|
Kaspi Təhsil Mərkəzi ənənəvi olaraq illik yekun
hesabat tədbiri keçirmişdir.
AzərTAc xəbər verir ki, tədbirdə mərkəzin ötən
tədris ilində fəaliyyəti, qazandığı nailiyyətlər
barədə məlumat verilmiş, 2011-2012-ci tədris ili
üçün nəzərdə tutulmuş yeni layihələr təqdim
edilmişdir.
"Kaspi" Şirkətlər Qrupunun rəhbəri Sona Vəliyeva
tədbir iştirakçılarını mərkəzin fəaliyyəti
barədə ətraflı məlumatlandırmışdır. Bildirmişdir
ki, Kaspi Təhsil Mərkəzi paytaxt sakinlərinin
mərkəzin xidmətindən rahatlıqla istifadə
etmələri üçün cari ildə filiallarının sayını 5-ə
çatdırmışdır. Bundan əlavə, mərkəz bir neçə
uğurlu layihələr həyata keçirmişdir. "Azercell"
şirkətinin dəstəyi ilə jurnalistlər üçün, Daxili
İşlər Nazirliyinin dəstəyi ilə isə polis
əməkdaşlarına peşəkar dil kursları təşkil
edilmişdir. Layihələr bu gün də davam etdirilir.
S.Vəliyeva Kaspi Təhsil Mərkəzinin qarşıdan
gələn tədris ilinə yeni nəşrləri ilə qədəm
qoyduğunu da diqqətə çatdırmışdır. Bildirmişdir
ki, bu il "Kimya" və "İngilis dili" fənləri üzrə
dərs vəsaiti, Azərbaycan tarixi və ingilis dili
üzrə test bankları nəşr olunmuşdur. Şirkətlər
Qrupunun rəhbəri yaxın gələcəkdə də bir sıra
kitabların işıq üzü görəcəyini bildirmişdir.
Mərkəzin yeni layihələri barədə tədbir
iştirakçılarına ətraflı məlumat verən S.Vəliyeva
yeni tədris ili üçün uşaq hazırlığı layihəsinin
həyata keçirildiyini demişdir. Bildirmişdir ki,
"Kaspi Kids" adlı bu layihə artıq yeni tədris
ilindən xidmət göstərəcəkdir. Bu layihə 4, 5 və
6 yaşlı uşaqlar üçün nəzərdə tutulmuşdur. O,
peşəkar xidmətlər göstərəcək bu layihəyə
məktəbəqədər hazırlıq, uşaqlar üçün ingilis və
rus dilləri, rəsm dərnəyi daxil olduğunu
bildirmişdir.
Kaspi Təhsil Mərkəzinin direktoru Elnur Əliyev
layihələrin uğurla həyata keçirildiyini diqqətə
çatdırmışdır. O, mərkəzlə əməkdaşlıq edən
universitetlərin sayının 70-ə çatdığını, 50-yə
yaxın tələbənin xaricdə bakalavr və magistr
pillələri üzrə təhsilinin təmin edildiyini
vurğulamışdır.
Ailə, Qadın və Uşaq Problemləri üzrə Dövlət
Komitəsi sədrinin müavini Aynur Sofiyeva,
professor Yəhya Kərimov və digər çıxış edənlər
mərkəzin fəaliyyəti, təhsil sahəsində gördüyü
uğurlu işlər və əldə etdiyi nailiyyətlər barədə
danışmışlar.
Sonda bu il ali məktəblərə qəbul imtahanlarında
yüksək nəticə göstərmiş tələbələrə Kaspi Təhsil
Mərkəzinin hədiyyələri təqdim edilmişdir. |
