|
 Həmyerlimiz
Rusiyada "İlin rektoru" seçilib
Rusiyada keçirilmiş "Rusiya Federasiyasında ali
təhsil və elmin inkişaf perspektivləri və
problemlər" V Ümumrusiya konfransında
həmyerlimiz, sosial elmlər doktoru, Moskva
Dövlət Sosial-Humanitar Universitetinin rektoru
Vaqif Bayramovun rəhbərlik etdiyi ali məktəb "Rusiyanın
100 ən yaxşı ali məktəbi" müsabiqəsində "Ən
yaxşı sosialyönümlü ali məktəb" nominasiyası
üzrə qızıl medala layiq görülüb. Rektor Vaqif
Bayramova isə "İlin rektoru - 2011" qızıl medalı
təqdim olunub.
Qeyd edək ki, adıçəkilən müsabiqə 2004-cü ildən
keçirilir. Bu tədbir Rusiyanın elmi-tədqiqat
institutlarının, ali məktəblərinin rəhbərləri,
elm və təhsil mütəxəssisləri arasında ilin
əlamətdar hadisəsi kimi qiymətləndirilir.
2010-cu ildən başlayaraq konfransa və
qiymətləndirmə komissiyasına Nobel mükafatı
laureatı, Rusiya Elmlər Akademiyasının
vitse-prezidenti, akademik J.Alferov rəhbərlik
edir. Komissiyanın tərkibinə Rusiya Federasiya
Şurasının elm və təhsil komitəsinin, Dövlət
Dumasının təhsil komitəsinin üzvləri daxildirlər.
Bundan əlavə, Rusiya Federasiyası təhsil və elm
naziri A.Fursenkonun əmrinə müvafiq olaraq Vaqif
Bayramov ikinci müddətə 2011-ci il iyulun 1-dən
2016-cı il iyunun 30-a kimi Sosial-Humanitar
Universitetinin rektoru vəzifəsinə təsdiq olunub.
Ukraynada yeni təhsil qanununun mahiyyəti
açıqlanıb
Ukraynada yeni təhsil qanununun qəbulu
gözlənilir. Ölkənin Təhsil Nazirliyindən verilən
məlumata görə, yeni qanun layihəsi üzərində
işlər başa çatdırılıb və artıq ictimaiyyətin
müzakirəsinə təqdim olunub. Ölkənin təhsil
naziri Dmitri Tabaçnik yeni qanunun mahiyyəti
barədə danışıb. Yeni qanun tələbə
müavinətlərinin həcmini yaşayış minimumuna qədər
artırmağa, dövlət ali məktəblərinə əldə olunmuş
vəsaitləri müstəqil surətdə sərf etməyə imkan
verəcək.
Tələbələri gözləyən əsas dəyişikliklərdən biri
ixtisas dərəcəsidir. Əgər qanun qəbul olunsa,
onda Ukraynada kiçik mütəxəssis, bakalavr,
magistr, fəlsəfə doktoru və elmlər doktoru elmi
dərəcələri olacaq. "Bütün mütəxəssislər
avtomatik olaraq magistr olacaq, bu, ali məktəbi
bitirənlərə və hələ oxuyanlara aid olacaq",-deyə
D.Tabaçnik bildirib.
Yeni qanuna müvafiq olaraq təhsilin müddəti də
dəyişəcək. Məsələn, aspiranturada təhsil müddəti
3 ildən 4 ilə qədər artacaq. "Hazırda
aspirantların yalnız 24 faizi 3 ildən sonra
müdafiə edə bilir. Belə olan halda niyə özümüzü
aldadaq?", - deyə Dmitri Tabaçnik yeni qanuna
mövqeyini açıqlayıb.
Dəyişikliklərin böyük qismi ali məktəblərin
təşkili ilə bağlıdır. Ali təhsil məktəblərinə
digər ali təhsil müəssisələri və hətta orta
təhsil müəssisələri, eləcə də xarici təhsil
qurumları ilə konsorsium yaratmağa icazə
veriləcək. Hər bir dövlət ali məktəbi gələcək
abituriyentlər üçün profil kolleclər aça biləcək.
Bundan əlavə, universitetlər fənlərarası kurslar
tətbiq etmək hüququ qazanacaq ki, bu isə
D.Tabaçnikin fikrincə, Ukrayna ali təhsilini
Qərb təhsil nümunəsinə yaxınlaşdıracaq.
Yeni qanun bir sıra maliyyə məsələlərini də
əhatə edir. Nazirin sözlərinə görə, bu, maliyyə
sahəsində başlıca təkliflərdən biri dövlət ali
məktəblərinə qazandıqları vəsaitləri öz
sərəncamlarına uyğun olaraq xərcləmələri və
eləcə də müstəqil təsərrüfat fəaliyyəti ilə
məşğul olmaları ilə bağlıdır. Yeni qanun ali
məktəblərə hər il təhsil haqlarını yenidən
gözdən keçirməyi qadağan edir - müqavilə
əsasında təhsil haqları müqavilənin qüvvədə
olduğu bütün müddət ərzində dəyişməz qalmalıdı
Almaniyada orta təhsil sistemi dəyişir
 Almaniya
Federativ Respublikasında orta təhsil sistemində
ciddi dəyişikliklər gözlənilir. Ölkənin Xristian
Demokrat Birliyi Almaniyada orta məktəb
sisteminin sadələşdirilməsini təklif edib.
