|
"Elm" nəşriyyatı görkəmli iqtisadçı alim, Milli
Elmlər Akademiyasının müxbir üzvü, iqtisad
elmləri doktoru, əməkdar elm xadimi, professor
Əli Xudu oğlu Nuriyevin "Regional idarəetmənin
əsasları" kitabını çapdan buraxmışdır.
 Özünün
elmi təhlilinə görə diqqəti cəlb edən kitab
Azərbaycan Respublikasının Prezidenti yanında
Dövlət İdarəçilik Akademiyasının böyük Elmi
Şurasının tövsiyəsi ilə Azərbaycan Respublikası
Təhsil Nazirliyinin 12 fevral 2007-ci il tarixli
118 saylı əmri ilə dərslik kimi təsdiq
edilmişdir.
Ağır və xeyirxah zəhmətin məhsulu olan dərslikdə
Əli müəllim son illərdə regional siyasətin və
idarəetmənin mühüm əsaslarını təhlil edir,
konkret fikirlər, tövsiyələr irəli sürür.
Dərslik 4 hissə, 14 fəsildən ibarətdir. Hər
hissənin öz mövzusu vardır. Kitabda müasir
ölkədaxili regional siyasət və idarəetmənin
nəzəri-metodoloji məsələləri qarşılıqlı əlaqədə
və ölkə şəraitinə tətbiqən ətraflı təhlil
olunur.
Müəllif Azərbaycanda regional siyasətin strateji
istiqamətlərini, regional idarəetmənin təşkilati
vasitə və metodlarını şərh edərkən Heydər
Əliyevin və onun layiqli davamçısı İlham
Əliyevin bu məsələlərlə bağlı proqram
xarakterli çıxışları, fərmanları, qəbul edilmiş
rəsmi dövlət sənədlərində irəli sürülmüş
müddəaları əldə rəhbər tutmuşdur.
Kitabın birinci hissəsində regionun mahiyyəti,
formaları açıqlanır, regionlara bölgü
sisteminin təsnifatı verilir. Bununla yanaşı,
regionların formalaşmasının obyektiv ilkin
şərtləri əsaslandırılır.
Müəllif öz xidmətini MDB məkanında ilk dəfə
olaraq ərazisi nisbətən kiçik olan
respublikalardakı regional siyasət və
idarəetmənin ümumi nəzəri-metodoloji
məsələlərinin Azərbaycan şəraitinə tətbiqində
görür. Elə buna görə də professor Əli Nuriyev
mənalı ömür yolunu ölkəmizin regional inkişafı
ilə bağlamışdır.
Onun ölkəmizdə regional siyasət və idarəetmənin
nəzəri-metodoloji məsələlərinin tədqiqinə həsr
olunmuş ilk irihəcmli əsəri elm aləminə bir
töhfədir. Dərslikdə şərh və təhlil olunan
məsələlərin əhatə dairəsi regional idarəetmədən
xeyli kənara çıxmış, regional siyasətin və
regional sosial-iqtisadi inkişafın bir çox vacib
məsələlərini də əhatə etmişdir. Əli müəllim
kitabında milli iqtisadiyyatın hər hansı
təsərrüfat forması və ya formasiya ilə bağlı bir
kateqoriya olmadığını, eyni zamanda özündə
cəmiyyətin, iqtisadiyyatın müxtəlif inkişaf
pillələrini, strukturunu, onun xüsusiyyətlərini
milli xüsusiyyətlər baxımından əks etdirdiyinin
də geniş izahını vermişdir.
Regional siyasətin mahiyyəti, məqsədi,
sosial-iqtisadi siyasətdə yeri, normativ- hüquqi
əsasları, inkişaf mərhələləri və ölkədə mövcud
problemlər dərsliyin ikinci hissəsində
açıqlanır. Regional siyasətin həyata keçirilməsi
vasitəsi olmaqla, regional inkişafın dövlət
tənzimlənməsinin yolları da kompleks şəkildə
verilir və izah edilir.
Dərslikdə müstəqillik illərində ölkəmizdə Heydər
Əliyevin sosial-iqtisadi inkişaf, o cümlədən
regional inkişaf siyasətinin formalaşması və
inkişafı geniş şəkildə mərhələlərlə təhlil
olunur, maraqlı, elmi fikirlər açıqlanır.
Müəllif göstərir ki, indiyə qədər qazanılmış
bütün nailiyyətlər mövcud imkanlardan daha
səmərəli istifadə etməklə ölkəmiz iqtisadi
cəhətdən daha güclü dövlətə çevrilmiş, dünya
iqtisadi sistemində özünə layiqli yer tutmuş,
ölkədə sosial problemlərin yüksək səviyyədə həll
olunması əhalinin güzəranının yaxşılaşdırılması
üçün etibarlı zəmin yaratmışdır.
Milli Elmlər Akademiyasının müxbir üzvü, əməkdar
elm xadimi, professor Əli Nuriyevin "Regional
siyasət və idarəetmənin əsasları" adlı dərsliyi
iqtisadiyyat ixtisası üzrə təhsil alan tələbələr
üçün faydalı dərslik, eyni zamanda elmi
axtarışlarla məşğul olan insanlara gərəkli bir
elmi mənbədir.
A.BAYRAMOV,
professor, respublikanın əməkdar müəllimi |
