|
Fevralın 12-də Bakıdakı Ş.Əfəndizadə adına 13
nömrəli orta məktəbdə bu təhsil ocağının məzunu,
şəhid Məhəmməd Sabir oğlu Əhmədovun anım günü
münasibəti ilə tədbir keçirildi.
Tədbir iştirakçıları əvvəlcə şəhidlərin ruhunu
bir dəqiqəlik sükutla yad etdilər. Dövlət
himninin səslənməsi ilə başlayan tədbiri giriş
sözü ilə açan məktəbin direktoru Rəfiqə
Məmmədova erməni millətçilərinin tarixən
xalqımızın başına gətirdiyi müsibətlərdən
söhbət açaraq mənfur düşmənə qarşı mübarizədə
şəhid olmuş Məhəmməd kimi vətənpərvər qəhrəman
oğullarımızın heç vaxt unudulmayacağını, onların
xatirəsinin daim hörmətlə yad olunacağını
bildirdi.
Tədbirin aparıcıları 1970-ci il fevralın 12-də
Bakı şəhərində ziyalı ailəsində anadan olmuş
şəhid Məhəmməd Əhmədovun həyatı haqqında
qonaqlara məlumat verdilər. Bildirdilər ki, ilk
təhsilini Yasamal rayonunda yerləşən 13 nömrəli
orta məktəbdə almış M.Əhmədov Moskva
Poliqrafiya İnstitutuna daxil olmuş, sonradan
təhsilini Azərbaycan Dövlət Neft Akademiyasında
davam etdirmişdir. Ordu sıralarında xidmət edən
Məhəmməd 1994-cü ilin 12 fevral tarixində
Murovdağda torpaqlarımızın bütövlüyü uğrunda
gedən döyüşlərdə qəhrəmancasına şəhid olmuşdur.
Tədbirdə iştirak edən qonaqlar da şəhidlərimiz
haqqında danışdılar. Təhsil ocaqlarında belə
tədbirlərin keçirilməsini müsbət
qiymətləndirdilər.
Tədbirin sonunda məktəb kollektivi və qonaqlar
şəhid Məhəmməd Əhmədovun II Fəxri xiyabandakı
məzarını ziyarət etdilər.
Rəşad ZİYADOV |
