|
 Artıq
bir neçə ildir ki, Azərbaycan Müəllimlər
İnstitutunda görkəmli elm adamları, incəsənət
xadimləri ilə görüşlərin keçirilməsi ənənə
halını alıb. Bu günlərdə respublikanın xalq
artisti Nurəddin Mehdixanlının öz sənət dostları
- respublikanın xalq artisti Ramiz Novruz və
əməkdar artist Münəvvər Əliyeva ilə birlikdə
AMİ-də qonaq olması bu ənənənin davamıdır.
İnstitutun professor-müəllim heyəti və
tələbələrinin iştirakı ilə keçirilən tədbirdə
ilk öncə baş rolda Nurəddin Mehdixanlının
çəkildiyi "Cavad xan" filmindən fraqmentlər
nümayiş etdirildi. Sonra tədbiri giriş sözü ilə
institutun rektoru, millət vəkili, professor
Aqiyə Naxçıvanlı açaraq iştirakçıları və
qonaqları salamladı. Qeyd etdi ki, tarix boyu
Azərbaycanın incəsənət xadimləri mütərəqqi
fikirli ziyalılarla birlikdə milli azadlıq
hərəkatının ön cərgəsində getmiş, xalqın ağır
günlərində ona mənəvi dayaq olmuşlar. Teatr
xadimlərimiz oynadıqları rollarla xalqımıza
tarixi bilmək üçün yardım etmiş, onları tarixi
keçmişimizə hörmət bəsləməyə sövq etdirmiş və
yaşadığımız indiki zamanda da mənəviyyat, əxlaq,
insanlıq, Vətənə, millətə sədaqət ruhu
aşılamışlar. Onlar bu gün də qədim
mədəniyyətimizin dünyaya tanıdılmasında böyük
işlər görürlər.
Millət vəkili A.Naxçıvanlı Nurəddin
Mehdixanlının həyat və yaradıcılığından söz
açaraq onun romantik pafosa, coşqun daxili
temperamentə, gözəgəlimli səhnə görkəminə malik
bir aktyor olduğunu bildirdi. Qeyd etdi ki, elə
buna görə də o, mürəkkəb hadisələr burulğanında
mənəvi çarpışmalar keçirən, faciə tonlu,
dramatik xarakterli qəhrəman rollarını yüksək
məharətlə yarada bilir.
 Nurəddin
Mehdixanlının yaradıcılığı dövlətimiz tərəfindən
həmişə yüksək qiymətləndirilmişdir. O, 1986-cı
ildə Naxçıvan Muxtar Respublikasının əməkdar
artisti, 1998-ci ildə Azərbaycan Respublikasının
əməkdar artisti, 2002-ci ildə Azərbaycan
Respublikasının xalq artisti fəxri adlarına
layiq görülüb və həm də Prezident təqaüdçüsüdür.
Sonra qonaq alqışlarla səhnəyə dəvət edildi.
Tədbir boyu Nurəddin Mehdixanlının çəkildiyi
tamaşalardan və filmlərdən fraqmentlər
göstərildi. Görkəmli aktyor tələbələrin çoxsaylı
suallarını cavablandırdı və onların arzusunu
nəzərə alaraq şeir söylədi.
Aktyorun sənət dostları, eyni zamanda oynadığı
bir çox rollarda tərəf müqabilləri olmuş
respublikanın xalq artisti Ramiz Novruz və
əməkdar artist Münəvvər Əliyeva da, öz
növbələrində, aktyor haqqında ürək sözlərini
söylədilər. Onlar Nurəddin Mehdixanlının həm
sənət aləmində, həm də həyatda əsl dost,
məharətli aktyor və eyni zamanda gözəl ailə
başçısı, fədakar ata olduğundan ürəkdolusu
danışdılar. Qonaqlar çəkilişlər zamanı baş verən
asan və çətin məqamlardan da söhbət açdılar.
Sonda Nurəddin Mehdixanlı belə yüksək səviyyəli
görüşə görə AMİ-nin rektoru Aqiyə Naxçıvanlıya
öz dərin təşəkkürünü bildirdi. |
