|
 Koreya
Respublikasının Beynəlxalq Əməkdaşlıq
Agentliyinin işçi qrupu, Azərbaycan Respublikası
Təhsil Nazirliyi və Azərbaycan Texniki
Universiteti tərəfindən hazırlanmış "Azərbaycan
Texniki Universitetinin Elektron Təhsil
Sisteminin yaradilması" layihəsinə dair
müqavilənin imzalanma mərasimi keçirilmişdir.
AzTU-da keçirilmiş tədbiri giriş sözü ilə
universitetin rektoru, texnika elmləri doktoru,
professor Havar Məmmədov açaraq qonaqları
salamlamış və imzalanacaq müqavilənin
əhəmiyyətindən danışmışdır. O qeyd etmişdir ki,
layihənin məqsədi elektron təhsil sisteminin
yaradılması vasitəsilə AzTU-nun idarəçilik
işlərində səmərəliliyi və məhsuldarlığı artırmaq,
sistem vasitəsilə AzTU-nun tələbələri üçün
müvafiq distant təhsil xidmətini təmin etmək,
koreyalı ekspertlərin ezam olunmasını və bir
sıra təlim proqramları vasitəsilə zəruri
texnologiya və biliyin ötürülməsi yolu ilə
sistemin davamlı istismarı və idarə olunması
üçün azərbaycanlı mühəndis və müvafiq
mütəxəssislərin bacarıqlarını artırmaqdan
ibarətdir. Layihənin müddəti iyirmi səkkiz ay
davam edəcəkdir. Layihə üçün KOICA-nın ayırdığı
büdcə iki milyon ABŞ dollarına bərabərdir.
Təhsil Nazirliyi və AzTU öhdəliklərinin yerinə
yetirilməsi üçün tələb olunan kifayət qədər
büdcə və işçi qüvvəsini təmin edəcəkdir. KOICA
AzTU-nun elektron təhsil sistemini inkişaf
etdirib həyata keçirəcək. AzTU-nun elektron
təhsil sistemi akademik idarəetmə sistemi,
portal sistemi, Veb server sistemi, elektron
poçt sistemi, Group təminat sistemi, elektron
təhsil sistemi və elektron təhsildən ibarətdir.
Sonra Azərbaycan Respublikası təhsil nazirinin
müavini Elmar Qasımov və Koreya Beynəlxalq
Əməkdaşlıq Agentliyinin (KOICA) Azərbaycan
nümayəndəliyinin rəhbəri KimYonq-vu çıxış edərək
imzalanacaq müqaviləni yüksək qiymətləndirmiş və
uğurlar arzulamışlar.
Daha sonra müqavilə Azərbaycan Respublikası
təhsil nazirinin müavini Elmar Qasımov, AzTU-nun
rektoru, texnika elmləri doktoru, professor
Havar Məmmədov və KOICA-nın Azərbaycan
nümayəndəliyinin rəhbəri KimYonq-vu tərəfindən
imzalanmışdır.
Müşfiq BORÇALI |
