|
 Azərbaycan
Milli Aviasiya Akademiyasının (AMAA) tələbəsi
Emil Vahablı A.F.Mojayski adına Beynəlxalq
Aviasiya Olimpiadasından zəngin "qənimətlərlə"
qayıtmışdır. Təxminən 40 ölkənin gənc aviasiya
tədqiqatçılarının qoşulduqları bu intellekt
yarışında azərbaycanlı tələbə birinci yeri
tutaraq "Olimpiadanın qalibi" diplomuna, onun
qələbəsini təsdiq edən sertifikata, habelə "A.F.Mojayski"
medalına layiq görülmüşdür. Bundan əlavə,
həmyerlimizə münsiflər heyətinin hədiyyəsi olan
"İPAD" markalı mikrokompüter də təqdim
edilmişdir. AzərTAc-ın müxbiri qeyri-adi yarışın
qalibinə bir neçə sualla müraciət etmişdir.
Cavablar Emil Vahablının yüksək intellektual
səviyyəyə malik olduğunu bir daha təsdiqləyir.
- Emil, səni Azərbaycan Milli Aviasiya
Akademiyasına qovuşduran yolun ən yığcam "xəritəsini"
necə təsvir edərdin?
- Səfalı Qax şəhərində doğulmuşam. Bakıdakı 257
nömrəli orta məktəbi bitirmişəm. Uşaqlıqdan
aviasiya sahəsinə, aviator peşəsinə böyük
marağım olmuşdur. Orta məktəbin sonuncu
sinfindən indiyədək aviamodelçilik dərnəyinə
gedirəm. 2009-cu ildə test qəbul imtahanında 604
bal toplayaraq AMAA-nın hava nəqliyyatının uçuş
texniki istismarı fakültəsinin rus bölməsinə
daxil olmuşam. Hazırda ikinci kursda oxuyuram.
Aviasiya texnikası avadanlıqlarının istismarı
üzrə mühəndis-mexanik ixtisasına yiyələnirəm.
Əlaçılıq təqaüdü alıram.
 -
Belə nüfuzlu Beynəlxalq Olimpiadaya necə qatıla
bildin? Bu çətin yarışda birinci yer tutmağının
sirri nədədir?
- A.F.Mojayski adına Beynəlxalq Aviasiya
Olimpiadası artıq səkkizinci dəfədir ki, hər
tədris ilində Moskva şəhərində keçirilir.
Olimpiadada iştirak etmək istəyənlər İnternet
vasitəsilə Təşkilat Komitəsinin ilkin test
suallarını cavablandıraraq, növbəti tura vəsiqə
alırlar. Mən ilkin 15 suala düzgün cavab
göndərdiyim üçün əsas tədqiqat işimi təqdim
etmək hüququ qazandım. Elmi-tədqiqat işim
təyyarələrdə güc qurğularının analizi mövzusunda
idi. İşimin bəyənildiyi və Beynəlxalq
Olimpiadanın yekun turuna dəvət olunmağım barədə
Azərbaycan Respublikasının Təhsil Nazirliyinə
məktub daxil oldu. Bundan sonra Azərbaycan Milli
Aviasiya Akademiyasının rektoru, akademik Arif
Paşayevin və "Azərbaycan Hava Yolları" Qapalı
Səhmdar Cəmiyyətinin prezidenti Cahangir
Əsgərovun xeyir-duaları ilə Moskva şəhərinə ezam
olundum.
Olimpiadanın yekun turu aprelin 21-22-də
keçirildi. Mənim apardığım elmi-tədqiqat işi ilə
əlaqədar geniş məruzəm dinlənildi. Təyyarələrdə
müxtəlif təyinatlı, konstruksiyalı güc
qurğularının tətbiqi üzrə elmi arqumentlərimi
müdafiə etdim. Münsiflər heyətinin üzvləri
yekdilliklə mənim işimi və test suallarına
cavablarımı birinci yerə layiq gördülər. Onu da
deyim ki, bu olimpiadada ikinci yerə Ukraynanın,
üçüncü yerə Rusiyanın təmsilçiləri çıxdılar.
Aviasiya sahəsində intellekt yarışının qəhrəmanı
Emil Vahablının dediklərinə əlavə olaraq qeyd
edək ki, onun uğuru təkcə təhsil aldığı ali
məktəbə - Azərbaycan Milli Aviasiya
Akademiyasına deyil, bütün Azərbaycana
başucalığı gətirmişdir. |
