|
Bakının Binəqədi rayonunda yerləşən 144
nömrəli tam orta məktəbdə müstəqilliyimizin
bərpasının 20 illiyi münasibəti ilə tədbir
keçirildi. Məktəbin yuxarı sinif şagirdlərinin
ifasında Azərbaycan Respublikasının Dövlət himni
səsləndirildi. Əsgər paltarı geyinmiş şagirdlər
dahi bəstəkar Üzeyir Hacıbəylinin uvertürasının
sədaları altında Dövlət bayrağını səhnəyə
gətirdilər.
Tədbiri giriş sözü ilə açan məktəbin direktoru
Raya Allahverdiyeva müstəqilliyimizin tarixi
kökləri haqqında danışdı. Bildirildi ki,
müstəqilliyin əziyyətlə qazanılması nə qədər
çətin idisə, onun qorunub saxlanılması bir o
qədər çətin idi. Belə bir dövrdə Azərbaycanda
xalqın tələbi ilə hakimiyyətə gələn ümummilli
lider Heydər Əliyev ölkəmizi parçalamağa çalışan
qara qüvvələrə qarşı mübarizə apararaq yeni
yaranmış dövlətimizin varlığını qoruyub
saxlamışdır. Ulu öndər Heydər Əliyev xalqımızı
müstəqilliyə, əmin-amanlığa çıxardı. Onun dərin
zəkası, zəngin biliyi, qətiyyəti, daxili və
xarici siyasətdəki uğurları sayəsində
müstəqilliyimiz möhkəmlənir, ölkəmiz gündən-günə
inkişaf edir və çiçəklənir.
Şagirdlər müstəqilliyimizə həsr olunmuş
mahnılarla, şeirlərlə tədbiri daha da maraqlı
etdilər.
Çıxış edənlər təhsil ocaqlarında belə
tədbirlərin keçirilməsini təqdirəlayiq hal hesab
etdilər. Dövlət müstəqilliyimizin
möhkəmlənməsində və əbədi olmasında ulu öndər
Heydər Əliyevin misilsiz xidmətlərindən söz
açıldı.
Tədbirin sonunda müstəqilliyimizə həsr olunmuş
film nümayiş olundu.
Rəşad ZİYADOV |
