|
Bakı Biznes Universitetində
Tələbə Elmi Cəmiyyətinin ümummilli lider Heydər
Əliyevin anadan olmasının 88-ci ildönümünə həsr
olunmuş konfransı keçirilib. Konfransda
Azərbaycan Dövlət Neft Akademiyasından, Bakı
Dövlət, Qafqaz və Bakı Slavyan
universitetlərindən, Azərbaycan Müəllimlər
İnstitutundan müəllim və tələbələr iştirak
ediblər.
Konfransı Bakı Biznes Universitetinin rektoru,
professor İbad Abbasov açaraq tələbələrin elmi
yaradıcılığına baxış olan konfransın
əhəmiyyətini qeyd edib, ulu öndərin ölkəmizdə
hakimiyyətdə olduğu bütün dövrlərdə
tələbə-gənclərin təhsilinə, gənc elmi kadrların
yetişməsinə böyük diqqət yetirdiyini vurğulayıb,
konfransın işinə uğurlar arzulayıb.
Konfransın plenar iclasında BBU-nun tələbəsi
Tacir Məmmədov, "Marketinqin inkişaf
perspektivləri", aspirant Rauf Abbasov "Azərbaycan
Respublikası qiymətli kağızlar bazarının
idarəedilmə mexanizmi" mövzularında məruzə
ediblər.
Sonra konfrans öz işini bölmələrdə davam
etdirib. "İqtisadiyyat", "İnformasiya sistemləri,
riyaziyyat, mühasibat uçotu, audit, maliyyə və
kredit", "Humanitar fənlər", "Dillər" bölmələri
üzrə 8 seksiyada160-dək məruzə dinlənilib.
Konfransda Bakı Biznes Universitetinin gənc
tədqiqatçıları ilə bərabər digər ali təhsil
ocaqlarından gələn xeyli aspirant və tələbə də
maraqlı məruzələrlə çıxış edib. Sonda
fərqlənənlərə diplomlar təqdim olunub.
***
Bakıdakı 152 nömrəli tam orta məktəbdə
ümummilli lider Heydər Əliyevin anadan
olmasının 88-ci ildönümü münasibəti ilə tədbir
keçirildi.
Əvvəlcə tədbir iştirakçıları məktəbin foyesində
ulu öndərin həyat və fəaliyyətinin bəzi
məqamlarını əks etdirən fotolardan ibarət sərgi
ilə tanış oldular.
Şagirdlərin ifasında Dövlət himninin səslənməsi
ilə başlanan tədbiri giriş sözü ilə açan
direktor Gülarə Verdiyeva Vətəninə, millətinə,
dövlətinə tükənməz sevgisi olan dahi şəxsiyyət
Heydər Əliyevin həyat yolundan və ölkənin
inkişafı üçün gördüyü işlərdən danışdı.
Tədbirin aparıcıları ulu öndər Heydər Əliyevin
müdrik kəlamlarından söz açdılar. Şagirdlər
ümummilli lider Heydər Əliyevə həsr olunmuş
şeirlər söylədilər, mahnılar ifa etdilər.
Tədbirin sonunda ümummilli liderə həsr olunmuş
film nümayiş olundu.
***
Bakıdakı 114 nömrəli tam orta məktəbdə də
müstəqil Azərbaycanın memarı, ulu öndər Heydər
Əliyevin anadan olmasının 88-ci ildönümü
təntənə ilə qeyd edildi.
Akt zalında təşkil olunmuş tədbirdə ümummilli
lider Heydər Əliyevin xatirəsi bir dəqiqəlik
sükutla yad edildi. Tədbirin aparıcıları olan
şagirdlər dahi şəxsiyyət Heydər Əliyev haqqında
ətraflı məlumat verərək bildirdilər ki, ulu
öndər zəmanəmizin ən nəhəng, güclü
siyasətçilərindən biridir. Qeyd olundu ki,
Heydər Əliyev dərin ağılı, iti zəkası, güclü
məntiqi ilə hamını heyrətə gətirən, xalqını və
Vətənini sonsuz məhəbbətlə sevən şəxsiyyət idi.
Şagirdlərin ulu öndər haqqında söylədikləri
şeirlər tədbir iştirakçıları tərəfindən maraqla
qarşılandı. Məktəbin direktoru Ceyran Novruzova
da xalqın sevimlisi, dünya şöhrətli siyasətçi
Heydər Əliyevin xidmətlərindən söz açdı.
