|
AĞSU
 Sentyabrın
6-da Ağsu şəhər mədəniyyət sarayında təhsil
işçilərinin konfransı keçirildi. İlk öncə
konfrans iştirakçıları ümummilli lider Heydər
Əliyevin abidəsi önünə gül dəstələri qoydular.
Konfransın işində Təhsil Nazirliyinin şöbə
müdiri Faiq Şahbazlı, Ağsu Rayon İcra
Hakimiyyəti başçısının müavini Rasim Novruzov
və məktəbəqədər, ümumtəhsil, məktəbdənkənar
tərbiyə müəssisələrinin rəhbərləri iştirak
etdilər. Tədbirdə Azərbaycan Respublikasının
Dövlət himni səsləndi.
Yeni dərs ilinin başlanması münasibətilə
konfrans iştirakçılarını şəhər körpələr evi-uşaq
bağçasının fidanları təbrik etdilər.
Plenar iclasda "2010-2011-ci dərs ilinin
yekunları və yeni dərs ilində qarşıda duran
vəzifələr" mövzusunda Ağsu Rayon Təhsil
Şöbəsinin müdiri Tahir Xasi çıxış edərək qeyd
etdi ki, 2010-2011-ci dərs ilində Ağsu rayonunda
70 ümumtəhsil məktəbi, o cümlədən 35 tam orta,
19 ümumi orta, 16 ibtidai məktəb fəaliyyət
göstərmişdir. Ümumtəhsil məktəblərində 9211
nəfər şagirdin təlim-tərbiyəsi ilə 1173 nəfər
pedaqoji işçi məşğul olmuşdur ki, onların da
729 nəfəri ali, 444 nəfəri isə orta ixtisas
təhsillidir. Dərs ili ərzində buraxılış
siniflərinin şagirdləri ilə aparılan məqsədyönlü
iş, keçirilən sınaq-yoxlama imtahanları öz
müsbət nəticəsini vermişdir. 2009-cu illə
müqayisədə son illər tam orta təhsil səviyyəsi
üzrə nəticə 20 faizdən çox yaxşılaşmışdır.
2011-ci ildə ali məktəblərə qəbul üçün sənəd
vermiş məzunların 68 nəfəri müsabiqə balından
yuxarı bal toplamış, onların 65 nəfəri tələbə
adını qazanmışdır. Ali məktəbə qəbul keçən illə
müqayisədə çox olsa da, qənaətbəxş deyil.
"2008-2012-ci illərdə Azərbaycan Respublikasında
təhsil sisteminin informasiyalaşdırılması üzrə
Dövlət Proqramı"na uyğun olaraq 57 təhsil
işçisi, o cümlədən keçən dərs ilində 30 nəfər
İKT-nin tətbiqi üzrə müxtəlif təlim kurslarından
keçirilmiş, ümumtəhsil məktəblərinə 300 ədəd
kompüter dəsti, 10 noutbuk, 5 proyektor, 25
printer verilmiş, Azərbaycan Təhsil Şəbəkəsinə
qoşulmuş ümumtəhsil müəssisələrinin sayı 12-yə
çatdırılmışdır.
Məruzəçi qeyd etdi ki, 2011-2012-ci dərs ili
ərəfəsində ümumtəhsil məktəbləri üçün 102 adda
3463170 nüsxə dərslik çap edilmişdir. Onların 45
adda 1779750 nüsxəsi yeni fənn proqramları
(kurikulumları) ilə işləyən ibtidai siniflər
üçün nəzərdə tutulmuşdur. Bunlardan bölgü üzrə
rayona ayrılmış 51 adda 24414 ədəd dərslik və
dərs vəsaiti gətirilib məktəblərə paylanmışdır.
Konfransda şəhər 2 nömrəli orta məktəbin
direktoru A.Kərimli, 5 nömrəli məktəbin
təlim-tərbiyə işləri üzrə direktor müavini
Ş.Həsənova, gənc müəllim F.Ayatova və başqaları
çıxış etdilər.
Konfransın işində iştirak edən Təhsil
Nazirliyinin şöbə müdiri Faiq Şahbazlı rayon
təhsil şöbəsinin illik hesabat məruzəsinə
münasibətini bildirdi. Qeyd etdi ki, bu gün
hesabat məruzəsində, Təhsil Nazirliyinin və
TQDK-nın hesabatlarında da Ağsu rayonu təhsilin
nəticələrinə görə ən geridə qalan rayonların
sırasındadır.
Təhsilin əsas göstəricilərindən biri ali
məktəblərə qəbuldur deyən Faiq Şahbazlı rayonda
400-dən çox şagirdin orta məktəbi
qurtarmasına baxmayaraq, cəmi 65 nəfərin ali
məktəbə qəbul olmasını təəssüf hissi ilə qeyd
etdi.
