|
 Naxçıvan
Dövlət Universitetinin Beynəlxalq münasibətlər
və xarici dillər fakültəsində dünya şöhrətli
alim, tətbiqi riyaziyyat və informatikanın
inkişafına güclü təkan vermiş, qeyri-səlis
çoxluqlar və qeyri-səlis məntiq, imkanlar və
təqribi mühakimələr kimi nəzəriyyələrin
yaradıcısı Lütfi Zadənin anadan olmasının 90
illiyinə həsr olunmuş elmi konfrans keçirildi.
Tədbirdə giriş nitqi ilə çıxış edən ali məktəbin
rektoru, akademik İsa Həbibbəyli alimin elmi
nəticələrinin, nəzəriyyələrinin, ixtiralarının
və yeniliklərinin dünya şöhrətindən, Azərbaycan
xalqının onunla fəxr etməsindən danışdı.
Fizika-riyaziyyat fakültəsinin dekanı,
riyaziyyat elmləri üzrə fəlsəfə doktoru Tofiq
Nəcəfov "Lütfi Zadənin həyatı və elmi
fəaliyyəti" adlı məruzəsində alimi dünya
miqyasında tanıdan qeyri-səlis məntiq
nəzəriyyəsindən söz açdı. Vurğulandı ki, bu gün
dünyanın nüfuzlu şirkətləri foto və
videokameraların, paltaryuyan maşınların
istehsalında, avtomobillərin, qatarların, sənaye
proseslərinin idarə olunmasında azərbaycanlı
alimin adı ilə bağlı olan qeyri-səlis məntiq
texnologiyasından geniş istifadə edirlər.
Riyazi analiz kafedrasının müdiri, riyaziyyat
elmləri üzrə fəlsəfə doktoru, dosent Elşad
Ağayev "Lütfi Zadə dünya elminin inkişafında
mühüm rol oynamış elmi kəşflərin müəllifidir"
adlı məruzəsində alimin elm sahəsindəki
xidmətlərindən və fövqəladə nailiyyətlərindən,
çoxlu sayda mötəbər cəmiyyətlər və fondlar
tərəfindən layiq görüldüyü mükafatlardan
danışdı.
Ümumi riyaziyyat kafedrasının riyaziyyat
elmləri üzrə fəlsəfə doktoru, dosent Rövşən
Həsənov "Lütfi Zadənin qeyri-səlis çoxluqlar
nəzəriyyəsi qeyri-səlis məntiqin əsasıdır" adlı
məruzəsində dahi alimin qeyri-səlis məntiq
nəzəriyyəsinin ona şöhrət qazandırmaqla yanaşı
yeni riyaziyyatın əsasını qoyduğunu diqqətə
çatdırdı.
Sonda "Uzaq və yaxın Lütfi Zadə" adlı
sənədli filmə baxış oldu.
Nərmin CƏFƏROVA,
NDU-nun Mətbuat şöbəsinin əməkdaşı
|
