|
 Yusifov
Zakir Tofiq oğlu
1956-cı il sentyabrın 29-da Bakı şəhərində
anadan olub. 1974-cü ildə paytaxtdakı 194
nömrəli orta məktəbi bitirərək, Leninqraddakı
(indiki Sankt-Peterburq) Sasovski adına Mülki
Təyyarəçilik Məktəbinə daxil olub. 1977-ci ildə
təhsilini başa çatdıraraq Yevlax aviadəstəsində
fəaliyyətə başlayıb. AN-2 təyyarəsinin
komandiri, eskadrilya komandirinin müavini,
eskadrilya komandiri, uçuşun təşkili və
təminetmə müfəttişliyinin təyyarəçi-müfəttişi
vəzifələrində çalışıb, 1988-ci ildə Bakı Dövlət
Universitetinin hüquq fakültəsinin qiyabi
şöbəsinə daxil olub. Azərbaycanda ilk hərbi
vertolyot eskadrilyası Milli Qəhrəman Yavər
Əliyevlə Zakir Yusifovun əməyi nəticəsində
yaradılıb. Qısa zamanda Qarabağa və digər döyüş
bölgələrinə uçuşlar edib, ən uğurlu uçuşunu isə
Füzuli-Xocavənd istiqamətində yerinə yetirib.
Tərtər, Ağdərə, Xocavənd, Şuşakənd, Füzuli
döyüşləri zamanı yüzədək uçuş edib.
Z.Yusifov 1992-ci il oktyabrın 11-də növbəti
uçuş zamanı - Səfiyan kəndində əməliyyat yerinə
yetirərkən vertolyotu vurulub və o,
qəhrəmancasına həlak olub.
Ailəli idi. İki övladı var.
Azərbaycan Respublikası Prezidentinin 5 fevral
1993-cü il tarixli 457 nömrəli Fərmanı ilə
Yusifov Zakir Tofiq oğlu ölümündən sonra
Azərbaycanın Milli Qəhrəmanı adına layiq
görülüb.
Bakı şəhərində Şəhidlər xiyabanında dəfn
olunub.Təhsil aldığı 194 nömrəli orta məktəb və
Nizami rayonundakı küçələrdən biri onun adını
daşıyır.
 Yusifov
Naiq Nəsir oğlu
1970-ci il yanvarın 5-də Tovuz rayonunun Ağdam
kəndində anadan olub. 1987-ci ildə doğma
kəndlərində orta məktəbi bitirib və 1988-ci ildə
sovet ordusu sıralarına çağırılıb. Naiq hərbi
xidmətini Gürcüstanın Texakaya şəhərində
yerləşən rabitə batalyonunda başa çatdırıb və
1990-cı ildə Vətənə qayıdıb. Bir müddət sonra
yerli özünümüdafiə dəstəsinə üzv yazılıb.
1992-ci il martın 24-də Tovuz rayonunun
Koxa-Nəbi kəndinə işğalçı erməni yaraqlılarının
hücumu zamanı Naiq cəsur, fədakar, vətənpərvər
bir əsgər kimi döyüş meydanında xüsusi
qəhrəmanlıq nümayiş etdirib. O, son dərəcə
gərgin, qeyri-bərabər döyüş zamanı mühasirəyə
düşən yoldaşlarını təhlükəli zonadan xilas
etməyə bütün gücü, bacarığı ilə səy göstərib.
Amma son anda yağı düşmənin əlinə keçməmək üçün
əlindəki qumbaranı gənclik eşqi ilə dolu
sinəsinə sıxaraq qəhrəmancasına həlak olub. Onun
Vətən uğrunda göstərdiyi bu şücayət ölkə başçısı
tərəfindən yüksək qiymətləndirilib.
Azərbaycan Respublikası Prezidentinin 7 iyun
1992-ci il tarixli 833 nömrəli Fərmanı ilə
Yusifov Naiq Nəsir oğlu ölümündən sonra
Azərbaycanın Milli Qəhrəmanı adına layiq
görülüb.
Tovuz rayonunun Ağdam kəndində dəfn olunub.
Vaxtı ilə təhsil aldığı orta məktəb onun adını
daşıyır.
 Yusifov
Roman Yasəf oğlu
1973-cü il iyulun 28-də Dəvəçi rayonunda anadan
olub. 1990-cı ildə rayondakı 2 nömrəli məktəbdə
orta təhsilini başa çatdırıb, 1992-ci ildə Milli
Ordu sıralarında əsgəri xidmətə çağırılıb. Bir
müddət Naxçıvanda hərbi təlim keçdikdən sonra
Sədərək rayonuna göndərilən Roman Vətən
qarşısındakı müqəddəs borcunu şərəf və ləyaqətlə
yerinə yetirib. 1992-ci ilin oktyabrında xidməti
borcunu yerinə yetirərkən yaralanıb. O, müalicə
aldıqdan sonra yenidən əsgəri xidmətini davam
etdirib. Gələcəkdə hərbiçi olmaq, Vətənin
keşiyində durmaq onun ən müqəddəs arzularından
olub. Roman elə həmin arzusunun da həyata
keçməsinə cidd-cəhdlə çalışıb, hərbi kurs
keçərək leytenant rütbəsi alıb. Taqım komandiri
təyin edilib.
