|
 Hər
il olduğu kimi, bu il də məktəbəqədər təhsil
müəssisələrində yeni dərs ilinə hazırlıqla
bağlı xeyli işlər görülüb və görülməkdə davam
edir. Paytaxtın 58 nömrəli uşaq bağçasında
olarkən bunun şahidi olduq. Belə ki, qrup
otaqlarında səliqə-sahman göz oxşayır,
qapı-pəncərələr təmir olunub, guşələr, stendlər
təzələnib, uşaqların əl işlərindən ibarət rəsm
sərgisi yenilənib. Həyətyanı sahə abadlaşıb,
asfalt döşənib, ağacların gövdələri ağardılıb,
dibçəklərdə müxtəlif güllər becərilib, yeni
dərs vəsaitləri alınıb. Bu işlərin
görülməsində tərbiyəçilər Afiqə Zeynalova,
Roza Xəlilova, Həcər Əlhəsənova, Çimnaz
Qəmbərova və başqalarının əməyi də az olmayıb.
Bağçanın müdiri Xuraman Səfərova qeyd etdi
ki, müəssisə 1961-ci ildən fəaliyyət göstərir.
2008-ci ildə Təhsil Nazirliyi tərəfindən
əsaslı təmir olunub. 4 qrupdan ibarət olan
təhsil ocağında balaca fidanlar planauyğun
şəkildə yerləşdirilib.
Bağçada istedadlı uşaqların yetişdiyini
vurğulayan Xuraman Səfərova söhbət zamanı ötən
tədris ilində məktəbəqədər yaşlı uşaqlar
arasında keçirilən "Bilik, bacarıq və
qabiliyyət" müsabiqəsinin riyaziyyat və nitq
inkişafı üzrə nominasiyalarında Abbas
Hüseynzadənin və Murad Bağırzadənin I yerin
sahibi olduqlarını diqqətimizə çatdırdı.
Bildirildi ki, 24 uşaq yaxınlıqda yerləşən 39
nömrəli orta məktəbə yola salınıb.
***
10 nömrəli körpələr evi-uşaq bağçasında da
bütün qrup otaqlarında əsaslı təmir işləri
aparılıb. Plastik pəncərələr, taxta qapılar
salınıb, tavan və otaqların divarları ağardılıb,
döşəmə parketlə əvəz olunub, elektrik xətləri
dəyişdirilib, istilik sistemi yenisi ilə əvəz
olunub. Həyətyanı sahədə də geniş abadlıq
işləri aparılıb.
Təhsil Nazirliyi və Bakı Şəhəri üzrə Təhsil
İdarəsi tərəfindən bağça mebellər, yataq
dəstləri, stolüstü oyunlar, dərs vəsaitləri və
müxtəlif avadanlıqlarla təmin olunub.
Müdir Reyhanə Məcidova bağçada əsaslı təmir
işlərinin Bakı Şəhər İcra Hakimiyyəti
tərəfindən aparıldığını söylədi. Yeni dərs
ilinədək təmir başa çatacaq və müasir
tələblərə cavab verən təhsil ocağı balaca
fidanların ixtiyarına veriləcək.
***
60 nömrəli körpələr evi-uşaq bağçasının
kollektivi də yeni dərs ilini böyük ruh
yüksəkliyi ilə qarşılamağa hazırlaşır. Ərazidə
və bütün otaqlarda xeyli təmizlik və abadlıq
işləri görülüb. Dəhlizdə uşaqların əl
işlərindən ibarət rəsm sərgisi yenisi ilə əvəz
olunub. Qrup otaqlarının divarları ağardılıb,
qapı-pəncərələr, döşəmələr rənglənib, həyətyanı
sahədə gül kolları və ağaclar əkilib, su və
elektrik xətləri təmir edilib.
Müdir Bikə Quliyeva söylədi ki, bağçada 4 qrup
fəaliyyət göstərir. Ötən dərs ilində istedadlı
uşaqları aşkara çıxarmaq məqsədilə qruplar
arasında bilik yarışı keçirilib. Qaliblərə kiçik
hədiyyələr təqdim olunub. Bağçanın yetirməsi
Tuncay Bakı Şəhəri üzrə Təhsil İdarəsinin
təşkil etdiyi nitq inkişafı nominasiyası üzrə
müsabiqədə iştirak edərək fərqlənib.
Bağçadan bu il 36 nəfər uşaq müxtəlif
ümumtəhsil ocaqlarına yola salınıb.
Dövlətimiz uşaqların normal, sağlam böyüməsi,
əsl vətəndaş kimi yetişməsi üçün hər cür
şərait yaradıb.
Təhsil işçilərimiz isə bu diqqət və qayğıdan
ruhlanaraq gələcəyin layiqli vətəndaşlarını
yetişdirməyə səylə çalışırlar.
Sifai SƏFƏROVA |
