|
Aprelin 29-da Təhsil Nazirliyində "Şahmat
dünyası" multimedia sisteminin təqdimat mərasimi
keçirildi.
 Tədbirdə
təhsil naziri Misir Mərdanov, təhsil nazirinin
müavinləri, Ailə, Qadın və Uşaq Problemləri üzrə
Dövlət Komitəsinin sədr müavini Aynur Sofiyeva,
gənclər və idman nazirinin müavini İsmayıl
İsmayılov, Təhsil Nazirliyi Aparatının məsul
işçiləri, nazirliyin şöbə müdirləri və struktur
bölmələrinin rəhbərləri, Bakının, eləcə də
respublikanın, bir sıra bölgələrinin
uşaq-gənclər şahmat məktəblərinin direktorları,
idman mütəxəssisləri, gənc şahmatçılar və
başqaları iştirak edirdilər.
Mərasimi təhsil naziri Misir Mərdanov açaraq
qonaqları Təhsil Nazirliyində görməkdən
məmnunluq hissi keçirdiyini söylədi. Nazir
ölkəmizdə bədən tərbiyəsi və idmanın inkişafının
dövlət siyasətinin prioritet istiqamətlərindən
biri olduğunu bildirdi. Qeyd olundu ki, müstəqil
Azərbaycan dövlətinin qurucusu Heydər Əliyevin
hakimiyyətdə olduğu dövrlərdə ölkədə bədən
tərbiyəsi və idmanın inkişafına xüsusi dövlət
qayğısı olmuşdur. Hazırda ümummilli lider Heydər
Əliyev kursunun layiqli davamçısı, respublika
Prezidenti cənab İlham Əliyevin fəaliyyətində bu
sahəyə xüsusi önəm verilir.
Azərbaycanda sevilən idman növlərindən biri olan
şahmatın zəngin tarixi ənənələri ilə xalqımızın
mədəniyyətində özünəməxsus yer tutduğunu qeyd
edən nazir bu intellektual oyunun inkişaf yolu,
müstəqillik illərində qazanılan uğurlar haqqında
ətraflı söz açdı. Məlumat üçün bildirdi ki,
şahmata dövlət tərəfindən göstərilən yüksək
qayğı nəticəsində 1992-ci ildən başlayaraq
idmançılarımız dunya və Avropa birinciliklərində
82 medal qazanmışdır ki, onlardan da 33-ü qızıl,
25-i gümüş, 24-ü isə bürünc medaldır. Beynəlxalq
Şahmat Federasiyasının (FİDE) iki aydan bir
yeniləşən reytinq cədvəlinə görə, Azərbaycan
həmişə birinci onluqda olur və hazırda 159 ölkə
arasında 9-cu yerdədir. Dünyanın 20 ən güclü
şahmatçıları sırasında Şəhriyar Məmmədyarov
8-ci, Vüqar Həşimov 11-ci, Teymur Rəcəbov isə
12-ci yerdədir.
Xalqın intellektual səviyyəsini göstərən idman
növü kimi ölkəmizin dünyada tanınmasında
şahmatın rolundan bəhs edən nazir Misir Mərdanov
2002-ci ildə Bakıda gənclər arasında Avropa,
2003-cü ildə isə Naxçıvanda Dünya
çempionatlarının, 2008-ci ildən başlayaraq
Bakıda, bu il isə Naxçıvanda ümummilli lider
Heydər Əliyevin xatirəsinə həsr edilən mötəbər
turnirlərin keçirilməsini Azərbaycana beynəlxalq
miqyasda göstərilən etimad kimi qiymətləndirdi.
Təhsil naziri ölkə başçısı cənab İlham Əliyevin
5 may 2009-cu il tarixli sərəncamı ilə təsdiq
edilmiş "2009-2014-cü illərdə Azərbaycanda
şahmatın inkişaf etdirilməsi Dövlət Proqramı"
çərçivəsində həyata keçirilən tədbirləri mərasim
iştirakçılarının diqqətinə çatdırdı. Qeyd edildi
ki, proqram qəbul olunduqdan sonra
respublikamızda şahmat hərəkatı daha da inkişaf
etməyə başlamış, şahmat məktəblərinin
maddi-texniki bazasının möhkəmləndirilməsi,
onların müasir inventar və kompüter
avadanlıqları ilə tam təmin olunması
istiqamətində işlər görülüb. Bütün bunların
şahmatçılarımızın beynəlxalq yarışlarda
uğurlarının sayının artmasına zəmin yaratdığını
söyləyən nazir məktəblilərin 2009-cu ildə Avropa
və dünya birinciliklərində 5 medal, 2010-cu ildə
isə 15 medal qazandıqlarını, şahmatçılarımızın
bir sıra digər beynəlxalq turnirlərdə də çoxlu
sayda medal əldə etdiklərini bildirdi. Nazir
Misir Mərdanov şahmat sahəsində mövcud
potensial, bu idman növünün gələcəyinin təmin
edilməsi, şahmatçılarımızın beynəlxalq
yarışlarda daha parlaq uğurlara imza atması
istiqamətində görülən işlərdən biri kimi "Şahmat
dünyası" multimedia sisteminin hazırlanmasını
yüksək dəyərləndirdi. Təhsil naziri qeyd etdi
ki, multimedia sistemində bölmələrdə verilən
mövzular yüksək səviyyəli peşəkar şahmatçılar və
beynəlxalq dərəcəli məşqçilər tərəfindən
yazılıb. Dünya təcrübəsinə əsaslanan bu tədris
vəsaitinin gənc şahmatçılarımız üçün gözəl bir
töhfə olduğunu söyləyən nazir hazırda "Şahmat
dünyası" multimedia sisteminin 2-ci hissəsinə
hazırlıq işlərinin görüldüyünü, bura Azərbaycan
şahmatçılarının yaradıcılığı, debüt hazırlığı,
taktika və kombinasiyalar, şahmat praktikasında
rast gəlinən mübahisəli hallar, klassik
bəstələr, dünya çempionlarının 101 miniatürü və
digər bölmələrin daxil ediləcəyini bildirdi.
