|
Azərbaycan
Dillər Universitetinin (ADU) Elmi Şurasının
2011-ci ildə ilk iclası keçirildi. İclası giriş
sözü ilə açan Elmi Şuranın sədri, ADU-nun
rektoru, professor Səməd Seyidov rəhbərlik
etdiyi ali təhsil ocağının ötən ildə gördüyü
işlər, bu işlərin respublika təhsil
ictimaiyyətində yaratdığı təəssürat, eləcə də
dövlət rəhbərliyi tərəfindən verilən
tapşırıqların vaxtında yerinə yetirilməsindən
danışdı. O bildirdi ki, bunun məntiqi nəticəsi
olaraq ötən ilin sonunda keçirilən rəy sorğusu
əsasında ADU "İlin universiteti" seçilib.
Bunun
səbəbinin universitetdə formalaşan
müəllim-tələbə münasibəti, müəllimə öz pedaqoji
biliyini çatdırmaq üçün yaradılan şərait,
tələbələrə öz fikir və bacarıqlarını ifadə etmək
üçün formalaşdırılan mühit olduğunu bildirən
rektor 2010-cu ili universitet üçün uğurlu və
mənalı il adlandırdı. O, əmin olduğunu bildirdi
ki, 2011-ci il də universitet üçün uğurlu
olacaqdır. Görüləcək işlərin, gerçəkləşdiriləcək
layihələrin çox olduğunu vurğulayan rektor
gələcəkdə yeni ixtisasların (Yaponşünaslıq,
Ərəbşünaslıq, Jurnalistika) açılacağını və bu
məsələyə Təhsil Nazirliyinin dəstək olacağına
inandığını dilə gətirdi. Rektor həmçinin qeyd
etdi ki, yeni kafedraların açılması,
kafedraların işlərinin səmərəli şəkildə təşkil
olunması, fakültələrdə islahatlar aparılması,
məqsədəuyğun olmayan və nəzərdə tutulan planları
doğrultmayan kafedraların bağlanması, təcrübəli
professor-müəllim heyətinin universitetdə
saxlanması prioritet istiqamətlərdəndir.
Təhsil
sistemində yeni maliyyələşmə sistemi,
tələbələrlə işin yüksək səviyyədə qurulması,
universitetin beynəlxalq əlaqələrindən də
danışan rektor qış imtahan sessiyasının da
uğurlu keçdiyini Elmi Şura üzvlərinin diqqətinə
çatdırdı.
ADU-nun Tədris
işləri üzrə prorektoru, professor Natiq Yusifov
qış imtahan sessiyası barədə məlumat verdi. Onun
dediyinə görə, qış imtahan sessiyası obyektiv
nəticələrlə müşayiət edildi. Rektorun
imtahanların şəffaf və obyektiv keçirilməsi
haqqında əmr imzaladığını xatırladan prorektor
əmrdən irəli gələn məsələlərin həlli üçün zəruri
addımların atıldığını bildirdi.
Yeni yaranan
Əlavə təhsil fakültəsinin dekanı, dosent Yasəf
Mürşüdov fakültə haqqında məlumat verdi. Əlavə
təhsilin istiqamətləri haqqında danışan
Y.Mürşüdov ixtisasartırma təhsili sahəsində olan
problemlər və perspektivlərdən də söz açdı.
ADU-nun
İctimaiyyətlə əlaqələr və mətbuat xidmətinin
rəhbəri Zeynab Kazımova isə hesabat xarakterli
çıxışında Mətbuat xidmətinin fəaliyyət
istiqamətlərinə toxundu. Elmi işlər üzrə
prorektor, professor Dünyamin Yunusov elmi hissə
tərəfindən daxil olan sənədlər haqqında danışdı.
ADU-nun Mətbuat xidməti |
