|
Qafqaz Universitetinin 2010-2011-ci tədris
ilində təşkil etdiyi aylıq seminarlar
silsiləsinin növbəti məşğələsi keçirilib.
Seminarda BMT-nin Azərbaycandakı
rezident-əlaqələndiricisi cənab Fikrət Akçuranın
"BMT-nin strukturu, fəaliyyət sahələri və
Azərbaycanda proqramları haqqında ümumi məlumat"
mövzusunda məruzəsi dinlənilib. Hörmətli qonağı
salamlayan Qafqaz Universitetinin rektoru,
professor Ahmet Saniç giriş sözündə çağdaş dünya
düzənində mühüm rolu olan BMT-nin təhsilə xüsusi
önəm verdiyini bildirdi, dünyanın bu ən nüfuzlu
beynəlxalq təşkilatı ilə əlaqələr qurmaqda
maraqlı olduqlarını, bu əlaqələrin Qafqaz
Universitetinin cəmiyyətdəki nüfuzunun daha da
yüksəlməsinə müsbət təsir göstərdiyini diqqətə
çatdırdı.
Sonra cənab Fikrət Akçura müəllim və tələbələr
qarşısında təmsil etdiyi qurum haqqında geniş
məruzə etdi. Məruzəçi öncə BMT-nin yaranma
tarixi, inkişaf yolu və strukturu haqqında
danışdı. Bildirdi ki, II Dünya müharibəsindən
sonra dünyada sülhü qoruyub saxlamaq, qlobal
problemləri həll etmək məqsədi ilə yaradılmış
təşkilat fəaliyyət göstərdiyi 65 ildən artıq
müddət ərzində öz missiyasını şərəflə doğruldub.
Yarandığı vaxt cəmi 50 ölkəni birləşdirən BMT-yə
hazırda 192 dövlət üzvdür. Qurumun 6 əsas orqanı
mövcuddur ki, onlardan da ən əhəmiyyətliləri 5
daimi və 10 dəyişən üzvü olan Təhlükəsizlik
Şurası və 15 hakimi olan Beynəlxalq Ədalət
Məhkəməsidir. BMT-nin fəaliyyəti barədə danışan
bu beynəlxalq qurumun ölkəmizdəki təmsilçisi
diqqətə çatdırdı ki, hazırda 50 min adamın
çalışdığı BMT-nin illik büdcəsi cəmi 2 milyard
dollardır ki, bu da BMT-nin yerləşdiyi Nyu-York
şəhərinin illik büdcəsinin yüzdə beşi qədərdir
(20 dəfə az). 60 təşkilatı olan BMT dünya üzrə
14 sülhyaratma proqramı həyata keçirir ki, bu
proqramlarda da təxminən 100 min sülhməramlı
iştirak edir.
Məruzəsində BMT-nin Azərbaycanda həyata
keçirdiyi proqramlardan da bəhs edən F.Akçura
Qarabağ münaqişəsinin həlli ilə bağlı bu qurum
tərəfindən indiyədək 4 qətnamənin qəbul
olunduğunu, lakin onların heç birinin həyata
keçirilmədiyini vurğuladı. Bildirdi ki, hazırda
BMT-nin xətti ilə ölkəmizin münaqişə bölgələrinə
yaxın ərazilərində torpaqların minalardan
təmizlənməsi və s. proqramlar həyata keçirilir.
Çıxışında BMT-də çalışan azərbaycanlılar
haqqında da məlumat verən
rezident-əlaqələndirici hazırda bu qurumda
ölkəmizdən 34 adamın çalışdığını söylədi və
Qafqaz Universiteti tələbələri arasında
gələcəkdə belələrinin daha çox olacağına ümid
etdiyini bildirdi.
Seminarın sonunda qonaq tələbələri maraqlandıran
sualları cavablandırdı və ona universitetin
plaketi təqdim olundu.
Yusif ƏLİYEV |