Bildirildi ki, Ağsu Rayon Təhsil Şöbəsindən dörd
ildə 18 məktəb ilin "Ən yaxşı ümumtəhsil
məktəbi" müsabiqəsində iştirak edib, ancaq yer
tuta bilməyib. Eyni zamanda "Ən yaxşı müəllim"
müsabiqəsində iştirak edən müəllimlərdən isə
biri müsabiqənin qalibi olub. Bütün bu
məsələlər Ağsu Rayon Təhsil Şöbəsinin hər bir
işçisini ciddi düşündürməlidir.
Ağsu Rayon Təhsil Şöbəsində İKT-nin tətbiqinin,
kurikulumlarla, məktəblərin təmiri ilə əlaqədar
görülən işlərdən danışan Faiq Şahbazlı, həm də
bu rayonun bütün ümumtəhsil məktəblərində
dərsliklərlə bağlı heç bir problemin olmamasını
konfrans iştirakçılarının nəzərinə çatdırdı.
VMA-nın respublikada artıq formalaşmış bir
təşkilata çevrildiyi, Ağsu məktəblərində də bu
sahədə müəyyən işlər görülməsinin vacibliyi
təhsil işçilərinə tövsiyə edildi.
Ağsu Rayon İcra Hakimiyyəti başçısının müavini
Rasim Novruzov tədbirdə rayon təhsil
işçilərinin qarşısında duran vəzifələrdən
danışdı. O, təhsil işçilərini yeni dərs ilinin
başlanması münasibətilə təbrik etdi və
işlərində uğurlar arzuladı.
GÖYÇAY
Sentyabrın 7-də Göyçay rayonunda Heydər Əliyev
Mərkəzində təhsil işçilərinin konfransı
keçirildi. Konfransda Təhsil Nazirliyinin şöbə
müdiri Faiq Şahbazlı, Göyçay Rayon İcra
Hakimiyyətinin başçısı Mənsur Məmmədov, rayon
icra hakimiyyətinin nümayəndələri, müəllimlər
və bələdiyyə işçiləri iştirak edirdilər.
İlk öncə ulu öndər Heydər Əliyevin abidəsi önünə
gül dəstəsi qoyuldu. Sonra uzun illər pedaqoji
işdə çalışmış və konfranslararası dövrdə
dünyasını dəyişmiş müəllimlərin xatirəsi bir
dəqiqəlik sükutla yad edildi. Azərbaycan
Respublikasının Dövlət himni səsləndi.
Göyçay Rayon Təhsil Şöbəsinin müdiri Asif
Nəbiyev konfransda "2010-2011 -ci dərs ilinin
yekunları və yeni dərs ilində qarşıda duran
vəzifələr" mövzusunda məruzə ilə çıxış etdi.
Qeyd etdi ki, bu il ümumtəhsil məktəblərinin
307 məzunu ali məktəblərə, orta təhsil
bazasından 93, əsas təhsil bazasından 151 nəfər
orta ixtisas məktəblərinə qəbul olmuşdur.
Abituriyentlərdən 11 nəfəri 600, 47 nəfəri isə
500 baldan yuxarı nəticə göstərmişdir.
Bildirildi ki, işdə nöqsanlar da az deyildir.
Hələ də rayon təhsilində peşə hazırlığı aşağı
olan kadrlar vardır. Növbəti dərs ilində bu
sahə ciddi nəzarətdə saxlanılacaqdır.
Konfransda şəhər 1 nömrəli orta məktəbin
direktoru, respublikanın əməkdar müəllimi
Tahirə Qurbanova, Qaraman kənd tam orta
məktəbinin direktoru Məlahət İsmayılova, şəhər 3
nömrəli tam orta məktəbin tarix müəllimi Nigar
Beydullayeva, Şıxbəy kənd ümumi orta məktəbinin
direktoru Gülbəniz Maqsudova və başqaları çıxış
etdilər.
Təhsil Nazirliyinin şöbə müdiri Faiq Şahbazlı
respublikada təhsil islahatı ilə əlaqədar Göyçay
təhsil işçilərinin gördüyü işlərdən danışdı. O,
ali məktəbə qəbulun nəticələrinə görə Göyçay
rayonu məktəblərinin nəticələrini yüksək
qiymətləndirdi. Amma Göyçayın müəllimlərinin
ilin "Ən yaxşı ümumtəhsil məktəbi" və "Ən yaxşı
müəllim " müsabiqələrində iştirakının indiki
formada olmasından narazı qaldığını söylədi.
F.Şahbazlı dedi ki, Göyçayın yaxşı məktəbləri,
tanınmış ziyalıları var. Ona görə də növbəti
dəfə Təhsil Nazirliyinin keçirdiyi müsabiqələrdə
qaliblərin sayı artırılmalıdır.
65 yaşına çatan müəllimlərin pensiyaya çıxması
məsələsinə toxunan Faiq Şahbazlı burada da
bir sıra suallara aydınlıq gətirdi.
Göyçay RİH-in başçısı Mənsur Məmmədov konfransda
çıxış edərək rayon təhsil işçilərinin
qarşısında duran vəzifələrdən danışdı.
