|
Tərkibində ali, orta ixtisas, ümumtəhsil və
məktəbəqədər təhsil müəssisələri olan təhsil
kompleksləri dünyada çoxdan mövcuddur və özünü
artıq doğruldub. Son illər ölkəmizdə həyata
keçirilən təhsil islahatları, təhsilimizin
beynəlxalq təhsil məkanına inteqrasiyası yönündə
atılan addımlar nəticəsində Azərbaycanda da belə
təhsil strukturları yaranmışdır. Hazırda
ölkəmizdə tərkibində orta ixtisas, orta
ümumtəhsil məktəbləri, hətta uşaq bağçaları olan
xeyli ali məktəb fəaliyyət göstərir. Onlardan
biri də Xəzər Universitetidir. Ölkəmizdə ilk
ingilisdilli özəl ali təhsil müəssisəsi olan bu
universiteti həm də öz nəzdində orta ümumtəhsil
məktəbi yaratmaq ideyasını ilkin gerçəkləşdirən
ali məktəblərimizdəndir.
 1998-ci
ildə universitetin nəzdində fəaliyyətə başlamış
"Dünya" məktəbi artıq çoxdan bu ideyanın faydalı
olduğunu təsdiq etmiş və bir sıra sanballı
uğurlara imza atmışdır.
Yeni dərs ilində "Dünya" məktəbinə şagird
qəbulunun başlanması ilə əlaqədar, habelə bu
ümumtəhsil müəssisəsinin ictimaiyyətə daha
yaxından tanıtdırılması məqsədi ilə mayın 7-də
məktəbdə bir qrup KİV əməkdaşı ilə görüş
keçirilmişdir. Görüşdə Xəzər Universitetinin
təsisçisi, professor Hamlet İsaxanlı,
universitetin rektoru, professor Con Rayder, "Dünya"
məktəbinin təsisçisi Nailə İsayeva, direktoru
Mərufə Mədətli, beynəlxalq İB proqramının
koordinatoru Rəna Musayeva iştirak edirdilər.
Xəzər Universitetinin təsisçisi, professor
Hamlet İsaxanlı jurnalistləri salamlayıb,
1991-ci ildə təsis olunmuş Xəzər Universitetini
təhsil kompleksinə çevirmək, onun nəzdində
müasir təhsil modelinin tətbiq olunduğu, yeni
təlim forma və metodları ilə işləyən ümumtəhsil
məktəbi yaratmaq ideyası və onu gerçəkləşdirmək
üçün gördükləri işlər barədə onlara qısa məlumat
verdi. Bildirdi ki, dərsdə müəllimin fəal,
şagirdlərin isə passiv iştirakçı olduğu ənənəvi
təlimdən fərqli olaraq əsasını uşaqlara sevgi
təşkil edən, müəllimə istiqamətverici, məşqçi
rolu ayıran, şagirdləri isə dərsin fəal
iştirakçısına çevirən, onların yaradıcı
axtarışlarına geniş meydan verən yeni ümumtəhsil
məktəbi yaratmaq ideyasını həyata keçirmək üçün
universitetin əməkdaşları bir sıra xarici
ölkələrdə olmuş, bu sahədə dünyada mövcud olan
təcrübəni öyrənmişlər. Nəticədə 1998-ci ildə
universitetdə eksperimental ümumtəhsil sinifləri
açılmış və həmin siniflərin bazasında "Dünya"
məktəbi yaradılmışdır. Dünyada əsas beynəlxalq
ünsiyyət vasitəsi olan ingilis dilinin
öyrədilməsinə məktəbdə xüsusi diqqət yetirilir.
 H.İsaxanlı
"Dünya" məktəbinə beynəlxalq status vermək üçün
göstərdikləri fəaliyyətlərdən də söz açdı. Qeyd
etdi ki, bu məqsədlə dünyada ən geniş yayılmış
məktəb tipləri öyrənilmiş və seçim zamanı
Beynəlxalq Bakalavr Təşkilatının beynəlxalq
məktəb tipinə üstünlük verilmişdir. Məktəb
özünün çox yüksək standartları və pedaqoji
dəyərləri ilə bütün dünyada tanınan Beynəlxalq
Bakalavr Təşkilatı (İnternational Baccalaurate
Organization) - İBO-nun çətin
akkreditasiyasından keçərək 2009-cu il yanvarın
16-da "Beynəlxalq İB məktəbi" statusu almış və
İBO-ya üzv olmuşdur. Bu status məktəbin eyni
zamanda həm beynəlxalq İB diplomu, həm də orta
təhsil haqqında attestat alan məzunlarına
birbaşa dünyanın bir çox ölkələrinin ali
məktəblərinə imtahansız qəbul olunmaq imkanı
açıb. İBO-nun proqramları hazırda "Dünya"
məktəbinin tam orta təhsil pilləsində tətbiq
olunur. Məktəbin həmin proqramla işləyən
müəllimləri xarici ölkələrdə xüsusi
treninqlərdən keçmişlər.