Bundan başqa, şahmat tarixində ən vacib sayılan
15 adda tədris vəsaitinin tərcümə edilməsi və
onun elektron multimedia sisteminin hazırlanması
nəzərdə tutulduğu da qeyd olundu.
Çıxışının sonunda təhsil naziri "Şahmat dünyası"
multimedia sisteminin hazırlanmasında əməyi olan
hər bir kəsə təşəkkürünü bildirərək
şahmatçılarımızın ölkəmizi bundan sonra da
mötəbər yarışlarda layiqincə təmsil
edəcəklərinə ümidvar olduğunu söylədi.
Azərbaycan şahmatçılarının ümummilli lider
Heydər Əliyevin qayğısı və diqqəti sayəsində
dünya arenasında tanınmasından, ölkə başçısı
cənab İlham Əliyev tərəfindən idmanın bütün
sahələrinin, o cümlədən şahmatın inkişafı
istiqamətində aparılan məqsədyönlü işlərdən söz
açan təhsil nazirinin müavini Elmar Qasımov əldə
olunan uğurlu nəticələrdən danışdı. Nazir
müavini bildirdi ki, həyata keçirilən
tədbirlərin nəticəsidir ki, Azərbaycanda
şahmatın kütləviliyi artıb, uşaq-gənclər şahmat
məktəbləri ən müasir avadanlıqlarla, informasiya
- kommunikasiya texnologiyaları ilə təmin
edilib, elektron vəsaitlər hazırlanaraq gənc
şahmatçıların ixtiyarına verilib. Bundan başqa,
xarici ölkələrdə keçirilən nüfuzlu yarışlarda
şahmatçılarımızın mütəmadi olaraq iştirakı təmin
olunub. Elmar Qasımov bu gün bizim tanınmış
şahmatçılarımızla yanaşı perspektivli,
ümidverici yeniyetmələrin də yetişdiyini və
onların yaxın illərdə xoş sorağının mötəbər
yarışlardan gələcəyinə əmin olduğunu söyləyərək
həmin idmançıların adlarını qeyd etdi. Nazir
müavini daha sonra mərasim iştirakçılarına
şahmatın inkişafı ilə bağlı Təhsil Nazirliyinin
həyata keçirdiyi tədbirlər barədə də ətraflı
məlumat verərək şahmatçıların ixtiyarına verilən
"Şahmat dünyası" multimedia sisteminin
əhəmiyyətinə toxundu.
Sonra "Şahmat dünyası" multimedia sisteminin
təqdimatı oldu. Elektron vəsaitdə ayrı -ayrı
bölmələrdə şahmat tarixi, Azərbaycanda şahmatın
tarixi, ölkəmizdə şahmatın inkişafına göstərilən
dövlət qayğısı öz əksini tapıb. Adıçəkilən
multimedia sisteminə daxil olan istifadəçi
həmçinin hakimlik, şahmat bəstəçiliyi, gedişlər
və uduşlar, fiqurların gediş qaydaları, dahi
şəxsiyyətlər, bütövlükdə şahmat, eləcə də
tanınmış şahmatçılarımız barədə ətraflı
məlumat almaqla yanaşı, həmçinin bu sahədə
işlənən terminlərin izahlı lügəti ilə tanış
olmaq imkanı əldə edəcəkdir.
Çıxış üçün söz alan gənclər və idman nazirinin
müavini İsmayıl İsmayılov, Ailə, Qadın və Uşaq
Problemləri üzrə Dövlət Komitəsinin sədr müavini
Aynur Sofiyeva, "Çaşıoğlu-Multimedia" şirkətinin
direktoru Rəhilə Səfərəliyeva, Şamaxı rayon
Uşaq-Gənclər Şahmat Məktəbinin direktoru Asif
Ağayev ölkəmizdə şahmatın inkişafına göstərilən
diqqət və qayğıdan danışdılar və "Şahmat dünyası"
multimedia sisteminin istifadəyə verilməsinin
şahmatçılar, eləcə də şahmatsevərlər üçün
qiymətli bir hədiyyə olduğunu bildirdilər.
Mərasimin sonunda təhsil naziri Misir Mərdanov "Şahmat
dünyası" multimedia sisteminin ilk nüsxələrini
gənc şahmatçılara təqdim edərək onlara daha
yüksək nailiyyətlər əldə etməyi arzuladı.
Samirə KƏRİMOVA |
|
