|
 Martın
1-də Azərbaycan Müəllimlər İnstitutunda
Azərbaycan Tibb Universitetinin
professor-müəllim heyəti üçün "Təhsilin
əsasları" fənni bazasında hazırlanan biraylıq
təlim kursunun açılışı oldu. Məlumat üçün
bildirək ki, Azərbaycan Müəllimlər İnstitutunun
və Azərbaycan Tibb Universitetinin rektorları
arasında 2010-2011-ci və 2011-2012-ci tədris
illərində Tibb Universitetinin əməkdaşları üçün
"Təhsilin əsasları" və yeni təlim
texnologiyalarının tətbiqi" mövzusunda
ixtisasartırma təhsilinin təşkilinə dair
müqavilə imzalanıb. Müqaviləyə əsasən, iki il
müddətində AMİ-nin əməkdaşları tərəfindən
aparılacaq təlim kursunda ATU-nun
professor-müəllim heyəti pedaqoji, psixoloji və
metodik məsələlər haqqında məlumatlandırılmaqla
bərabər, "Təhsilin əsasları" fənnini də
öyrənəcək, təhsil fəlsəfəsi və təlim prosesi,
cəmiyyətin təhsil ehtiyacları və onların hüquqi
təminatı, təhsil sahəsində dövlət siyasəti,
təhsilin məzmunu və təlimin təşkilinin
elmi-nəzəri əsasları, təhsilin elmi-nəzəri
əsasları mövzularında dərslər keçəcəklər. Kursu
müvəffəqiyyətlə bitirən müdavimlərə
sertifikatlar təqdim olunacaq.
 Azərbaycan
Müəllimlər İnstitutunun əlavə təhsil üzrə
prorektoru, kursun rəhbəri Rahim Əzizov
açılışda çıxış edərək müdavimləri institutun
rəhbərliyi adından salamlayaraq onlara uğurlar
arzuladı. Son illər Azərbaycan Müəllimlər
İnstitutu və Azərbaycan Tibb Universiteti
arasında işgüzar əməkdaşlığın yarandığını deyən
Rahim müəllim görülən işlərin Azərbaycan
təhsilinin inkişafına, kadrların biliyinin
artırılmasına, peşəkarlıq səviyyəsinin
yüksəldilməsinə xidmət etdiyini söylədi.
Prorektor ali təhsil ocağında təlim kursunun
aparılması üçün hər cür şəraitin yaradıldığını,
ixtisasartırma təhsilinin yüksək elmi-metodik
səviyyədə təşkilinin təmin edilməsi üçün müəyyən
işlərin görüldüyünü deyərək məşğələlər zamanı
müasir təlim üsullarından, həmçinin tədris
prosesində İKT-dən istifadə olunacağını
bildirdi. O, ilk dəfə olaraq belə bir təlim
kursunun qeyri-pedaqoji ali məktəbin-Azərbaycan
Tibb Universitetinin əməkdaşları üçün təşkil
olunmasını təqdirəlayiq hesab edərək adıçəkilən
ali təhsil ocağının rəhbərliyinin pedaqoji və
psixoloji məsələlərin öyrənilməsi ilə bağlı
onlarla birgə əməkdaşlıq etməsindən məmnunluq
duyduğunu dedi. Təlim kursunun məqsədindən
ətraflı söz açan Rahim Əzizov daha sonra onlara
dərs deyəcək institutun professor-müəllim heyəti
ilə müdavimləri tanış etdi.
Çıxış edən müdavimlər təlim kursu və burada
öyrəniləcək mövzuların onlar üçün mühüm
əhəmiyyət kəsb etdiyini bildirərək yaradılan
şərait və imkana görə hər iki ali məktəbin
rəhbərliyinə minnətdarlıq etdilər.
Samirə KƏRİMOVA |
|