Almaniya mətbuatının yazdığına görə, 30
səhifəlik təkliflər paketi ictimaiyyətin
müzakirəsinə verilib. Təşəbbüsün müəllifləri
hesab edirlər ki, hazırda Almaniyada orta təhsil
məktəblərinin həddən çox mərhələləri və tipləri
mövcuddur. Bu isə həm şagirdlər, həm də
valideynlərdə çaşqınlıq yaradır. Bu mənada orta
təhsil verən məktəb tiplərinin sayının 2-yə
qədər azaldılması təklif olunur. Hazırda
almaniyalı uşaqlar 4-cü sinifdən sonra
təhsillərini gimnaziyada, real və ya birləşmiş
məktəblərdə davam etdirə bilərlər. Orta təhsil
müəssisəsinin seçimi uşağın qabiliyyətindən, həm
də perspektivdə onun universitetdə oxumaq
istəyib-istəməməsindən asılıdır. Almaniyanın
bir sıra regionlarında eksperiment kimi artıq
sadələşdirilmiş orta təhsil sistemi tətbiq
olunur. Ənənəvi təhsilin tərəfdarları hesab
edirlər ki, yeniliklər uşaqları fərdi
yanaşmalardan məhrum edir, bu isə təhsilin
keyfiyyətinin aşağı düşməsinə səbəb ola bilər.
ABŞ-da müəllimlər şagirdlərə yazı yazmağı
öyrətməyəcəklər
 Amerikada
müəllimlər artıq şagirdlərə yazı yazmağı
öyrətməyəcək. Amerikada nəşr olunan "Tayms"
jurnalının yazdığına görə, İndiana ştatının bir
çox məktəblərində yazı qələmlərini noutbuklar
əvəz edəcək. Müasir texnologiyaların sürətli
inkişafı pedaqoqları təhsil vasitələri
prioritetlərinin dəyişdirilməsi məsələsi
üzərində fikirləşməyə vadar edib. Bir çox
amerikalı məmur üçün qələmlə yazmaq mənasız
vərdişə çevrilib. Artıq cari ilin sentyabrından
başlayaraq bütün tədris müəssisələrində
noutbuklara keçilməsi nəzərdə tutulub.
İndiana ştatının Təhsil Departamenti məktəb
rəhbərliklərinə bu məsələdə müstəqil qərar qəbul
etməyi təklif edib. Bundan əlavə, yalnız 4-cü və
daha yuxarı sinif şagirdləri klaviaturadan
istifadəyə keçə bilərlər. Bəzi valideynlər
yeniliyə etiraz edirlər. Onlar yenilik sayəsində
uşaqlarının işə qəbul zamanı imza qoya
bilməmələrindən narazılıq edirlər. Artıq bütün
dünyada əllə yazanların sayının azalması,
klaviaturadan istifadə edənlərin isə sayının
artması bir tendensiya halını alıb. Cəmiyyətdə
əllə yazının rolunun azalması ona gətirib
çıxarıb ki, artıq bir çox insanların yazı xətti
də korlanıb.
Rusiyalılar Avropa təhsilinə üstünlük verirlər
Rusiyalılar Avropa təhsilinə daha artıq üstünlük
verməyə başlayıblar. Xaricdə təhsil almaq üçün
sınaqlardan çıxmış və Harvard, Oksford kimi
məşhur universitetlərdə təhsil almaq şansı
qazanmış gənclər gələn ildən başlayaraq
seçdikləri ixtisaslar üzrə artıq pulsuz - dövlət
hesabına təhsil ala biləcəklər. İlkin
mərhələdə 2000 gənc bu imkandan yararlana
biləcək, gələcəkdə onların sayı 10 minə qədər
artırılacaq. Lakin bu da son hədd deyil. RF
Prezidenti Dmitri Medvedev rusiyalı gənclərin
xaricdə təhsil alması məsələsini ən aktual
vəzifə hesab edir. "Yaxın on ildə ümid edirəm
ki, bizim on minlərlə vətəndaşımız - gənc
alimlərimiz, mühəndislərimiz, məmurlarımız və
digər sahələr üzrə peşəkarlarımız dünyanın
aparıcı universitetlərində müxtəlif sahələr üzrə
magistr və doktorluq dərəcələri müdafiə
edəcəklər. Ümid edirəm ki, onlar sonradan Rusiya
biznesində və dövlət idarəçiliyində, elm və
təhsilində başlıca mövqe əldə edəcəklər", - deyə
cari ilin qışında Davos forumunda çıxış edən
D.Medvedev bildirib.
