|
Azərbaycan Respublikası Təhsil Nazirliyi, AMEA
İnformasiya Texnologiyaları İnstitutu və
"İnfomas" ictimai birliyinin təşkilati və
elmi-metodiki, Rabitə və İnformasiya
Texnologiyaları Nazirliyinin maliyyə dəstəyi ilə
Azərbaycan məktəblilərinin bu il Tailandda
keçiriləcək 23-cü Beynəlxalq İnformatika
Olimpiadasında (BİO) iştirak etməsi üçün
hazırlıq işlərinə başlanılmışdır. Bu məqsədlə
AMEA İTİ-nin Tədris-İnnovasiya Mərkəzinin
nəzdində Olimpiya Mərkəzi yaradılmışdır.
 Olimpiya
Mərkəzində iyun ayının 1-də başlanmış treninqlər
Bakı Dövlət Universitetinin dosenti, Beynəlxalq
İnformatika Olimpiadasında Azərbaycan
komandasının rəhbəri Ramin Mahmudzadənin
rəhbərliyi altında İnformasiya Texnologiyaları
İnstitutu, Bakı Dövlət Universiteti və digər ali
təhsil müəssisələrinin aparıcı alim və
mütəxəssisləri tərəfindən aparılır. İyul ayının
17-dək davam edəcək hazırlıqların başlıca
məqsədi komanda üzvlərinin informatikanın riyazi
əsasları, alqoritmlərin işlənib hazırlanması və
analizi, kombinatorika, hesablama metodları və
modelləşdirmə, dinamik proqramlaşdırma, ehtimal
nəzəriyyəsi, oyunlar nəzəriyyəsi və s. sahələrdə
bilik və bacarığını daha da artırmaq, bu
biliklərin mürəkkəb məsələlərin həllində tətbiq
edilməsi qabiliyyətini formalaşdırmaqdır.
İnformasiya texnologiyaları sahəsi üzrə hər il
keçirilən bu bilik yarışında dünyanın 80-dən
artıq ölkəsindən orta məktəb şagirdləri iştirak
edir. Bu il Tailandın kurort məkanı Pattayada
iyulun 22-dən 29-dək keçiriləcək 23-cü BİO-nun
təşkilatçıları Tailand Təhsil Nazirliyi, Elm və
Texnologiyaların İnkişafı İnstitutudur.
Olimpiadanın qaydalarına görə, hər bir
komandanın tərkibində dörd məktəbli ola bilər.
Əvvəlki illərdə olduğu kimi, bu il də
komandamızın tərkibi müəyyənləşdirilərkən,
informatika üzrə respublika olimpiadasının
nəticələri, proqramlaşdırma üzrə tələbələr
arasında keçirilmiş olimpiadanın nəticələri,
beynəlxalq səviyyəli onlayn olimpiadaların
nəticələri, o cümlədən şagirdlərin yaşı nəzərə
alınmışdır. Sonuncu meyarın mahiyyəti ondan
ibarətdir ki, təxminən eyni göstəriciləri olan
iki məktəblidən daha aşağı sinifdə təhsil alan
şagirdə üstünlük verilmişdir. Beləliklə, Tailand
olimpiadasında ölkəmizi 8-11-ci sinif
şagirdlərindən ibarət komanda təmsil edəcək.
İlk dəfə 1989-cu ildə keçirilmiş informatika
üzrə beynəlxalq olimpiada dünya ölkələrində
təhsilin və innovativ təhsil texnologiyalarının
inkişafında mühüm rol oynayır. Bu olimpiadanın
keçirilməsində başlıca məqsəd aşağıdakılardır:
*
dünyanın müxtəlif ölkələrində informatika
sahəsində istedadlı şagirdlərin aşkara
çıxarılması və onların birliyinin yaradılması,
onlar üçün yarışların keçirilməsi və onların
gələcək inkişafı üçün şəraitin yaradılması;
*
dünyanın müxtəlif ölkələrində informatika
sahəsində istedadlı şagirdlərlə işləyən
pedaqoqların, alimlərin və ictimai xadimlərin
birləşdirilməsi, onlar arasında dostluq
münasibətlərinin qurulması;
*
dünyanın müxtəlif ölkələrinin gənclərinin
informatikanın öyrənilməsinə diqqətinin cəlb
edilməsi və onların erkən peşə seçiminə yardım
olunması;
*
dünyanın müxtəlif ölkələrində məktəblilər
arasında informatika üzrə yarışların
populyarlaşdırılması və onlara marağın
artırılması;
*
informatika üzrə beynəlxalq olimpiadanın
təşkilinə ölkələrin cəlb edilməsi. |
