|
 İyulun
12-də Bakı Pedaqoji Kadrların İxtisasartırma və
Yenidənhazırlanma İnstitutunda sosial iş,
Azərbaycan dili və ədəbiyyat, riyaziyyat və
informatika, psixologiya və məktəbəqədər
tərbiyəçi ixtisasları üzrə institutu bitirən
müdavimlərə həsr olunmuş "məzun günü" keçirildi.
Tədbirdə institutun professor-müəllim heyəti ilə
yanaşı, məzunlar və qonaqlar iştirak edirdilər.
Tədbiri giriş sözü ilə açan BPKİYİ-nin rektoru,
professor Asəf Zamanov məzunları əlamətdar gün
münasibətilə təbrik edərək, onlara gələcək
həyatlarında uğurlar arzuladı. Bildirdi ki,
"məzun günü" institutun tarixində ilk dəfə
keçirilir və bunun ənənəyə çevrilməsi nəzərdə
tutulub. Əsası ulu öndər Heydər Əliyev
tərəfindən qoyulan təhsil islahatlarının
uğurlarından söz açan professor A.Zamanov
ümummilli liderin layiqli davamçısı Prezident
İlham Əliyevin elmə, təhsilə daim böyük önəm
verdiyini və bu sahələrin inkişafı ilə bağlı
imzaladığı sərəncamların əhəmiyyətindən danışdı.
2010-2011-ci tədris ilində Təhsil Nazirliyinin
müvafiq əmr və sərəncamlarına uyğun olaraq
institutda 5 ixtisas üzrə (sosial iş, Azərbaycan
dili və ədəbiyyat, riyaziyyat və informatika,
psixologiya və məktəbəqədər tərbiyəçi)
yenidənhazırlanma təhsilinə müdavimlər qəbul
edilmişdi. İnstitut rəhbərliyi və pedaqoqlar
tədris prosesində müdavimlərin təhsilinə yüksək
tələbkarlıqla yanaşmış, dərsə səthi yanaşan
müdavimlər institutdan kənarlaşdırılmışlar.
Bunun məntiqi nəticəsi kimi tədris zamanı
keçirilən monitorinqlər nəticəsində yüksək
keyfiyyət nəticələri əldə olunmuşdur.
Yeniliklərdən biri də ondan ibarətdir ki, sosial
iş ixtisası üzrə təhsil respublika səviyyəsində
ilk dəfə məhz bu institutda həyata keçirilib.
Belə bir məsuliyyətli işi instituta həvalə
etməsinə görə təhsil naziri Misir Mərdanova
institutun professor-müəllim heyəti adından
minnətdarlığını bildirən rektor A.Zamanov
vurğuladı ki, bu etimadı doğruldacağımıza
ümidvaram. Buraxılış imtahanlar ında
imtahan komissiyası sədrlərinin fəaliyyətlərini
yüksək qiymətləndirən A.Zamanov Milli Məclisin
üzvləri Hadı Rəcəbli, Bəxtiyar Əliyev başda
olmaqla professorlar Sabir Mirzəyev, Fərrux
Rüstəmov və Adil Babayevə təşəkkürünü bildirdi.
Qeyd etdi ki, yüksək təşkilati səviyyədə keçən
buraxılış imtahanlarının nəticələrinə görə 112
müdavim təhsili uğurla başa vurmuş, bir nəfər də
"qeyri-kafi" qiymət almamışdır. Məzunlara
respublikamızın gələcək həyatında əsl Azərbaycan
vətəndaşı kimi xidmət etməyi, təhsilimizi daha
da ucalara qaldırmağı tövsiyə edən professor
A.Zamanov onların institutun adını şərəflə
təmsil edəcəklərinə ümidvar olduğunu bildirdi.
Çıxış edənlər institutun tədris işləri üzrə
prorektoru, pedaqogika üzrə fəlsəfə doktoru
Möhsün Alışov, filologiya üzrə fəlsəfə doktoru
Aydın Paşayev, dosent Allahverdi Eminov və
başqaları məzunlara uğurlar arzuladılar.
Sonda professor A.Zamanov institutu fərqlənmə
ilə bitirənlərə diplomlar təqdim etdi. Xatirə
şəkilləri çəkildi.
Niyazi RƏHİMOV |
|
