|
Rusiya Federasiyasında orta ümumi təhsil pulsuz
olacaq. Bu barədə RF hökumətinin başçısı
Vladimir Putin mayın 31-də "Ümumrusiya Pedaqoji
Yığıncağı" ictimai təşkilatının qurultayındakı
çıxışında bildirib. "Biz hökmən pulsuz ümumi
təhsili qoruyub saxlayacağıq. Bu, bizim
konstitusiyamızın baza prinsiplərindən biridir,
ondan, əlbəttə ki, heç kim geri
çəkilməyəcək",-deyən Putin əlavə edib ki, RF
hökuməti məktəblərin maliyyələşdirilməsini davam
etdirəcək. O qeyd edib ki, dövlət bütün təhsil
prosesinin maliyyəsini - məktəblərin tikintisi,
təmir olunması, avadanlıqların alınması,
müəllimlərin əməkhaqlarının verilməsi kimi bütün
xərcləri öz üzərinə götürəcək. Onun sözlərinə
görə, dövlət standartları çərçivəsində bütün
fənlərin büdcə hesabına tədrisi həyata
keçirilməlidir. Rusiya təhsil sistemini
Amerika, Qərbi Avropa və ya Asiya modeli ilə
müqayisə edənlərə cavab olaraq Putin qeyd edib
ki, RF-nin öz yolu var, ölkədə təhsil sovet
məktəbi də daxil olmaqla ən yaxşı ənənələri
saxlayır.
2016-cı ilə qədər ölkədə məhdud imkanlı
şagirdlər üçün məktəblərin sayının 8 dəfə
artacağını bildirən hökumət başçısı bu qəbildən
olan uşaqlar üçün təhsilin distant formasının
geniş tətbiq olunmasını vacib sayıb. Putin
təhsilin inkişafından danışarkən ölkənin Təhsil
və Elm Nazirliyi qarşısında konkret vəzifələr
qoyub. Baş nazir Təhsil və Elm Nazirliyinə
ölkədə pedaqoji təhsilin bütün səviyyələrinin
modernləşdirilməsi üçün təkliflər təqdim etməyi
tapşırıb. Onun sözlərinə görə, gələcək müəllim
həm özünün baza fənnini, tədrisin ən qabaqcıl
metodikasını mənimsəməli, həm də pedaqogikanın,
uşaqların psixologiyasının bütün
incəliklərindən, ümumtəhsil prosesinin bütün
müasir texnologiyalarından baş çıxarmalıdır.
Putin məktəblərin gərəksiz hesabatlılığına son
qoyulmasını tələb edib. Onun sözlərinə görə,
administrativ baryerlər və lüzumsuz yoxlamalar
məktəbin inkişafına mane olur. |
|
