|
Martın 1-də Bakıdakı 298 nömrəli orta məktəbdə
Azərbaycanın vətənpərvər oğlu, Milli Qəhrəman
Mübariz İbrahimova həsr olunmuş tədbir
keçirildi.
"Mübariz İbrahimov - milli fəxrimiz" adlı
tədbir şagirdlərin ifasında Dövlət himninin
oxunması ilə başladı. Torpaqlarımızın azadlığı
uğrunda həlak olanların xatirəsi bir dəqiqəlik
sükutla yad edildi. Dövlət bayrağı səhnəyə
gətirildi.
Təhsil ocağının direktoru Şaiqə Hüseynova
vətənpərvərlik mövzusuna həsr olunmuş tədbirin
mahiyyəti haqqında iştirakçılara məlumat
verərək şagirdlərin hazırladıqları gecəni açıq
elan etdi.
Məktəbin tərbiyə işləri üzrə direktor müavini
Xatirə Rəhimova Milli Qəhrəman Mübariz
İbrahimovun həyat yolundan söz açdı.
Tədbirin aparıcıları Əfsanə, Ümid və Ləman
düşmənlə döyüşdə igidlik göstərmiş xalqımızın
fəxri Mübariz İbrahimovun qəhrəmanlığından
danışdılar. Bildirdilər ki, bu gün adı dillər
əzbəri olan, haqqında kitablar, şeirlər,
mahnılar yazılan, filmlər çəkilən Azərbaycanın
Milli Qəhrəmanı Mübariz İbrahimovun xatirəsi
xalqımızın yaddaşında əbədi yaşayacaq.
Şagirdlər Mübariz İbrahimova həsr olunan şeirlər
söylədilər, vətənpərvərliyə aid səhnəcik nümayiş
etdirdilər.
Çıxış edən qonaqlar da belə tədbirlərin təhsil
ocaqlarında keçirilməsini təqdirəlayiq hal
kimi qiymətləndirdilər, gecənin yüksək
səviyyədə hazırlanmasından məmnun qaldıqlarını
bildirdilər.
Tədbir Milli Qəhrəman Mübariz İbrahimova həsr
olunmuş filmin nümayişi ilə başa çatdı.
Rəşad ZİYADOV |
