|
 Martın
4-də Tofiq İsmayılov adına Uşaq-Gənclər
Yaradıcılıq Sarayının "Uşaq dünyası" rəsm
qalereyasında "Ətraf mühiti qoruyaq" mövzusunda
məktəblilər arasında təşkil olunan respublika
fotomüsabiqəsinin qaliblərinin
mükafatlandırılması mərasimi keçirildi.
Tədbiri təhsil
nazirinin müavini Elmar Qasımov açaraq qonaqları
və sərgi iştirakçılarını salamladı. Nazir
müavini bildirdi ki, müsabiqə "Əhalinin ekoloji
təhsili və maarifləndirilməsi" haqqında
Azərbaycan Respublikası Qanunundan və ölkə
başçısı cənab İlham Əliyevin "Azərbaycan
Respublikasında ekoloji vəziyyətin
yaxşılaşdırılmasına dair 2006-2010-cu illər
üçün Kompleks Tədbirlər Planı"nın təsdiq
edilməsi haqqında sərəncamından irəli gələn
vəzifələri yerinə yetirmək və məktəblilər
arasında ekoloji maarifləndirmə işlərini
genişləndirmək məqsədilə təşkil olunub.
Azərbaycan Respublikası Təhsil Nazirliyinin 7
dekabr 2010-cu il tarixli əmrinə müvafiq olaraq
keçirilən fotomüsabiqə 6-9, 10-13 və 14-17
yaşlı məktəblilər arasında 3 mərhələdə (məktəb,
rayon (şəhər), respublika) respublikanın
müxtəlif regionlarında təşkil olunub.
Respublika mərhələsinə təqdim olunan 300-ə yaxın
fotoşəkildən 18-i müsabiqənin qalibi olub. Qeyd
olundu ki, şagirdlər ətraf mühitin ekoloji
vəziyyətini və bu sahədə həyata keçirilən
tədbirləri fotokameranın "gözü" ilə öz
yaradıcılıq işlərində uğurla əks etdiriblər.
Hazırda dünyada qlobal problemlərdən birinin
məhz ekoloji tarazlığın pozulması olduğunu deyən
nazir müavini böyüməkdə olan gənc nəslin bununla
bağlı ümumtəhsil və məktəbdənkənar
müəssisələrdə maarifləndirilməsini təqdirəlayiq
hal hesab edərək məktəblilərin çəkdikləri
fotolarda təbiətin gözəllikləri ilə yanaşı,
ətraf mühitin ekoloji problemlərini, insanın
təsərrüfat fəaliyyətinin mənfi təsirlərini,
təbiətə və canlılara etinasız münasibətin
nəticələrini məharətlə göstərə bildiklərini qeyd
etdi. Çıxışının sonunda müsabiqənin
keçirilməsində əməyi olanlara minnətdarlığını
bildirən nazir müavini Elmar Qasımov bütün
qalibləri təbrik edərək onlara yeni-yeni uğurlar
arzuladı.
Sonra
qaliblərə Təhsil Nazirliyinin diplomları və
hədiyyələr təqdim olundu.
Mükafatlandırma mərasimindən sonra məktəblilərin
çəkdikləri fotoşəkillərdən ibarət sərgiyə baxış
keçirildi.
Samirə KƏRİMOVA |
