|
İstedadlı uşaqların aşkar edilməsi, onların
inkişafı üçün əlverişli mühitin yaradılması
təhsil sisteminin prioritet vəzifələrindəndir.
Məhz bunu nəzərə alaraq son illər bütün təhsil
müəssisələrində olduğu kimi, bağçamızda da
istedadlı və qabiliyyətli uşaqların aşkara
çıxarılmasına və onların inkişafına xüsusi
diqqət yetiririk. 10 ildən çoxdur ki, bağçamızda
mahnı oxuma qabiliyyəti olan uşaqlar aşkara
çıxarılmış və onların inkişafı üçün "Səadət"
uşaq xoru və "İstedad mərkəzi" yaradılmışdır.
 "Uşaq
xoru" üzrə "İstedad mərkəzi"nə musiqi rəhbəri
F.Quliyeva rəhbərlik edir. O, musiqi və nəğmə
üzrə iş apararkən, hər bir uşağın səs
diapazonunu müəyyənləşdirir, repertuarı seçir və
xoru təşkil edir.
Son illər uşaq xorumuz respublika miqyasında
keçirilmiş bir sıra baxış müsabiqələrin qalibi
olmuş və dəfələrlə fəxri fərman və diplomlara
layiq görülmüşdür.
Xor kollektivində işlərin müvəffəqiyyətini təmin
etmək üçün hər məşğələdə müntəzəm təmrinoxuma
üzrə iş aparılır. Xor kollektivində uşaqların
səs duyumu, ritmi tutmaq qabiliyyəti, mahnıları
düzgün oxumaq bacarıqları inkişaf etdirilir.
Uşaqlar mahnıları həvəslə öyrənir, onlara dərin
maraq göstərirlər.
Uşaqlara mahnıların bədii dəyərini
qiymətləndirmək bacarıqlarının aşılanmasına da
xüsusi diqqət yetirilir. Mahnının musiqisi ilə
tanışlıq zamanı musiqi rəhbərinin ardıcıl
izahatının aparılması uşaqlarda bədii-musiqi
zövqünün formalaşmasına kömək edir.
Xor kollektivinin müvəffəqiyyəti, ilk növbədə,
musiqi məşğələlərinin düzgün təşkilindən
asılıdır. Məşğələ zamanı musiqi rəhbəri oxumağa
başlamazdan əvvəl xorun hər bir üzvünün bütün
diqqətini toplamasına, onların əllərinin,
ayaqlarının, çiyinlərinin vəziyyətinə daim
nəzarət edir. Oxumaq prosesində
dirijor-xormeysterin əl jestinə diqqət,
nəfəsalma, mahnı oxumağa başlamaq kimi əsas
elementləri uşaqlara başa salır. Uşaqlar
göstərilən vərdişləri qazanana qədər müəllim bu
barədə izahat işləri aparır.
Görülən işlərin dəqiq planı, musiqi rəhbərinin
məşğələyə yaxşı hazırlaşması müvəffəqiyyətin
qazanılmasında həlledici rol oynayır.
Mahnıları təkrar edərkən musiqi rəhbəri
uşaqların təmiz intonasiyaya, melodik və ritmik
ifasına, sözlərin dəqiq tələffüzünə diqqət
yetirilir. Xor kollektivinə düzgün rəhbərlik,
məşğələlərin maraqlı qurulması və keçirilməsi,
uşaqlarda mahnı oxumağa məhəbbət və maraq
tərbiyə edir. Uşaqlar xorda məşğul olmaq
sayəsində musiqini daha yaxşı dinləmək və
qavramaq qabiliyyətinə yiyələnirlər.
Biz balaca "bülbüllər"imizin gələcək inkişafını
da izləyirik. Belə ki, "İstedad mərkəzi"nin
məzunları yaxınlıqdakı 215 nömrəli məktəbin
xorunda da fəal iştirak edirlər. Bunun
nəticəsidir ki, məktəbin uşaq xoru mahnıların
fərqli ifasına görə dəfələrlə yüksək qiymətə
layiq görülmüşdür.
Bu sahədə valideynlərlə də az iş görülməmişdir.
Valideynlər "İstedad mərkəzi"nin işində fəal
iştirak edir və uşaqlar üçün geyimlərin
hazırlanmasına kömək göstərirlər.
Bağçamızın yaradıcı potensialı olan
tərbiyəçilərimiz çoxdur. Belə ki, tərbiyəçilər
H.Sultanova (nitq məharəti), İ.Kasatkina (rəsm),
Ş.Qasımova (quraşdırma), X.Hüseynova (əl əməyi),
F.Abdullayeva (əl əməyi) və b. öz qabiliyyətləri
ilə fərqlənir və bacarıqlarını yetirmələrinə də
öyrədirlər.
Hər bir istedadlı uşağın yaradıcılıq
imkanlarından vaxtında istifadə edilməsi
tərbiyəçilərimizin qarşısında duran əsas
vəzifələrdən biridir. Onlar uşaqlarla təlimin
normal təşkili üçün psixoloji-pedaqoji
diaqnostika aparır, hər bir uşağa fərdi və
diferensial yanaşırlar.
Uşaqların həyatında, estetik-emosional aləminin
zənginləşməsində təsviri incəsənətin də rolu
böyükdür. Hər bir uşağın bu sahədə istedad və
qabiliyyətini aşkara çıxarmaq və inkişaf
etdirmək də mühüm vəzifələrimizdəndir. Bununla
əlaqədar 2005-2006-cı tədris ilindən bağçamızda
rəsm üzrə "İstedad mərkəzi" fəaliyyət göstərir.
Mərkəzə tərbiyəçi İ.Kasatkina rəhbərlik edir. O,
uşaqlarda rəsm qabiliyyətlərinin inkişafında
yüksək göstəriciləri əldə edir. İ.Kasatkina
uşaqlarda təbiətdəki hadisələri hiss etmək,
duymaq, gözəlliklərdən zövq almaq kimi
keyfiyyətlər tərbiyə edir.
İ.Kasatkina valideynlərlə sıx əlaqə saxlayır,
onları rəsm məşğələlərinə dəvət edir,
valideynlərə "Uşağa rəsm çəkməyi necə öyrətməli?"
mövzusunda məsləhətlər verir.
Şahnaz ABDULLAYEVA,
Bakının Sabunçu rayonundakı 3 nömrəli
"Səadət" uşaq bağçasının müdiri |