İlkin mərhələdə Rusiya gənclərin xaricdə
təhsili üçün 60 milyon dollar sərf etməyə
hazırdır.
Böyük Britaniyada məktəblilərin yay tətili ləğv
olunacaq
Böyük Britaniya məktəblilərin yay tətilini ləğv
etmək niyyətindədir. Ölkənin Təhsil
Nazirliyinin qərarına əsasən, uzun sürən yay
tətilləri artıq məktəblilər üçün tarixə çevrilə
bilər. Şagirdlər daha çox məktəblərdə vaxt
keçirəcəklər. Hökumət tərəfindən azad məktəblər
üçün nəzərdə tutulan radikal dəyişikliklər
planında bu cür yeniliyin tətbiqi gözlənilir.
Təhsil Nazirliyinin mətbuat katibi Maykl Qov
qeyd edib ki, sentyabrda Noric şəhərində azad
məktəbin açılması gözlənilir. Bu məktəb praktik
olaraq ilboyu fasiləsiz fəaliyyət göstərəcək.
Sözügedən məktəblər bütün il ərzində uşaqlara
qayğı göstərəcək və onlara yüksək keyfiyyətli
təhsil verəcək. Məktəb Noric şəhərinin
mərkəzində yerləşəcək və işləyən valideynlər
uşaqları uzun müddətə məktəbə verə bilərlər, bu
isə həftədə 6 gün, il ərzində isə 51 həftə
təşkil edir. Londonda nəşr olunan "Express"
qəzetinin yazdığına görə, azad məktəb
valideynlərin hesabına uşaqlara dərsdən əvvəl və
dərsdən sonra əlavə xidmətlər göstərəcək.
Məktəblər yalnız birhəftəlik Milad bayramı və
bank tətili günlərində bağlanacaq. Təlim il
ərzində 6 dövrü əhatə edəcək ki, bunların da
arasında 2 həftəlik tətillər olacaq. Avqustda ən
uzun - 4 həftəlik tətil nəzərdə tutulub. Bu
fasilələr ərzində məktəblər bir sıra əlavə
məşğələlər üçün şagirdlərin üzünə açıq olacaq.
Azad məktəblər Böyük Britaniyada valideynlər,
şirkətlər və ya xeyriyyə təşkilatları tərəfindən
təşkil olunan məktəblərdir. Azad məktəblər və
akademiyalar bütün il ərzində açıq ola bilərlər.
Onlar hətta öz istəklərinə uyğun olaraq tədris
semestrinin müddətini və dərs gününü dəyişə
bilərlər.
Cənubi Koreya rəqəmsal dərsliklərə keçir
 Cənubi
Koreyanın Təhsil Nazirliyi ölkənin təhsil
sistemində elan etdiyi inqilabi dəyişiklikləri
davam etdirir. Ən son məlumata görə, Cənubi
Koreya məktəblərində hazırda istifadə olunan
bütün dərsliklər rəqəmsal olacaq. Məqsəd 2015-ci
ilə kimi ölkədə çap məhsullarından istifadəyə
son qoymaqdır. Bu dəyişiklik kompüterlər,
noutbuklar, masaüstü kompüterlər və smartfonlar
istehsal edən şirkətlər üçün böyük bazar açır.
Təhsil Nazirliyi bütün lazımi avadanlıqların
alınması və təhsil kontingentinin rəqəmsal
sistemə keçidi üçün 2.4 milyard ABŞ dolları
xərcləməyə hazırdır. Layihə hesablama
şəbəkələrinin yaradılmasını nəzərdə tutur və bu,
tələbələrə rəqəmsal ədəbiyyatları əldə etməyə
və ev tapşırıqlarını kompüterə yükləməyə imkan
verir. Nəticədə tələbələr istənilən qurğunun
köməyi ilə İnternetə bağlanmaqla ədəbiyyat əldə
edə bilərlər. Bundan əlavə, nazirlik 2013-cü
ildən başlayaraq onlayn-siniflərin sayını
artırmaq niyyətindədir. Bununla da bir sıra
müxtəlif səbəblərə görə məktəblərə gələ bilməyən
tələbələr virtual məşğələlərdə iştirak edə
bilərlər. 2014-cü ilə kimi bütün ibtidai
məktəblər rəqəmsal dərsliklərlə təmin olunacaq,
2015-ci ildə isə bütün dərsliklər bu sistemə
keçəcək. 2015-ci ilə kimi bütün məktəblər simsiz
İnternet bağlantısına malik olacaq. İqtisadi
Əməkdaşlıq və İnkişaf Təşkilatının məlumatına
görə, Cənubi Koreya yeniyetmələri dünyada
kompüter savadına görə birinci yerdədirlər.
Xarici mətbuat materialları əsasında hazırladı:
Oruc MUSTAFAYEV
|