Sonra "Dünya" məktəbinin təsisçisi Nailə İsayeva,
direktoru Mərufə Mədətli təhsil ocağının məqsədi,
vəzifələri, strukturu, burada aparılan
təlim-tərbiyə işləri, İB proqramının özəllikləri
ilə bağlı jurnalistləri məlumatlandırdılar. Qeyd
olundu ki, "Dünya" məktəbinin məqsədi təhsilin
bütün pillələrində hərtərəfli inkişaf edən
fərdlər, cəmiyyəti irəli apara bilən vətəndaşlar
yetişdirmək, şagirdlərə fikirləşməyi öyrətmək,
onlara milli mənəvi və bəşəri dəyərləri aşılamaq,
uşaqlarda özünəinam hissi yaratmaqdır.
Müasir təlim-tərbiyə ocağı kimi Azərbaycan
Respublikası Təhsil Nazirliyinin lisenziyası
əsasında fəaliyyət göstərən "Dünya" məktəbinə
qəbul bilik, bacarıq və qabiliyyət nümayişinə
əsaslanan imtahan və müsahibə yolu ilə həyata
keçirilir. Məktəbə qəbulda uğur qazanmayan
şagirdlərə xüsusi təyin olunmuş vaxtda özlərini
yenidən sınamaq imkanı verilir.
Şagirdlərlə yanaşı, müəllimlər də məktəbdə
tədris aparmaq üçün müsabiqə yolu ilə seçilirlər.
Hər bir şagirdin fərqli xüsusiyyətlərini
öyrənmək üçün valideynlərlə fərdi söhbətlər
aparılır.
Təlim və tərbiyənin müxtəlif pillələrinə uyğun
olaraq "Dünya" məktəbi dörd şöbəyə bölünür:
məktəbəqədər (3-5 yaş), ibtidai (1-5-ci siniflər),
əsas və ya natamam orta (6-9-cu siniflər) və tam
orta (10-11-ci siniflər) təhsil şöbələri.
"Dünya" məktəbi tam orta təhsil dövründə (X, XI
siniflərdə) şagirdlərin ixtisasyönümlü təhsilini
həyata keçirir. İxtisas seçimlərini etmiş
şagirdlərə ixtisas fənləri üzrə hazırlıq
dərsləri təşkil edilir.
Xarici ölkələrin təhsil sisteminə inteqrasiyanın
vacibliyini nəzərə alaraq məktəbdə ən çox tədris
edilən fənlərdən biri də ingilis dilidir. Təhsil
ocağında ingilis dili departamenti yaradılmışdır.
İngilis dili dərsləri dünya standartlarına uyğun
təşkil olunur. 2010-2011-ci tədris ilindən "Dünya"
məktəbində ingilis dilində İB Diplom Proqramı
fəaliyyət göstərir. Məktəbi bitirənlər
Beynəlxalq İB diplomu və eyni zamanda Azərbaycan
tam orta təhsil attestatı alırlar.
Şagirdlərin ingilis dilində şifahi nitqinin
inkişaf etdirilməsinə xüsusi fikir verilir. "Dünya"
məktəbində ingilis, rus dillərindən başqa,
şagirdlərin seçimi ilə italyan və ərəb dilləri
də tədris olunur.
Məktəbdə monitorinq və qiymətləndirmə şöbəsi
fəaliyyət göstərir. Bu şöbənin yaradılmasında
əsas məqsəd il boyu müntəzəm olaraq fənlər üzrə
şagirdlərin bilik səviyyəsinin yoxlanılmasını
təşkil etmək və onun qiymətləndirilməsində
obyektivliyi təmin etməkdir. Şagirdlərə yüksək
mədəniyyət vərdişləri aşılamaq məqsədi ilə
məktəbdə etika tədris olunur. Bundan əlavə,
məqsədli ədəbi-bədii gecələrin, xeyriyyə
tədbirlərinin keçirilməsi məktəbin şagirdlərinə
yüksək əxlaqi keyfiyyətlər aşılayır.
"Dünya" məktəbində peşəkarlığa, məsuliyyət və
əməkdaşlığa, qarşılıqlı hörmətə, dostluğa və
səmimiyyətə əsaslanan gözəl iş şəraiti və mənəvi
mühit hökm sürür. Zəngin və rahat kitabxana,
müasir kompüterlər, laboratoriyalar, işıqlı və
geniş sinif otaqları, incəsənət studiyası,
müasir işıq və səs sistemi olan yaraşıqlı
konsert salonu, idman zalı, yeməkxana, həkim
nəzarəti, şagirdlərin evdən məktəbə və məktəbdən
evə hərəkətini təmin edən nəqliyyat xidməti
sayəsində məktəb bənzərsiz bir təhsil-təlim
ocağına çevrilmişdir.
Görüşün sonunda universitetin və məktəbin
rəhbərləri jurnalistləri maraqlandıran sualları
cavablandırdılar.
Yusif ƏLİYEV |
