|
Bir neçə ildir ki, Bişkekdəki Atatürk-Alatoo
Universiteti filologiya fakültəsində Azərbaycan
dili və ədəbiyyatı tədris edilir. Bu gün
universitetin V kurs tələbələri Azərbaycan dili
və ədəbiyyatından imtahan vermişlər.
Fakültənin müəllimi, filologiya elmləri
namizədi, dosent Ramiz Məşədihəsənli,
səfirliyimizin müşaviri İlqar Cabbarov, həmçinin
komissiyanın üzvləri imtahanın gedişindən razı
qalmışlar. Tələbələr Azərbaycanın tarixi,
ədəbiyyatı, incəsənəti, ölkəmizin dövlətçilik
ənənələri, azərbaycanlılara qarşı soyqırımı,
həmçinin şair və yazıçılarımız haqqında suallara
cavab vermişlər.
İmtahandan sonra Ramiz Məşədihəsənli
universitetin tələbələri qarşısında
"Azərbaycanlılara qarşı soyqırımı" mövzusunda
mühazirə oxumuşdur. O qeyd etmişdir ki, 1998-ci
il martın 26-da Azərbaycan Prezidenti Heydər
Əliyevin Fərmanı ilə 31 mart Azərbaycan xalqının
soyqırımı günü kimi tarixə düşmüşdür. Sonra o,
soyqırımı haqqında geniş məlumat vermiş, Quba
rayonunda aşkar edilmiş kütləvi məzarlıq barədə
danışmış, orada çəkilmiş şəkilləri tələbələrə
nümayiş etdirmişdir.
Sonda tələbələrin sualları cavablandırılmışdır.
|
|
