|
 Martın
11-də Azərbaycan Respublikasının Prezidenti
İlham Əliyevin Azərbaycanın müstəqilliyini bərpa
etməsinin 20-ci ildönümünün qeyd olunması ilə
bağlı imzaladığı sərəncama əsasən Bakıdakı 9
nömrəli orta məktəbdə "Doğma diyarım mənim"
adlı tədbir keçirildi. Tədbirdə Nəsimi Rayon
İcra Hakimiyyətinin, Bakı Şəhəri üzrə Təhsil
İdarəsinin nümayəndələri, Bakıdakı 54, 111, 144,
240, 266 nömrəli orta məktəblərin direktorları,
şagirdlər və müəllimlər iştirak edirdilər.
Tədbirin əvvəlində Azərbaycanın Dövlət himni
səsləndi. Tədbirdə məktəbin direktoru Zinyət
Əhmədova Azərbaycanın müstəqillik illərinə nəzər
salaraq tarixi xronologiyanı diqqətə çatdırdı.
Qeyd edildi ki, bu gün müstəqil Azərbaycanın
vətəndaşı olmaqla hər birimiz qürur duyuruq.
Unutmamalıyıq ki, müstəqilliyi qazanmaq nə qədər
çətindirsə, onu qoruyub saxlamaq ondan da
çətindir. Çıxışlarda vurğulandı ki, ötən əsrin
90-cı illərinin əvvəllərində respublikada böyük
bir xaos, anarxiya hökm sürəndə, Azərbaycanın
müstəqilliyi təhlükə qarşısında qalanda xalqımız
ümummilli liderinə, xilaskarına arxalandı.
Heydər Əliyev xalqın təkidi ilə ikinci dəfə
hakimiyyətə gəldi və onun rəhbərliyi altında
Azərbaycanda qardaş qırğınına son qoyuldu.
Sonra tədbir iştirakçılarına "Əsrin müqaviləsi",
"Dədə Qorqud" və "Koroğlu" filmlərindən
fraqmentlər nümayiş etdirildi.Şagirdlərdən Həmid
Zeynallı, Vüsal Bayramov, Aygün Babayeva və
başqaları Tofiq Bayramın "Azərbaycan deyəndə",
Məmməd Arazın "Azərbaycan - dünyam mənim", "Ayağa
dur, Azərbaycan!" şeirlərindən parçalar
söylədilər və ədəbi-bədii kompozisiya göstərildi.
Şakir CƏFƏROV |
|
