|
Sentyabrın 15-də Bakıdakı 164 nömrəli məktəbdə
Bilik günü və yeni dərs ilinin başlanmasına həsr
olunmuş tədbir keçirildi. Tədbirdə məktəbin
müəllim-şagird kollektivi, valideynlər və
qonaqlar iştirak edirdilər. Öncə Azərbaycanın
Dövlət bayrağı səhnəyə gətirildi və himnin
sədaları altında qaldırıldı. Tədbir başlamazdan
əvvəl ulu öndər Heydər Əliyevin və
torpaqlarımızın azadlığı uğrunda şəhid
olanların əziz xatirələri bir dəqiqəlik sükutla
yad edildi.
 Tədbiri
giriş sözü ilə açan məktəbin direktoru Kəmalə
Qədirova iştirakçıları Bilik günü münasibətilə
təbrik edərək məktəbə yeni qədəm qoyan
birincilərə uğurlar arzuladı. Təhsili millətin
gələcəyi hesab edən ümummilli lider Heydər
Əliyevin Azərbaycan dövlətçiliyinin
möhkəmləndirilməsi yolunda misilsiz
xidmətlərindən danışan direktor son illər
respublikada gedən təhsil islahatlarının
əhəmiyyətini qeyd etdi.
Məktəbin fəaliyyəti və ötən dərs ilində
qazanılmış nailiyyətlər haqqında söz açan
K.Qədirova bildirdi ki, 54 məzun respublikamızın
nüfuzlu ali məktəblərinə qəbul olunub. Onlardan
Sevil Əliyeva, Tural Abbaslı və Orxan Mehdiyev
600-dən çox bal toplamışlar. Məktəbin
müəllimlərindən Təranə Bağırova, Qafilə Əliyeva,
Səbinə Şahmalıyeva və Şəfa Sadıqova dövlət
başçısı İlham Əliyevin müvafiq sərəncamına
əsasən keçirilən "Ən yaxşı müəllim"
müsabiqəsinin qalibi olmuşlar.
K.Qədirova qeyd etdi ki, təhsil ocağı "Səmərəli
məktəb" layihəsinə qoşulub. Layihənin məqsədi
əlverişli məktəb mühiti, peşəkar müəllimlər,
müvəffəqiyyətli şagirdlər, fəal valideynlər,
səmərəli kitabxana yaratmaqdan ibarətdir.
Məktəbin strateji və müəllimlərin
özünüqiymətləndirmə planlarının hazırlandığını
bildirən direktor onu da qeyd etdi ki, pedaqoji
kollektivin 95%-i müəllimlərin peşəkarlıq
səviyyəsinin təkmilləşdirilməsi prosesindən
keçib.
Tədbirdə çıxış edən birinci sinif müəllimləri
Tamella Məmmədova və Səxavət Yusifova Bilik
günü münasibətilə müəllim və şagirdləri təbrik
etdilər. Birinci sinfə qədəm qoyan fidan
balalara həmişə dərslərindən "əla" qiymətlər
almağı, Azərbaycana layiq vətəndaş olmağı
arzuladılar.
Sonda şagirdlərin ifasında şeirlər söyləndi,
mahnılar oxundu. İlk dəfə məktəb həyatına qədəm
qoyan birincilər musiqi sədaları altında dərs
otaqlarına yerləşdirildilər.
Niyazi RƏHİMOV |
