|
 Azərbaycan
Dillər Universitetinin (ADU) rektoru, millət
vəkili, professor Səməd Seyidovun "Menecmentin
psixologiyası" adlı yeni kitabı işıq üzü görüb.
Müəllifin rus dilində qələmə aldığı və
Azərbaycan dilində nəşr olunan kitabı 3 fəsildən
ibarətdir. "Menecmentin psixologiyasının
əsasları" adlanan birinci fəsildə "Menecmentə
giriş", "Menecment psixologiyasının tədqiqat
tarixi", "Menecment psixologiyasının əsasları"
adlı bölmələr yer alıb. "Menecmentdə insanın
mahiyyəti və əhəmiyyəti" adlanan ikinci fəsildə
isə "Psixi proseslər və insanın menecment
baxımından xüsusiyyətləri" və "Şəxsiyyət"
bölmələrindən bəhs edilir. Nəşrin sonuncu fəsli
isə "Menecment psixologiyasının dörd fundamental
problemi: motivasiya, liderlik,
şəxsiyyətlərarası münasibətlər və kadrların
seçilməsi" adlanır. Bu fəsildə "Motivasiya", "Liderlik",
"Şəxsiyyətlərarası münasibətlər" və "Kadrların
seçilməsi problemi" mövzularına dair dəyərli
fikirlər öz əksini tapıb.
Bu dərs vəsaiti idarəetmənin, menecmentin və
fəaliyyət təşkilinin psixoloji əsaslarını
öyrənən ali təhsil müəssisələrinin tələbələri
üçün nəzərdə tutulub. Kitab motivasiya, liderlik,
qrup və təşkilatlarda şəxsiyyətlərarası
münasibətlər problemləri ilə maraqlananlar üçün
böyük dəyərə malikdir. Vəsaitdə qrup və fərdi
fəaliyyətin effektliyi ilə bilavasitə əlaqəsi
olan kadr seçimində psixoloji məsələyə, fərdi
xüsusiyyətlərin hiss və iradi keyfiyyətlərin
təhlilinə və bir sıra digər amillərə xüsusi önəm
verilib.
Professor S.Seyidov 100-ə yaxın elmi əsərin -
monoqrafiya, məqalə və metodik vəsaitin
müəllifidir. O, ABŞ-da, Böyük Britaniyada,
İtaliyada, Belçikada, Türkiyədə, İsraildə
keçirilmiş çoxsaylı konfrans və simpoziumların
iştirakçısıdır.
ADU-nun Mətbuat xidməti |
|
