|
Türkiyənin İğdır şəhərində Azərbaycan xalqının
ümummilli lideri Heydər Əliyevin adını daşıyan
liseyin rəsmi açılışı olmuşdur. Mərasimdə Baş
nazir Rəcəb Tayyib Ərdoğan iştirak etmişdir.
Türkiyənin Baş naziri demişdir ki, bu mərasimdə
iştirak mənim üçün çox önəmlidir. Təkcə dost,
qardaş Azərbaycanın deyil, bizim də fəxrimiz,
"Biz bir millət, iki dövlətik" kəlamının
müəllifi Heydər Əliyevin adını daşıyan bu
liseyin fəaliyyətindən məmnunuq.
Azərbaycanın Ankaradakı səfiri Faiq Bağırov
Heydər Əliyevin adını daşıyan müasir təhsil
kompleksinin açılışında iştirak etməkdən böyük
qürur hissi keçirdiyini bildirmişdir.
Sonra rəmzi açılışı bildirən qırmızı lent
kəsilmiş, Baş nazir, səfir və digər qonaqlar
liseylə tanış olmuşlar.
Bildirilmişdir ki, liseydə hazırda 234 şagird
təhsil alır. Şagirdlər təhsil müəssisəsinə
imtahan verərək yüksək balla qəbul edilirlər. 16
sinif otağı olan liseydə müasir standartlara
cavab verən kimya, biologiya və fizika
laboratoriyaları, idman zalı, qızlar yataqxanası
fəaliyyət göstərir. Burada zəngin kitabxana da
vardır. Bir sözlə, təhsil üçün hər cür şəraitə
malik olan Heydər Əliyev liseyi Türkiyənin ən
nüfuzlu tədris komplekslərindən biri hesab
edilir.
Daha sonra Baş nazir və onunla birlikdə açılış
mərasimində iştirak edən qızı liseyin şagirdləri
ilə birlikdə şəkil çəkdirmişlər.
Heydər Əliyev liseyinin açılışı əhalisinin böyük
əksəriyyətini azərbaycanlıların təşkil etdiyi
İğdır, eləcə də bölgənin təhsil ictimaiyyəti
üçün əsl bayrama çevrilmişdir.
AzərTAc |
