|
Bakı Pedaqoji Kadrların İxtisasartırma və
Yenidənhazırlanma İnstitutunda 31 Mart -
Azərbaycanlıların soyqırımı gününə həsr olunmuş
elmi-praktik konfrans keçirildi.
İnstitutun rektoru, fizika-riyaziyyat elmləri
doktoru, professor Asəf Zamanov tədbir
iştirakçılarını salamladıqdan sonra 31 Mart
soyqırımı qurbanlarının xatirəsi bir dəqiqəlik
sükutla yad edildi.
Sonra rektor məruzəsində tarixə qısa ekskursiya
etdi. O bildirdi ki, ermənilərin
azərbaycanlılara qarşı həyata keçirdikləri
aramsız soyqırımı və deportasiya siyasəti
1918-1920-ci illərdə xüsusən genişlənmişdir.
Azərbaycan xalqını yer üzündən tam silmək kimi
mənfur niyyətini həyata keçirməyə çalışan
ermənilər həm də xalqımıza məxsus minlərlə
tarixi-mədəni abidə və yaşayış məskənini dağıdıb
viran etmiş, "Saxta Ermənistan tarixi"ni nəinki
yazmağa, hətta dünyanı buna inandırmağa
çalışmışlar. Lakin tarix, tarix olaraq qalır.
XX əsrin əvvəllərində ermənilər təkcə bu gün
Ermənistan adlanan ərazini deyil, Bakı
quberniyasının Bakı, Şamaxı, Quba, Göyçay,
Qarabağ, Zəngəzur və Naxçıvanda da vaxtaşırı
xalqımıza qarşı qırğınlar, talanlar, yanğınlar,
terror və digər zorakılıq aktları həyata
keçiriblər. Erməni faşistləri bu ərazilərdə on
minlərlə dinc azərbaycanlı əhalini - qadını,
uşağı, qocanı yalnız milli
mənsubiyyətlərinə görə vəhşicəsinə qətlə
yetirmiş, yaşayış yerlərini talan edərək
yandırıb viran qoymuş, xalqımızın milli
mədəniyyət abidələrini, məscidləri dağıtmış
və yandırmışlar.
Tarixi sənədlərdəki faktlar Şamaxıda, Qubada,
Muğanda, Zəngəzur qəzasında, Qarabağda, İrəvan
quberniyasında və ölkənin digər ərazilərində
azərbaycanlıların amansızlıqla qətlə
yetirildiyini, şəhər və kəndlərın talan edilərək
dağıdıldığını sübut edir.
1918-ci il martın 30-da Bakıda erməni kilsəsi
yanında toplaşan daşnak dəstəsi müsəlmanlara ilk
atəşi açdı. 31 mart səhər tezdən bolşevik daşnak
dəstələri azərbaycanlılar yaşayan məhəllələri
havadan təyyarələr, dənizdən hərbi gəmilər
bombalamağa başladılar. Ermənilər rusları
inandırmışdılar ki, guya İçərişəhərdə rusları
qırıblar. Matroslar bunun yalan olduğunu biləndə
atəşi dayandırsalar da, artıq gec idi.
Rektor məruzəsində həmçinin İosif Stalinin
hakimiyyəti illərində qədim İrəvan torpağından
azərbaycanlıların köçürülmə prosesinin sürətlə
aparıldığından söz açdı.
Asəf müəllim ümummilli lider Heydər Əliyevin
"Azərbaycanlıların soyqırımı haqqında" 1998-ci
il 26 mart tarixli fərmanının əhəmiyyətindən,
həmçinin bu gün ölkəmizin hərtərəfli inkişafı
üçün aparılan uğurlu siyasətdən danışdı.
Tədbirdə İctimai elmlər kafedrasının dosent
Aydın Aslanov, kitabxananın müdiri Güldanə
Mehdiyeva, Psixologiya kafedrasının müdiri
Hökumə Əliyeva və digərləri məruzələrlə çıxış
etdilər.
Sifai SƏFƏROVA |