R.Yusifov 1995-ci il martın 17-də qeyri-qanuni
silahlanmış, dövlət çevrilişinə cəhd edən bir
qrup qiyamçı ilə qarşıdurma zamanı
qəhrəmancasına həlak olub.
Azərbaycan Respublikası Prezidentinin 4 aprel
1995-ci il tarixli 307 nömrəli Fərmanı ilə
Yusifov Roman Yasəf oğlu ölümündən sonra
Azərbaycanın Milli Qəhrəmanı adına layiq
görülüb.
Dəvəçi rayonunun Qalagah kəndində dəfn olunub.
Təhsil aldığı 2 nömrəli orta məktəb onun adını
daşıyır.
 Zülfüqarov
Elxan Qaçay oğlu
1954-cü il iyunun 29-da Füzuli rayonunun Hoğa
(Üçbulaq) kəndində anadan olub. Səkkizillik
təhsilini 1969-cu ildə 1 nömrəli orta məktəbdə
alıb, orta təhsilini isə Yevlax şəhərindəki 1
nömrəli orta məktəbdə başa çatdırıb. 1971-ci
ildə Mingəçevir Politexnik Texnikumuna daxil
olub. 1972-ci ildə hərbi xidmətə çağırılıb.
1974-cü ildə xidmətini Ukraynada yerinə
yetirdikdən sonra yarımçıq qalmış təhsilini
davam etdirib. 1975-ci ildə Novosibirsk Şəhər
Milis Şöbəsinə təyinat alaraq, orada milis baş
leytenantı rütbəsinə qədər yüksəlib. 1988-ci
ildə Qarabağ hadisələri ilə əlaqədar Vətənə
qayıdıb. 1992-ci ildə ordu sıralarına yazılaraq
bölmə komandiri kimi Laçın, Qubadlı, Zəngilan,
Füzuli bölgələrində bir çox əməliyyatlarda
iştirak edib. Kapitan rütbəsinə qədər yüksələn
Elxan 702 nömrəli hərbi hissədə kəşfiyyat
komandirinin köməkçisi vəzifəsinə təyin edilib.
1994-cü il yanvarın 5-də növbəti kəşfiyyata
yollanaraq qeyri-bərabər döyüşdə qəhrəmanlıq
nümayiş etdirən E. Zülfüqarov Şükürbəyli kəndi
uğrunda erməni işğalçılarına qarşı gedən
döyüşlərdə həlak olub.
Ailəli idi. Dörd övladı var.
Azərbaycan Respublikası Prezidentinin 16
sentyabr 1994-cü il tarixli 203 nömrəli Fərmanı
ilə Zülfüqarov Elxan Qaçay oğlu ölümündən sonra
Azərbaycanın Milli Qəhrəmanı adına layiq
görülüb.
Bakı şəhərində Şəhidlər xiyabanında dəfn
olunub.
 Zülfüqarov
Samir Xəlil oğlu
1976-cı il iyulun 3-də Dəvəçi rayonunun Ağbaş
kəndində anadan olub. Səkkizillik təhsilini
doğma kəndlərində alıb. 1994-cü ildə Milli Ordu
sıralarına həqiqi hərbi xidmətə çağırılıb. Yaşma
qəsəbəsində yerləşən hərbi hissələrdən birində
xidmətini şərəflə yerinə yetirdiyi, nümunəvi bir
əsgər olduğu nəzərə alınaraq ona qısamüddətli
məzuniyyət verilib. Həmin vaxt ölkədə vəziyyət
yenidən gərginləşib. Bir qrup cinayətkar
ünsürdən ibarət silahlı dəstə hakimiyyəti ələ
keçirmək üçün dövlət çevrilişi etmək istəyirdi.
Bu hadisədən narahat olan Samir məzuniyyətini
yarımçıq qoyaraq yoldaşlarının yanına qayıdıb.
Milli Ordunun əsgərləri dövlət çevrilişinə cəhd
edən qüvvələrlə üz-üzə dayandığı bir vaxtda
onlarla aparılan danışıqlar nəticə verməyib.
S.Zülfüqarov 1995-ci il martın 17-də baş vermiş
həmin qiyam zamanı dövlətçiliyimiz,
suverenliyimiz uğrunda canını qurban verərək
qəhrəmancasına həlak olub.
Azərbaycan Respublikası Prezidentinin 4 aprel
1995-ci il tarixli 307 nömrəli Fərmanı ilə
Zülfüqarov Samir Xəlil oğlu ölümündən sonra
Azərbaycanın Milli Qəhrəmanı adına layiq
görülüb.
Dəvəçi rayonunun Ağbaş kəndində dəfn olunub.
Dəvəçi rayon 3 nömrəli orta məktəb onun adını
daşıyır və məktəbdə büstü qoyulub.
Milli Qəhrəmanlar Beynəlxalq İnformasiya
Mərkəzinin materialları əsasında
hazırladı: Ədalət DAŞDƏMİRLİ |
