|
 Dünən
respublikamızın hər yerində olduğu kimi, Bakının
Səbail rayonundakı 51 nömrəli məktəbdə də Bilik
günü təntənə ilə qeyd olundu. Mərasimi məktəbin
direktoru Lətafət Səmədova açaraq yeni dərs
ilinin başlanması münasibətilə müəllim və
şagirdləri təbrik etdi. Bildirdi ki, ümummilli
lider Heydər Əliyevin rəhbərliyi ilə başlayan
təhsil islahatları bu gün öz bəhrəsini
verməkdədir. Təhsil sahəsi ilə bağlı həyata
keçirilən proqramların uğurlu icrası, eyni
zamanda Prezident İlham Əliyevin ölkəmizin
gələcəyi üçün mühüm əhəmiyyət kəsb edən bu
sahəyə göstərdiyi daimi qayğı hər yerdə
açıq-aydın hiss edilir. Heydər Əliyev Fondunun
prezidenti Mehriban xanım Əliyevanın təşəbbüsü
ilə həyata keçirilən "Yeniləşən Azərbaycana yeni
məktəb" layihəsi çərçivəsində son illər
respublikamızın müxtəlif bölgələrində yüzlərlə
yeni məktəb binası tikilib istifadəyə
verilmişdir.
Bu il 51 nömrəli məktəbin də bir korpusu əsaslı
təmir olunmuş, sinif otaqları yeni
avadanlıqlarla təchiz edilmişdir. Yeni tədris
ilində 114 şagird birinci sinfə qəbul olunub.
2010-2011-ci tədris ilinin yekunlarına görə
"İlin ən yaxşı məktəbi" seçilən məktəbin
ötənilki məzunlarından 47 faizi tələbə adını
qazanıb. Uğurların əldə edilməsində göstərilən
qayğıya, gənc nəslin təlim-tərbiyəsini yüksək
səviyyədə təmin etmək üçün yaradılan şəraitə
görə ölkə rəhbərliyinə kollektivimiz adından
minnətdarlıq edirəm.
Səbail Rayon İcra Hakimiyyəti başçısının müavini
Qəzənfər Novruzov və digər çıxış edənlər yeni
dərs ilinin başlanması münasibətilə
valideynləri, müəllim və şagirdləri təbrik etdi.
Qeyd olundu ki, dövlətimiz bu gün bütün
sahələrdə olduğu kimi, təhsil sahəsinə də diqqət
göstərir. Pedaqoji kollektivin və valideynlərin
üzərlərinə düşən vəzifələr isə vətənə layiqli
övladlar yetirmək üçün bütün qüvvələrimizi
səfərbər etməkdən ibarətdir.
Birinci sinif şagirdləri Vətənə, ana dilinə aid
şeirlər söylədilər.
Sonra ilk zəng çalındı. İbtidai sinif müəllimi
Səkinə İbadovanın rəhbərlik etdiyi 1a sinfində
ilk dərs günü birincilərin böyük marağına səbəb
oldu. Şagirdlərin müəllimin Azərbaycan, dövlət
rəmzlərimiz, dilimizlə bağlı suallarına
verdikləri dolğun cavablar hamını razı saldı.
Züleyxa Əliyevanın söylədiyi Bəxtiyar
Vahabzadənin "Ana dili" şeiri isə alqışlarla
qarşılandı.
Qabil YUSİFOĞLU |