Səhnəyə çıxan şagirdlər Heydər Əliyevin xatirəsi
önündə baş əydiklərini, böyük öndərin
arzularının, ideyalarının həyata keçirilməsi
üçün üzərlərinə böyük məsuliyyətin düşdüyünü
bildirdilər. Həmişə müqəddəs Vətən uğrunda
mübarizədə ön cərgədə olacaqlarına söz verdilər.
***
Bakıdakı fizika-riyaziyyat və informatika
təmayüllü liseydə "Heydər Əliyevin həyatı
gənclərə örnəkdir" mövzusunda mərasim
keçirildi. Direktor müavini Valeh Bəyalıyev
mərasimi giriş sözü ilə açaraq qeyd etdi ki,
dünya şöhrətli siyasətçi, görkəmli dövlət
xadimi, tariximizə qurucu xilaskar kimi daxil
olmuş ulu öndər Heydər Əliyev xalqımızın
taleyində, ictimai-siyasi, mənəvi həyatında
misilsiz rolu olan dahi bir şəxsiyyətdir.
Heydər Əliyev şəxsiyyətinin müdrikliyi,
böyüklüyü ondadır ki, onun ideyaları, əməli
fəaliyyəti təkcə bu günümüzə deyil, həm də uzaq
gələcəyə yönəlirdi. Çıxışlarda vurğulandı ki,
milli tərəqqidə təhsilin əvəzsiz rolu
olduğunu deyən ulu öndər Heydər Əliyevin
zəngin yaradıcılıq irsi, şəxsi nümunəsi və
dövlətçilik fəaliyyəti gənc nəslin milli və
ümumbəşəri dəyərlər zəminində tərbiyə olunması
və təhsil alması işinin səmərəli təşkili üçün ən
qiymətli mənbədir.
Çıxışlardan sonra "Heydər Əliyev və müstəqil
Azərbaycan", "Zəmanəmizin ən böyük
azərbaycanlısı" mövzularında guşələrə baxış
keçirildi.
***
Bakıdakı X.Quliyev adına 62 nömrəli
məktəb-liseydə təşkil olunan tədbirdə Nizami
Rayon İcra Hakimiyyətinin başçısı Tahir
Budaqov, millət vəkilləri Sevinc Hüseynova,
Flora Qasımova, Yeni Azərbaycan Partiyasının
Nizami rayon təşkilatının sədri, millət vəkili
Sədaqət Vəliyeva, Qafqaz Universitetinin
rektoru, professor Ahmet Saniç, Bakı Şəhər İcra
Hakimiyyəti başçısının müavini Fidumə Hüseynova,
Bakı Şəhəri üzrə Təhsil İdarəsinin müdir müavini
Məmməd Bayramov, məktəb direktorları,
valideynlər və digər qonaqlar iştirak edirdilər.
Şagirdlərin hazırladıqları ədəbi-bədii tədbiri
açıq elan edən tədris ocağının rəhbəri Mətanət
Cabbarlı ümummilli lider Heydər Əliyevin
Azərbaycan xalqının inkişafında, dünya ölkələri
arasında tanınmasında misilsiz xidmətlərindən
söz açdı. Bildirdi ki, Heydər Əliyevin rəhbər
və lider kimi tarixi fəaliyyəti nəsillər üçün
böyük bir məktəbdir. Ulu öndər Azərbaycan
xalqının və dövlətinin canlı tarixidir. O, XX
əsrdə Azərbaycan xalqının bəşəriyyətə bəxş
etdiyi nadir şəxsiyyətlərindən biri, dünya
şöhrətli siyasətçi, qüdrətli və xalqını sevən
dövlət başçısı idi.
Tədbirin aparıcıları dahi şəxsiyyətin
fəaliyyəti barədə iştirakçılara geniş məlumat
verdilər. Şagirdlər ümummilli lider Heydər
Əliyevə həsr olunan şeirlərdən parçalar
söylədilər, mahnılar ifa etdilər.
Tədbirin sonunda iştirakçılar Heydər Əliyevə
həsr olunan "açıq dərs"lərdə iştirak etdilər,
"dəyirmi masa"da dərslərin müzakirəsini
apardılar.
"Azərbaycan müəllimi" |
