|
 Təhsil
Nazirliyi, "Microsoft Azərbaycan" şirkətinin və
"MƏDƏD Azərbaycan" təşkilatının birgə layihəsi
çərçivəsində Azərbaycan müəllimləri rəsmi
elektron poçt ünvanları ilə təchiz olunacaqlar.
"2008-2012-ci illərdə Azərbaycan Respublikasının
təhsil sisteminin informasiyalaşdırılması üzrə
Dövlət Proqramı"çərçivəsində "Microsoft
Azərbaycan" şirkətinin dəstəyi ilə həyata
keçirilən layihəyə əsasən müəllimlərin poçt
ünvanları teacher.edu.az domen adı altında
açılacaq və Microsoft Live@Edu texnoloji
platformasının bazasında işləyəcəkdir.
İlkin
mərhələdə "Microsoft" korporasiyasının "Təhsildə
əməkdaşlıq" proqramı çərçivəsində "MƏDƏD
Azərbaycan" təşkilatı ilə birlikdə "Elektron
məktəb" pilot layihəsinə qoşulmuş məktəblərin
müəllimləri üçün Live@Edu platforması bazasında
elektron poçtların istifadəsi üzrə xüsusi
təlimlər təşkil ediləcəkdir.
Sonrakı
mərhələdə Dövlət Proqramı çərçivəsində
müəllimlər və inzibati işçilər üçün "MƏDƏD
Azərbaycan" təşkilatı tərəfindən keçirilən
təlimlərdə iştirak edənlər də rəsmi elektron
poçt ünvanı alacaqlar.
ad.soyad@teacher.edu.az kimi elektron poçt
ünvanlarının olması müxtəlif səviyyələrdə
kommunikasiyalar üçün yeni imkanlar
yaradacaqdır. Elektron poçt vasitəsilə
müəllimlərin öz aralarında əlaqələri daha da
genişlənəcəkdir. Vahid elektron poçt ünvanları
reyestrinin olması məktəblər, təhsil şöbələri,
Təhsil Nazirliyi səviyyəsində məlumatlandırmanın
sistemli və mərkəzləşdirilmiş qaydada həyata
keçirilməsinə imkan verəcəkdir.
Microsoft
Live@Edu xidməti çərçivəsində Azərbaycan
müəllimləri həmçinin fərdi elektron təqvim,
şəbəkələşmə, ani ismarış, 25Gb İnternet sahə və
Microsoft Office proqramlar dəstinin online
versiyalarını əldə edəcəklər. Burada müəllimlər
həm bir-biri ilə, həm də qrup şəklində
əməkdaşlıq qura biləcək, irihəcmli fayllarla
bölüşmək və fayllar üzərində müştərək işləmək
imkanı qazanacaqlar. Son nəticədə bütün
müəllimlərin fərdi elektron ünvanının olması
Azərbaycan təhsil sistemində korporativ
münasibətlərin formalaşdırılmasına şərait
yaradacaq.
Məktəblər öz
pedaqoji kollektivləri üçün rəsmi elektron ünvan
almaq məqsədilə administrator@teacher.edu.az
ünvanına müraciət edə bilərlər.
Hicran ƏKBƏROVA |
