|
AzərTAc xəbər verir ki, gənc həmvətənimiz,
Moskva vilayətinin Çernoqolovka şəhərindəki 82
nömrəli məktəbin altıncı sinif şagirdi Cəfər
Mirişli Rusiyanın bu elm şəhərində keçirilmiş
tədqiqat-layihə işlərinin elmi-praktiki
konfransının məktəb turunun qalibi və VI şəhər
konfransının mükafatçısı olmuşdur. Konfransın
münsiflər heyəti onun kriobiologiya sahəsinə aid
"Bioloji obyektlərin donmanın zərərli təsirindən
müdafiəsi" mövzusunda işini yüksək
qiymətləndirmişdir.
Gənc tədqiqatçının elmi rəhbərləri Rusiya Elmlər
Akademiyası Kimyəvi Fizika İnstitutunun
laboratoriya müdiri, kimya elmləri namizədi
Aleksey Terentyev və Cəfərin atası, həmin
institutun aspiranturasının məzunu Mir Asəf
Mirişlidir.
Rusiyanın elmi mərkəzlərindən biri sayılan
Çernoqolovka şəhərində bir neçə tanınmış
elmi-tədqiqat institutu yerləşir, həmin
institutlarda məşhur alimlər işləyir. Məsələn,
2010-cu ildə fizika üzrə Nobel mükafatı laureatı
olmuş Konstantin Novoselov Çernoqolovka
şəhərindəndir. Bu baxımdan, Cəfərin elmi
uğurları xüsusi əhəmiyyət kəsb edir.
Mayın 3-də Obninsk şəhərində tədqiqat və layihə
işlərinin Ümumrusiya müsabiqəsi keçiriləcəkdir.
Cəfər Mirişli şəhər müsabiqəsinin mükafatçısı
kimi öz işini bu tura təqdim edəcəkdir.
Müsabiqənin təşkilatçıları Ümumrusiya "Kiçik
Elmlər Akademiyası. Gələcəyin intellekti"
ictimai təşkilatıdır. Mütəmadi olaraq müxtəlif
səviyyəli - məktəb miqyasından başlamış
Ümumrusiya səviyyəsinə qədər müsabiqələr keçirən
bu təşkilat təhsil sisteminin
yaxşılaşdırılmasına və elmdə ilk addımlarını
atan istedadlı uşaqların öz potensialını üzə
çıxarmaqda, intellektual inkişaf səylərini
istiqamətləndirməkdə kömək edir. "Rusiyanın
intellektual - yaradıcı potensialı" adlı milli
təhsil proqramını həyata keçirən bu təşkilat
Rusiyanın intellektual - yaradıcı təhsil
sahəsində liderlərdən biridir. |
