş
müəllimlərə sertifikatlar təqdim etdi.
Yusif ƏLİYEV |
|
