|
Bu barədə Tələbə Qəbulu üzrə Dövlət
Komissiyasının sədri Məleykə Abbaszadə mayın
13-də keçirdiyi mətbuat konfransında məlumat
verib. TQDK sədrinin dediyinə görə, əgər ötən il
ali məktəblərə qəbul planında dövlət sifarişli
yerlərin sayı 10429 idisə, bu il 10616-dır.
M.Abbaszadə bəzi ixtisaslar üzrə dövlət
sifarişli hər bir yer üçün büdcədən ayrılan
vəsaitin artırılaraq 2000-2500 manata
çatdırıldığını da söylədi.
Ali təhsil müəssisələrinə və tam orta təhsil
bazasından orta ixtisas təhsili müəssisələrinə
qəbul imtahanlarında iştirak etmək üçün ərizə
qəbulunun gedişi ilə bağlı keçirilən mətbuat
konfransında M.Abbaszadə bildirdi ki, mayın
əvvəlindən başlayan sənəd qəbulu davam edir.
Abituriyentlərin mayın 31-dək İnternet vasitəsi
ilə elektron ərizələrini doldurmalı və tələb
olunan sənədləri ölkənin bölgələrində yaradılmış
sənəd qəbulu komissiyalarına təqdim edərək
ərizələrini təsdiq etdirməli olduqlarını deyən
TQDK sədri ölkədə elektron imza haqqında qanun
qəbul olunsa da, onun praktik reallaşması
kütləvi şəkil almadığından abituriyentlərin öz
elektron ərizələrini təsdiqləməsi prosedurunun
hələlik sənəd qəbulu komissiyalarında
aparıldığını diqqətə çatdırdı. Bildirdi ki,
ölkədə elektron imza kütləvi tətbiq olunduqdan
sonra TQDK bu prosesi heç bir sənəd qəbulu
komissiyasının, məmurun iştirakı olmadan
elektron formada aparacaq.
M.Abbaszadə xüsusi qabiliyyət tələb edən
ixtisaslar üzrə təhsil almaq istəyən
abituriyentlərlə bağlı məsələyə də aydınlıq
gətirərək bildirdi ki, həmin abituriyentlər
qəbul imtahanlarında iştirak etmək üçün, ilk
növbədə, ümumi qaydada elektron ərizə formasını
doldurmalı, onu təsdiq etdirməli və seçdikləri
ixtisasa müvafiq Qabiliyyət İmtahanı
Komissiyasında mayın 31-dək TQDK tərəfindən
mərkəzləşdirilmiş qaydada keçiriləcək seçmə
turda iştirak etməli, müvəffəqiyyət qazandıqları
təqdirdə qeydiyyatdan keçməlidirlər.
Bildirildi ki, seçmə tur təsviri sənət, musiqi
sənəti, memarlıq və dizayn, teatr, kino və
xoreoqrafiya sənətləri, bədən tərbiyəsi və idman
istiqamətləri üzrə keçirilir. Qabiliyyət
İmtahanı Komissiyaları ali təhsil müəssisələri
üzrə Bakı, Naxçıvan və Gəncə şəhərlərində, tam
orta təhsil bazasında orta ixtisas təhsili
müəssisələri üzrə Bakı, Naxçıvan, Gəncə,
Lənkəran, Şəki şəhərlərində və Ağdam rayonunun
Quzanlı qəsəbəsində fəaliyyət göstərir. Bakı
şəhərində 6 (ADRA, BMA, AMK nəzdində Musiqi
Kolleci, AMİU-nun nəzdində Texniki lisey,
ADMİU-nun "Səda" Tədris Teatrı, ADBTİA),
regionlar üzrə isə 6 (NDU, GDU, ADAU, Şəki
Musiqi Kolleci, Lənkəran Dövlət Humanitar
Kolleci, Ağdam Musiqi Kolleci) tədris
müəssisəsində Qabiliyyət İmtahanı Komissiyası
təşkil olunmuşdur.
Bundan əlavə, teatr, kino və xoreoqrafiya
sənətləri istiqaməti üzrə Gəncə şəhərində Gəncə
Dövlət Dram Teatrında, Naxçıvan şəhərində
Naxçıvan Dövlət Musiqili Dram Teatrında, Şəki
şəhərində Şəki Dövlət Dram Teatrında və Lənkəran
şəhərində Lənkəran Dövlət Dram Teatrında seçmə
tur keçiriləcəkdir.
M.Abbaszadə hər bir istiqamət üzrə seçmə turun
cədvəlinin TQDK-nın İnternet səhifəsində
yerləşdirildiyini, qabiliyyət imtahanlarının
proqramları, qiymətləndirmə meyarları, tapşırıq
nümunələri və müvafiq metodik tövsiyələrin isə
"Abituriyent" jurnalının xüsusi buraxılışlarında
dərc edildiyini diqqətə çatdırdı.
Mətbuat konfransında rus bölməsinin
abituriyentləri üçün Azərbaycan dili fənnindən
imtahanların keçirilmə tarixləri də açıqlandı.
Bildirildi ki, rus bölməsinə sənəd verən
abituriyentlər üçün Azərbaycan dili fənnindən
imtahan 2 dəfə - mayın 22-də Bakıda və digər
bölgə mərkəzlərində, iyunun 26-da isə yalnız
Bakıda keçiriləcək. Mayın 16-dək ərizəsini
təsdiq etdirənlər mayın 22-də, sonra təsdiq
etdirənlər və birinci imtahandan müvəffəq qiymət
ala bilməyənlər isə iyunun 26-da keçiriləcək
imtahanda iştirak edə bilərlər.
TQDK sədri Rusiya Federasiyasının ali təhsil
müəssisələrinə qəbulla bağlı məsələləri də
diqqətə çatdırdı. Bildirdi ki, hər il olduğu
kimi bu il də RF-nın ali məktəblərinə qəbul üçün
elan verilib. Bu məqsədlə 46 yer bakalavr, 2 yer
isə magistratura təhsili, 3 yer də Moskva Dövlət
Beynəlxalq Əlaqələr İnstitutuna ayrılıb. İki
mərhələdən ibarət olan müsabiqənin I
mərhələsində abituriyentlər TQDK tərəfindən
keçirilən test imtahanında iştirak edəcəklər.
Test imtahanı mayın 21-də keçiriləcək. Test
imtahanının nəticəsində I ixtisas qrupunda 350
və daha yüksək, digər qruplarda 400 və daha
yüksək (MDBMİ-nin müsabiqəsində 500 və daha
yüksək) bal toplayan abituriyentlər II mərhələyə
- müsahibəyə buraxılacaqlar. Müsahibə mayın
23-də keçiriləcək.
Mətbuat konfransının sonunda M.Abbaszadə KİV
əməkdaşlarını maraqlandıran sualları
cavablandırdı.
Yusif ƏLİYEV |
|
