|
Aprelin 26-da Bakıdakı 147 nömrəli
texniki-humanitar liseydə dövlət
müstəqilliyimizin bərpasının iyirmi illiyinə
həsr olunmuş ədəbi-bədii-tarixi gecə keçirildi.
Tədbirə Təhsil Nazirliyindən, Xətai Rayon İcra
Hakimiyyətindən, Bakı Şəhəri üzrə Təhsil
İdarəsindən, Təhsil Problemləri İnstitutundan
qonaqlar, məktəb direktorları, valideynlər, KİV
nümayəndələri dəvət olunmuşdular.
 Ədəbi-bədii
gecəni qonaqları salamlamaqla açan liseyin
direktoru, əməkdar müəllim Həlimə Mehdiyeva
bildirdi ki, bu il dövlət müstəqilliyimizin
bərpasının iyirminci ildönümü tamam olur. Bu
tarixi hadisəni ümumxalq bayramı səviyyəsində
qeyd etmək üçün ölkə Prezidenti cənab İlham
Əliyev xüsusi sərəncam imzalayıb. "Azərbaycan
Respublikasının dövlət müstəqilliyinin
bərpasının iyirminci ildönümü haqqında" 21
yanvar 2011-ci il tarixli həmin sərəncama,
habelə Təhsil Nazirliyinin müvafiq əmrinə əsasən
ilboyu bütün tədris müəssisələrində
müstəqilliyimizin 20 illiyinə həsr olunmuş
tədbirlərin təşkili nəzərdə tutulub. Bununla
bağlı liseyimizdə də silsilə tədbirlər həyata
keçirilməkdədir. Ayrı-ayrı siniflərdə istər dərs
prosesində, istərsə də əlavə məşğələlərdə, açıq
sinif saatlarında şagirdlərlə müstəqilliyimiz
haqqında söhbətlər aparılıb və bu iş davam
etdirilir. Bugünkü tədbir də həmin silsilədəndir.
Liseyin bir qrup şagirdi Dövlət himnimizi ifa
etdikdən sonra söz tarix müəllimi, "Ən yaxşı
müəllim" müsabiqəsinin qalibi Gültəkin
Məmmədovaya verildi. G.Məmmədova "Müstəqilliyimiz
əbədidir" mövzusunda geniş məruzəsində ötən
əsrin 80-ci illərinin sonu, 90-cı illərinin
əvvəllərində müstəqilliyimizin bərpası üçün
xalqımızın apardığı mübarizədən,
müstəqilliyimizin ilk illərində yaşanan çətin
vəziyyət və problemlərdən, müstəqil Azərbaycanın
memarı və qurucusu, ulu öndər Heydər Əliyevin
xalqın təkidi ilə ikinci dəfə hakimiyyətə
gəlişindən sonra ölkədə sabitliyin yaranması,
müstəqilliyimizin möhkəmləndirilməsi
istiqamətində gördüyü işlərdən, dövlətimizin
iqtisadi qüdrətinin artırılmasına gətirib
çıxaran irimiqyaslı layihələrdən, son illər
Azərbaycan Prezidenti İlham Əliyevin yeritdiyi
müdrik daxili və xarici siyasət nəticəsində
ölkəmizin iqtisadi inkişaf tempinə görə dünyada
ön mövqelərə çıxmasından və regionun aparıcı
dövlətinə çevrilməsindən danışdı və bunları
müstəqilliyimizin bəhrələri kimi dəyərləndirdi.
IX sinif şagirdi Vüqar Kərimzadə "Tarixi yazan
şəxsiyyət" mövzusundakı çıxışında ümummilli
lider Heydər Əliyevin həyat və fəaliyyətindən,
zəngin bioqrafiyasının bəzi məqamlarından söz
açdı, müstəqilliyimizi əbədi və dönməz etmiş bu
böyük şəxsiyyətin xalqımız qarşısındakı
nəsillərə örnək xidmətlərindən danışdı.
Şagird Nəzrin Həsənovanın "Layiqli davamçı"
mövzusundakı çıxışı da tədbir iştirakçıları
tərəfindən diqqətlə dinlənildi. Nəzrin
Azərbaycan Prezidenti İlham Əliyevin həyat
yoluna qısaca nəzər saldı, onun rəhbərliyi
altında son illər ölkəmizdə aparılan nəhəng
quruculuq işlərindən, islahatlardan, bunların
nəticəsində əldə olunmuş uğurlardan danışdı,
onun ölkəmizin gələcəyi olan gənclərə böyük
diqqət və qayğı göstərdiyini vurğuladı.
Tədbirin rəsmi hissəsi başa çatdıqdan sonra
liseyin istedadlı şagirdləri maraqlı ədəbi-bədii
proqram nümayiş etdirdilər. Ayrı-ayrı siniflərin
şagirdlərinin ifasında Azərbaycana, müstəqilliyə
həsr olunmuş şeirlər, mahnılar səsləndi.
Tədbirin sonunda qonaqlardan Təhsil Nazirliyinin
əməkdaşı Adilə Mahmudova, "Azərbaycan məktəbi"
jurnalının baş redaktoru Nəcəf Nəcəfov, Xətai
Rayon İcra Hakimiyyətinin əməkdaşı Məhəmməd
İbrahimov, Bakı Şəhəri üzrə Təhsil İdarəsi
Metodik Mərkəzi müdirinin müavini Sitarə
Məmmədova, valideyn, Müdafiə Sənayesi
Nazirliyinin əməkdaşı Alçın Şirinzadə, 56
nömrəli məktəbin direktoru Hicran Qarayeva çıxış
edib tədbirdən böyük zövq aldıqlarını, müəllim
və şagirdlərin çıxışlarının çox məzmunlu
olduğunu, bir çox məsələlərdə olduğu kimi belə
tədbirlərin təşkilində də 147 nömrəli
texniki-humanitar liseyin rayon ərazisindəki
məktəblərə yaxşı nümunə göstərdiyini söylədilər,
liseyin rəhbərliyinə və tədbirin təşkilində
əməyi olan digər müəllimlərə minnətdarlıqlarını
bildirdilər, müstəqilliyimizlə bağlı öz
fikirlərini bölüşdülər.
Yusif ƏLİYEV |
|
