|
Tələbə Qəbulu
üzrə Dövlət Komissiyası (TQDK) Bakıda
2010-2011-ci tədris ili üçün ali təhsil
müəssisələrinə keçirilmiş qəbul imtahanlarının
elmi-statistik təhlilinə həsr olunmuş zona
müşavirəsi keçirmişdir.
 AzərTAc
xəbər verir ki, 276 nömrəli tam orta məktəbdə
təşkil olunmuş zona müşavirəsində Təhsil
Nazirliyi, Bakı Şəhəri üzrə Təhsil İdarəsinin
nümayəndələri, eləcə də Binəqədi, Xəzər,
Nərimanov, Nəsimi, Nizami, Qaradağ, Sabunçu,
Səbail, Suraxanı, Xətai, Yasamal, Şuşa,
Zəngilan, Xocalı və Xocavənd rayonlarının orta
ümumtəhsil məktəblərinin direktorları və
müəllimləri iştirak etmişlər.
Tədbirdə çıxış
edən təhsil naziri Misir Mərdanov Azərbaycan
Prezidenti İlham Əliyevin təhsilin inkişafına
daim böyük önəm verdiyini vurğulamışdır.
Ölkəmizdə təhsilin inkişafı üçün həyata
keçirilən tədbirlərdən, qazanılan uğurlardan
danışan nazir, eyni zamanda bu sahədəki mövcud
problemlərdən söz açmış, təhsil işçilərinə
tövsiyələrini vermişdir.
TQDK-nın sədri
Məleykə Abbaszadə 2010-2011-ci tədris ili üçün
keçirilmiş qəbul imtahanlarının elmi-statistik
təhlilinə dair məruzə etmişdir.
Qeyd
olunmuşdur ki, ötən il Bakıda orta ümumtəhsil
məktəblərini 22 min 449 şagird bitirmiş, onların
20 min 748 nəfəri attestat almışdır. Attestat
alanlardan 18 min 832-si qəbul imtahanlarında
iştirak etmişdir.
Qəbul
imtahanlarının nəticələrinə əsasən, şəhərin 8
min 475 məzunu (imtahanlarda iştirak edənlərin
45,00 faizi) tələbə adını qazanmışdır. Onlardan
3 min 51-i dövlət, 68-i özəl ali təhsil
müəssisələrinə dövlət sifarişi üzrə, 4 min 235-i
dövlət, 1121-i özəl ali təhsil müəssisələrinə
ödənişli təhsil forması üzrə qəbul olunmuşlar.
Bakı
məzunlarının 2060 nəfəri 500-dən, o cümlədən 550
nəfəri 600-dən yuxarı bal toplamışdır. Həmin
gənclərin ən çoxu Azərbaycan Dövlət İqtisad
Universiteti və Bakı Dövlət Universitetinə qəbul
olunmuşdur. Şəhərin məzunlarının qəbul
imtahanlarında topladıqları orta bal 264,473-ə
bərabərdir. Bu, respublika üzrə orta
göstəricidən 14,1 faiz yuxarıdır.
Paytaxt
məzunlarının yalnız 38,94 faizi 300-dən yuxarı
bal toplamışdır. Qəbul imtahanlarında şəhərin
316 məktəbinin məzunları iştirak etmişdir. 185,
209, 295, 324 nömrəli orta məktəblərin bir
məzunu belə ali təhsil müəssisəsinə qəbul
olmamışdır.
Respublika
üzrə yaxşı məktəblər sırasına bu il paytaxtın 72
nömrəli məktəb-liseyi, 287 nömrəli "Zəkalar"
liseyi, 147 nömrəli texniki-humanitar təmayüllü
liseyi, 264 nömrəli məktəb-liseyi,
Bağça-məktəb-lisey kompleksi, 22, 23, 25, 30,
34, 220 nömrəli məktəblər və digər təhsil
müəssisələri daxil olmuşlar.
Zona
müşavirəsində çıxış edən digər təhsil işçiləri
fikirlərini bildirmiş, mövzu ilə bağlı
müzakirələr aparılmışdır. |
|
