|
"Elektron təlimləndirən sistemlər" layihəsi
"Nobel-T" təşkilatı tərəfindən reallaşdırılır.
Məsafələri qısaldan bu layihə xüsusi qayğıya
ehtiyacı olan uşaqlarla yaşıdları arasında təmas
imkanı yaratmaqla yanaşı, bir çox üstünlükləri
ilə də seçilir.
 "Nobel-T"
MMC-nin direktoru Salam Əliyev bildirdi ki,
xüsusi qayğıya ehtiyacı olan məktəbyaşlı
uşaqların təhsilini əhatə edən layihə
"2008-2012-ci illərdə Azərbaycan Respublikasında
təhsil sisteminin informasiyalaşdırılması üzrə
Dövlət Proqramı" çərçivəsində həyata keçirilir.
Layihə xüsusi qayğıya ehtiyacı olan məktəbyaşlı
uşaqların təhsilə maraqlarının daha da
artırılması, onların valideynlərinin öz
övladlarının təhsilində rolunun müəyyən
edilməsi, uşaqların psixoloji vəziyyətinin
yaxşılaşdırılması məqsədi daşıyır: "Layihənin
həyata keçirilməsi üçün Bakı şəhəri Səbail
rayonu 219 nömrəli evdə məktəbi, bu məktəbin 30
nəfər xüsusi qayğıya ehtiyacı olan şagirdlərdən
təşkil olunmuş 8-ci sinfi və sinifdə dərs
deyəcək yüksək elmi-pedaqoji təcrübəyə malik
müəllim heyəti cəlb olunmuşdur. Rəhbəri olduğum
"Nobel-T" müəssisəsinin əməkdaşları və
psixoloqları layihədə iştirak edən 30 nəfər
xüsusi qayğıya ehtiyacı olan şagirdin hər biri
ilə fərdi qaydada görüşüb, onların
fiziki-psixoloji vəziyyəti, ev və təhsilalma
şəraiti ilə yaxından tanış olublar. Şagirdlərin
anketləri və onların xəstəlikləri haqqında
elektron baza da yaradılıb". Layihə çərçivəsində
"Müasir məktəb" adlı İnternet portalının
yaradılması, uşaqlar arasında xüsusi istedada
malik olanların müəyyən edilməsi, təhsilin bu
səviyyəsi üzrə yüksək ixtisaslı müəllimlərin
hazırlanması da nəzərdə tutulur.
S.Əliyev "Nobel-T" MMC-nin tərkibində "Məsafədən
tədris" mərkəzinin yaradıldığını da deyir: "Bu
mərkəzdə 3 bölmə - metodoloji tədris bölməsi,
psixoloji-pedaqoji təhsilin fəaliyyəti bölməsi
və məsafədən təhsilin elmi-texniki bölməsi
fəaliyyət göstərir". Direktor xüsusi qayğıya
ehtiyacı olan məktəbyaşlı uşaqların evdə
təhsilində lazımı və onların xəstəliklərinə
uyğun avadanlıqlardan istifadəyə diqqətin
artırılmasını da vacib sayır. Belə ki, bu
qəbildən olan uşaqların sağlamlıq
vəziyyətlərindən asılı olaraq istifadə ediləcək
kompüter və avadanlıqlara xüsusi texniki və
proqram tələbləri qoyulmalıdır.
Layihənin İnternet portalından da danışan
S.Əliyev onu da qeyd etdi ki, portal "Elektron
təlimləndirən sistemlər"in davamlı və uğurlu
inkişafı üçün nəzərdə tutulub: "Burada mütəmadi
olaraq müəllim və şagirdlərin interaktiv təlim
metodlarına əsaslanan elektron dərs vəsaitləri,
hazırladıqları təqdimatlar, əl işləri
yerləşdiriləcək ki, ən yaxşı işlər və fəal
müəllim və şagirdlər qiymətləndirilsin. Bu
İnternet portalı müəllimlər, şagirdlər və
məktəblər arasında rəqabət mühitinin, eləcə də
bu qəbildən olan şagirdlər üçün elektron
resurslar mərkəzinin yaradılmasına səbəb olacaq.
Portal müxtəlif xəstəlikləri üzündən evdə təhsil
alan şagirdləri, onlara dərs deyən müəllimləri,
şagirdlərin valideynlərini və Təhsil
Nazirliyinin əməkdaşlarını əhatə edir". Təlim
prosesinin "Elektron təlimləndirən sistemlər"dən
istifadə etmə əsasında aparılmasının
üstünlüklərinə də toxunan təşkilat rəhbəri deyir
ki, bu qəbildən olan uşaqlar dövlətin və
cəmiyyətin diqqətindən kənarda qalmadıqlarını
bir daha hiss edəcəklər. Layihənin köməyi ilə
şagirdlərin sağlamlığında, psixoloji durumunda
ciddi dəyişikliklərin əldə edilməsi də
mümkündür. Uşaqların diqqətinə biliyin yeganə
meyar olduğu da çatdırılır. Layihənin bir
üstünlüyü də fərdi inkişafa və
özünütəkmilləşdirməyə nail olma imkanlarını
artırmaqdır.
219 nömrəli evdə məktəbin direktoru Sədaqət
Məmmədova da layihənin gerçəkləşməsinin xüsusi
qayğıya ehtiyacı olan şagirdlərin beynəlxalq
İnternet şəbəkəsi vasitəsi ilə cəmiyyətə
inteqrasiya etməsinə səbəb olacağını deyir.
Bundan başqa, əgər şagird məlum səbəbdən dərsi
mənimsəməzsə, onu təkrar dinləmək imkanı da
qazanır: "Beləliklə, şagirdlərin imkanı olacaq
ki, bütün fənlərdən bilik əldə etsin. Bu
layihədə müəllimlərə də bilik və bacarıqlarını
nümayiş etdirmək üçün daha geniş və yüksək
şərait yaradılıb. Layihədə iştirak edən 26
müəllim kifayət qədər bilik və bacarığa, yüksək
potensiala malikdir. Düşünürəm ki, layihədən
irəli gələn təlim-tədris prosesi
müəllimlərimizin təkmilləşdirilməsində böyük rol
oynayacaq və əldə edilən nailiyyətlərdən
şagirdlərimiz lazımınca yararlanacaqlar".
Şakir CƏFƏROV |
|