Sonda təhsil işçiləri adından Azərbaycan
Respublikasının Prezidenti möhtərəm İlham
Əliyevə müraciət qəbul edildi.
Müraciətdə bildirilirdi ki, bu gün təhsil
işçiləri qarşısında böyük vəzifələr durur. Ulu
öndərimiz Heydər Əliyev məktəbinə sadiq,
vətənpərvər, düşmənə nifrət etməyi bacaran,
biliyi, əməli və qayəsi ilə əsl azərbaycanlı
olan şəxsiyyətlər tərbiyə etmək ən şərəfli
vəzifədir. Biz Sizə söz veririk ki, bütün qüvvə
və bacarığımızı bu istiqamətdə cəmləşdirəcəyik…
AĞDAŞ
Sentyabrın 8-də Ağdaş şəhərindəki "Səma" şadlıq
sarayında rayonun təhsil işçilərinin
konfransı keçirildi.
Plenar iclasda "2010 -2011-ci dərs ilinin
yekunları və yeni dərs ilində qarşıda duran
vəzifələr" mövzusunda Ağdaş Rayon Təhsil
Şöbəsinin müdiri Lütvü Paşayev hesabat məruzəsi
ilə çıxış etdi. Dedi ki, 2010-cu ildə ali
məktəblərə qəbul olunmaq üçün ərizə verən 470
nəfər abituriyentdən 201 nəfəri, 2011-ci ildə
isə ərizə verən 498 nəfər abituriyentdən 238
nəfəri respublikamızın və digər xarici
ölkələrin ali məktəblərinə qəbul olunmuşdur.
Eləcə də rayonumuzun tam orta məktəblərinin 51
nəfər məzunu 500-dən yuxarı bal toplamışdır.
2003-cü ildə ali məktəblərə qəbul zamanı 500-dən
yuxarı bal toplayan məzunların sayı 10 nəfər
olmuşdusa, bu rəqəm 2011-ci ildə 51 nəfər təşkil
etmişdir. Beləliklə, son illər 500-dən yuxarı
bal toplayan məzunların 13 nəfəri 600-700 bal
intervalında rekord nəticə göstərə bilmişdir.
Bildirildi ki, 2011-ci ildə ali məktəblərə
qəbul zamanı ən zəif nəticəni Güvəkənd, Şıxlı,
Ərəb, Kotanarx, Ərəbocaq, Güvə, Kotavan,
Qoşaqovaq, Yuxarı Nemətabad, Eymur kənd tam orta
məktəblərinin məzunları göstəriblər.
Konfransda şəhər texniki humanitar təmayüllü
internat tipli gimnaziyanın direktoru Şəhla
Hacıbalayeva, 9 nömrəli məktəbin müəllimi
Məhəmməd Məmmədov və başqaları çıxış etdilər.
Təhsil Nazirliyinin şöbə müdiri Faiq Şahbazlı
çıxışında Ağdaş təhsilinin uğurlarını qeyd
etdi. Sonra Təhsil Nazirliyinin bəzi
məlumatlarını konfrans iştirakçılarının nəzərinə
çatdırdı. Qeyd etdi ki, məktəblərdə fənn
müəllimləri dərs yükünün azlığından
şikayətlənirlər. Bu gün deməliyəm ki, bəzi
fənlər üzrə dərs saatlarında müəyyən
dəyişikliklər var. O cümlədən, X sinifdə kimya
və biologiya, XI sinifdə fizika və coğrafiya
fənlərinin saatları bir saatdan iki saata
qaldırılıb. Ancaq dərsliklərimiz isə
dəyişməyib.
Qeyd edildi ki, 2008-ci ildən kurikulumun
tətbiqinə yeni dərsliklərlə başlanıb.
Çalışırıq ki, bu dərsliklər yüksək keyfiyyətdə
olsun. Bu gün etiraf etməliyik ki, hazırkı
dərsliklərimiz 5 il bundan qabaqkı dərsliklər
deyil. İndiki dərsliklərimiz həm poliqrafik
keyfiyyəti, həm də məzmunu ilə çox fərqlənir.
Hazırda məktəb kitabxanalarının zənginləşməsi
istiqamətində müəyyən addımlar atılır. Bu il
Dünya Bankı ilə 500 məktəbin kitabxanalarının
zənginləşməsi istiqamətində 170 adda oxu
materialları təhsil müəssisələrinə verilib.
Natiq çıxışının sonunda konfrans iştirakçılarını
maraqlandıran suallara cavab verdi və onları
yeni dərs ilinin başlanması münasibətilə təbrik
etdi.
Tədbirdə iştirak edən Ağdaş Rayon İH başçısının
müavini Aynur Novruzova təhsil işçilərinin
qarşıda duran vəzifələrindən danışdı.
Sonra rayon icra hakimiyyəti tərəfindən 2010
və 2011-ci illərdə ali məktəblərə qəbul olan bir
qrup məzuna Fəxri fərman və pul mükafatları
təqdim edildi.
Şakir CƏFƏROV |
